Te faatia ra te feia poro i te Basileia
‘E opani rahi tei iritihia’ e aratai tia ˈtu i te ohipa i Cuba
O TE aposetolo Paulo te tahi taata poro faahiahia i te parau apî maitai o te Basileia o te Atua. Ua faaohipa oia i te mau ravea atoa no te faaite ia vetahi ê i te mau parau tǎpǔ a te Poiete no nia i te ora mure ore no te mau taata e faaroo. Ia ˈna i haere i Ephesia, ua ite atura o Paulo i te hoê huru tupuraa apî o te faatia ia ˈna ia tauturu i te mau taata e rave rahi atu â. Ua parau oia e: “E parahi râ vau i Ephesia . . . E opani rahi hoi e te maitai tei iritihia ia ˈu nei.”—Korinetia 1, 16:8, 9.
Ua ite atoa te mau Ite no Iehova i Cuba i te hoê huru tupuraa apî. Noa ˈtu e aitâ to ratou tiaraa i haamana-roa-hia ˈtura, e nehenehe ta te mau Ite i teie nei e faaite i to ratou tiaturiraa Bibilia i te mau taata no to ratou fenua ma te tapuni ore. Aita i maoro iho nei, ua faaite te hau faatere no Cuba i to ˈna hinaaro mau e faatia i te mau pǔpǔ faaroo ěê ia ohipa ma te tiamâ. Ua faahiti tahaa te Peretiteni Castro i te mau Ite no Iehova ei pǔpǔ faaroo e fanaˈo ra i teie nei i te mau taairaa maitatai aˈe e te hau faatere no Cuba.
Ua iriti teie huru tupuraa apî i te “opani rahi” e aratai tia ˈtu i te ohipa no te mau Ite. Ei hiˈoraa, ua iriti iho nei te mau Ite no Iehova i te hoê piha ohipa i Cuba, o te tauturu nei ia ratou ia faanaho i ta ratou ohipa pororaa i roto i tera fenua. Hau atu i te 65 000 Ite e tauturu nei i te taata ia haapii e ia maramarama i te Bibilia. Te faaohipa nei ratou i te mau buka e te mau vea Bibilia, mai Te Pare Tiairaa e te A ara mai na! E rave rahi feia no Cuba e hiaai nei i te parau-tia o te fanaˈo nei i te haapiiraa i te Bibilia e te mau Ite no Iehova.
Te faatupu tamau atoa nei te mau Ite i te mau putuputuraa i roto i te mau pǔpǔ iti na te motu taatoa. I te tahi taime, e fanaˈo atoa ratou i te haamaitairaa taa ê e faatupu i te mau tairururaa rahi aˈe i roto i te mau pǔpǔ e 150 taata. Te mauruuru mau nei ratou no te parau faatia i horoahia mai e te mau tia mana no Cuba, e nehenehe atura ratou e putuputu e to ratou mau taeae e mau tuahine i te pae varua, ma te himene i te mau arueraa i te Atua, e te pure-amui-raa.
Ua vauvauhia iho nei te porotarama o te Tairururaa Mataeinaa “Te mǎtaˈu i te Atua” i mua hau atu i te 1 000 pǔpǔ taata i ruru mai i roto noa e toru hopea hebedoma. Te faataa ra te hoê tabula parau e ua ite-papu-hia “te nahonaho, te nane ore, e te hau” i te mau tairururaa atoa. Ua haapopou te mau tia mana i te mau Ite no nia i teie vahi.
Na te ao atoa nei, te tutava nei te mau Kerisetiano mau i te haapao i te faaueraa no ǒ mai i te Atua ra e poro i te parau apî maitai o te Basileia o te Atua. I te hoê â taime, te tutava nei ratou i te atuatu i te mau taairaa maitatai e te mau tia mana o te hau. (Tito 3:1) Te pee nei te mau Ite no Iehova i te aˈoraa a te aposetolo Paulo o tei papai e: “E mata vau i te aˈo atu ia oe, e ei faaora, e te pure, e te ani, e te haamaitai i te Atua i te taata atoa nei; i te hui arii, e te feia mana atoa ra, ia parahi hauti-ore-hia tatou ma te hau, ma te paieti, e te tura.”—Timoteo 1, 2:1, 2.