Ua tavini oia ia Iehova ma te haehaa
“E ERE te vahi i reira outou e tavini ai i te mea faufaa roa, o vai râ ta outou e tavini ra te mea faufaa mau.” Mea au na John Booth ia faahiti i taua mau parau ra, e ua ora oia ia au i te reira. Ua faaite papu to ˈna oraraa i nia i te fenua nei, o tei hope i te Monire 8 no Tenuare 1996, e o vai ta ˈna i maiti i te tavini.
A vai apî noa ˈi oia i te matahiti 1921, ua imi o John Booth i te tumu o te oraraa. Ua haapii oia i te haapiiraa sabati i te Ekalesia Porotetani no Holane, ua patoi râ oia i te manaˈo no te faaineineraa ia riro ei ekalesiatiko no te mea ua manaˈo oia e te ora ra te mau tia faatere haapaoraa i te oraraa miimii. I to ˈna iteraa i te hoê api parau no te hoê oreroraa parau “Te mau mirioni taata e ora nei i teie nei eita ïa e pohe faahou” (beretane), aita oia i haamarirau i te papai no te buka e faaitehia ra i te reira. No to ˈna anaanatae i te mea o ta ˈna i taio, ua tere oioi oia na nia i te pereoo tataahi tau 24 kilometera i te mau putuputuraa a te Feia Haapii Bibilia, te iˈoa ïa o te mau Ite no Iehova i tera tau. Ua bapetizohia oia i te matahiti 1923 e ua haamata oia i te poro i tera e tera fare i te mataeinaa no Wallkill, i New York, i reira to to ˈna utuafare fetii fare faataheraa û e vai ai.
Ua rave te Taeae Booth i te taviniraa ma te taime taatoa i te avaˈe Eperera 1928. Ua poro oia i roto i to ˈna iho tuhaa fenua e i te mataeinaa i te pae Apatoa, ma te tauiraa ˈtu i te mau papai Bibilia no te maa e te fare. Aita oia i mǎtaˈu i te mau atâtaraa mai te mau fatu fare hamaniraa ava opanihia e te ture e e pupuhi ta ratou, ua pupuhi mai te hoê e ua pepe to John Booth hoa pionie. I te matahiti 1935, ua nominohia te Taeae Booth ei tiaau ratere e ua haamata oia e ratere na roto i te mau amuiraa e te mau pǔpǔ iti o taua tuhaa fenua ra. Ua faanaho oia i te mau tairururaa e ua tauturu oia i te mau taeae e te mau tuahine ia faaitoito maite noa ˈtu te patoiraa. Ua riro te faarururaa ˈtu i te mau nahoa taata riri roa, te tiaraa ˈtu i mua i te tiribuna, e te mauiuiraa atoa i te fare tapearaa ei mau ohipa matauhia na te Taeae Booth. “E tia ia papaihia i te hoê buka no te faatia i te mau taime rii anaanatae o taua mau taime ra,” o ta ˈna ïa i papai i te hoê mahana.
I te matahiti 1941, ua tono Joseph F. Rutherford, te peretiteni o te Taiete Watch Tower i taua tau ra, i te Taeae Booth no te rave i te ohipa i te Vahi faaapuraa no te Basileia, i pihai iho ia Ithaca, i New York. I reira, ua tavini oia ma te haapao maitai e 28 matahiti. Aita to ˈna here no te taviniraa i paruparu aˈe, ua oaoa roa oia i te roaraa matahiti i te amuimui atu e te mau tausani taeae haapii no te Fare Haapiiraa no Gileada a te Taiete Watchtower no te faaineine i te mau mitionare, i vai na i reira i te Vahi faaapuraa no te Basileia e tae atu i te matahiti 1961. I te matahiti 1970, ua anihia i te Taeae Booth ia tavini i te Vahi faaapuraa i Wallkill, i New York, i te vahi iho i reira oia i haamata ˈi i te taviniraa pionie tau 45 matahiti na mua ˈˈe.
I te matahiti 1974, ua nominohia te Taeae Booth ei melo no te Tino Aratai a te mau Ite no Iehova i Brooklyn, i New York. Ua tavini oia ma te haapao maitai i nia i teie toroa e tae roa ˈtu i to ˈna poheraa i te 93raa o to ˈna matahiti. Ua herehia o John Booth no to ˈna haehaa rahi e to ˈna huru taata kerisetiano maitai. Ua poro oia ma te haapao maitai i tera e tera fare e i te mau hiti purumu o te oire e tae noa ˈtu i te paruparuraa to ˈna tino e to ˈna itoito.
A oto ai te feia o tei tavini e o o ˈna i to ˈna poheraa, te ite nei ratou i te tamahanahanaraa i roto i te parau tǎpǔ a te Bibilia no nia i teie mau Kerisetiano faatavaihia, e e faatiahia ratou no te oraraa i nia i te raˈi e “e pee hoi ta ratou ohipa ia ratou.” (Apokalupo 14:13; Korinetia 1, 15:51-54) Mea papu maitai e mau mea apî te haaati ra ia ˈna, te hoê râ vahi e nehenehe te Taeae John Booth e tavini ia Iehova e a muri noa ˈtu!
[Hohoˈa i te api 32]
John Booth 1902-1996
[Hohoˈa i te api 32]
HERALD-AMERICAN, ANDOVER 1234
76 Jehovites Jailed in Joliet
[Faaiteraa i te tumu]
Chicago Herald-American