Eiaha outou ia mairi!

IA MAIRI i te aha? Te Tairururaa Mataeinaa a te mau Ite no Iehova e piri maira, oia hoi “Te mau vea o te hau a te Atua”! I te rahiraa o te mau vahi, e haamata te tairururaa e te upaupa i te poipoi mahana pae, i te hora 9 e te afa. I muri aˈe i te faarooraa i te mau uiuiraa manaˈo e faaitoito i te faaroo i roto i te tuhaa ra “Te mau faatiaraa a te feia poro itoito o te hau,” e fanaˈo outou i te oreroraa parau faaitoito mau ra “Eaha ta te Atua e titau ra ia tatou?”

Te hoê tuhaa faufaa no te mahana pae i te avatea, o te oreroraa parau putapû mau ïa a te peretiteni “To tatou tiaraa ei vea o te hau a te Atua.” I muri iho, e vauvau mai te tuhaa ra “E tauturu anaˈe ia vetahi ê ia haapii i te mau titauraa a te Atua” i te mau manaˈo no te haapiiraa ˈtu i te mau taata apî. E apeehia te reira e te oreroraa parau tatuhaahia tano maitai ra “A ara i te mau marei huna o te faaanaanataeraa manaˈo.” E hope te porotarama o te mahana pae na roto i te mau oreroraa parau ra “A patoi atu i te Diabolo—Eiaha e farii i te faatitiauaraa” e “E turu anaˈe ma te taiva ore i te tiaraa hapa ore o te Parau a te Atua.”

E tuu te porotarama o te poipoi mahana maa i te tapao i nia i te faufaaraa o te ohipa faariroraa i te taata ei pǐpǐ, i roto i te oreroraa parau e toru tuhaa ra “Te faaite ra te mau vea i te parau apî maitai o te hau.” E hope te rururaa na roto i te mau oreroraa parau ra “E horoa anaˈe ma te oaoa i roto i te faanahonahoraa a Iehova” e “Te ora e te hau na roto i te pûpûraa e te bapetizoraa,” i muri iho ïa te mau pǐpǐ apî e bapetizohia ˈi.

E pahono te oreroraa parau no te mahana maa i te avatea ra “A hiˈopoa i te mau manaˈo o Iehova i nia i te mau tupuraa” i te mau uiraa mai teie te huru, ‘Te rave ra anei te mau Kerisetiano i te hoê ohipa faataa-ê-raa i teie mahana?’ e ‘Eaha te manaˈo o te Bibilia no nia i te utua pohe?’ E fanaˈo atoa outou i te oreroraa parau e piti tuhaa putapû mau ra “Te haapao ra te Atua o te hau ia outou” e te oreroraa parau hopea iho â râ “A tapi i te hau a te Atua i roto i te oraraa utuafare.”

I roto i te porotarama o te sabati poipoi, e vauvauhia mai te oreroraa parau e toru tuhaa ra “Te iteraa e o vai te mau vea mau” e te oreroraa parau ra “E faaroo e e auraro anaˈe i te Parau a te Atua.” E hope te porotarama o te poipoi na roto i te hoê darama hautihia mai e te mau ahu no tahito ra, o te haamatara i te mau haapiiraa faufaa mau no roto mai i te aamu Bibilia no nia i te Tavana ra o Gideona.

I roto i te rururaa hopea o te tairururaa no te sabati i te avatea, e vauvauhia mai te oreroraa parau huiraatira, oia hoi “Inaha te hau mau!—Nohea mai ïa?” E na te oreroraa parau faaitoito mau ra “A haere i mua te mau vea o te hau a te Atua” e faahope i te tairururaa.

A rave i te mau faanahoraa i teie nei iho ia tae atu outou. No te ite e ihea roa teie tairururaa e tupu ai i to outou vahi, a ani atu i te Piha no te Basileia a te mau Ite no Iehova aore ra a papai atu i te feia nenei i teie vea. E horoa te A ara mai na! o te 8 no Tiunu i te tabula o te mau vahi nohoraa i reira te tairururaa e tupu ai i Patitifa Apatoa.