Ihea roa e noaa ˈi i to ratou puai?
IA HIˈOPOA anaˈe outou i te pepe i nia i teie hohoˈa, e ite outou e e mea faufaa ore roa hoê o to ˈna mau pererau e maha. Teie râ, te tamau noa nei te pepe i te faaamu ia ˈna e i te rere. E ere teie i te hoê anaˈe tupuraa. Te itehia ra te mau pepe i te ohipa- haere-raa i te mau mahana atoa ma te erehia e 70 i nia i te hanere o te aanoraa o to ratou pererau.
Oia atoa, te faaite nei e rave rahi taata i te hoê huru manaˈo faaoromai. Noa ˈtu te mau fifi rahi i te pae tino e i te pae o te manaˈo horuhoru, eita ratou e faarue.—A faaau e te Korinetia 2, 4:16.
Ua faaruru te aposetolo Paulo iho i te mau haafifiraa rahi i roto i to ˈna mau tere mitionare. Ua rutuhia oia, ua taparahihia, ua pehihia i te ofai, e ua tapeahia i te auri. Hau atu, ua roohia oia i te tahi huru maˈi, peneiaˈe te hoê fifi e to ˈna mau mata, tei riro noa ei “tara i roto i [to ˈna] tino.”—Korinetia 2, 12:7-9; Galatia 4:15.
Te tiaturi nei te hoê matahiapo kerisetiano o David te iˈoa, o tei haa i te mau tupuraa ino o te maˈi hepohepo e rave rahi matahiti, e ua riro te puai o Iehova ei mea faufaa no to ˈna rapaauraa. “E rave rahi taime, e au ra e ua faaruehia te haere-mǎrû-raa tei fifi ia noaa,” o ta ˈna ïa e faataa ra. “I to ˈu faarururaa ˈtu i teie manaˈo paruparu, ua tiaturi vau ia Iehova e ua turu mau oia ia ˈu. I te tahi mau taime, ua pure au e mau hora te maoro i te hoê â taime. I to ˈu paraparauraa ˈtu ia Iehova, aita faahou to ˈu mau manaˈo moemoe e to ˈu faufaa ore. Ua haa na vau i te mau tau paruparu rahi, auaa râ Iehova, mai roto mai teie paruparu e haere mai ai te puai—te puai atoa no te tauturu ia vetahi.”
Ua haapuai te Atua ra o Iehova ia Paulo. No reira, ua nehenehe oia e parau e: “Ia paruparu hoi au ra, te puai ra ïa vau i reira.” (Korinetia 2, 12:10) Oia mau, ua haapii te paruparu o Paulo ia ˈna ia turui i nia i te puai no ô mai i te Atua ra. “E tia ia ˈu te mau mea atoa nei i te Mesia, tei tauturu mai ia ˈu ra,” o ta Paulo ïa i parau. (Philipi 4:13) Mea papu e horoa Iehova i te puai i ta ˈna ra mau tavini.