Te ino ore mau—Tapao fifi roa ia naeahia
MEA au roa na Arnold iti ta ˈna hauti nemera. E afaifai oia na te mau vahi atoa o ta ˈna e haere—ia haere oia e hauti, e tamaa, e i roto roa i to ˈna roˈi. Ua riro teie nemera no ˈna ei tamǎrûraa e ei parururaa. I te hoê râ mahana, ua tupu te hoê ati. Ua moe ta ˈna nemera!
Ua rutu o Arnold i te taˈi, e ua paheru to ˈna mama, to ˈna papa, e to ˈna e toru tuaana, i roto i to ratou fare rahi ia itehia mai te nemera. Ua itehia mai iho â, tei roto i te hoê afata ume. Na Arnold paha i tuu i roto, e ua moe-oioi-hia e ana e teihea roa. Ua itehia mai ta ˈna nemera, e ua nâ o Arnold. Ua oaoa roa oia e ua vai faahou oia ma te peapea ore.
Auê te au e, ahiri e e matara te mau fifi atoa mai teie te ohie—mai te iteraa mai i te hoê hauti nemera i roto i te hoê afata ume! No te rahiraa râ o te taata, mea hohonu roa ˈtu â e mea fifi roa ˈtu â te parau no te oraraa ino ore. Na te mau vahi atoa, te aniani nei te taata, ‘E rave-ino-hia aore ra e taparahihia anei au? E erehia anei au i ta ˈu ohipa? E navai anei to ˈu utuafare i te maa? E ape anei te taata ia ˈu no ta ˈu haapaoraa aore ra no to ˈu iri?’
E rave rahi taata te erehia nei i te hoê oraraa ino ore. Ia au i te mau Nunaa Amui, fatata e toru miria taata o te erehia nei i te ravea no te rapaauraa i te mau maˈi matauhia, e oia atoa i te mau raau hinaaro-roa ˈˈe-hia. Hau atu i te hoê miria taata o te taiâ nei i roto i te veve rahi. Fatata hoê miria, e nehenehe ta ratou e rave i te ohipa, tera râ, aita i navai ta ratou ohipa. Te maraa noa ˈtura te rahiraa taata e horo nei i to ratou fenua. I te hoperaa te matahiti 1994, fatata 1 i nia i te 115 taata i nia i te fenua nei, tei faahepohia ia faarue i to ratou vahi faaearaa. E mau mirioni taata o tei ino roa te oraraa no te ohipa hooraa raau taero, e 500 miria dala marite te apî i te matahiti, o tei faatupu hoi e rave rahi ohipa iino e te haavî uˈana. Te faaino nei te tamaˈi i te oraraa o te mau mirioni taata. I te matahiti 1993 anaˈe, e 42 fenua o tei faaô i roto i te tamaˈi, e e 37 o tei faaruru i te haavîraa uˈana i te pae politita.
Ua taai-pauroa-hia te tamaˈi, te veve, te mau ohipa iino, e vetahi atu mau haamǎtaˈuraa i te oraraa ino ore o te huitaata nei, e te haere noa ˈtura i te rahi. Aita e ravea ohie, mai te nemera i roto i te afata ume, no teie mau fifi. Inaha, eita roa ˈtu e matara i te taata.
Te faaara ra te Parau a te Atua, te Bibilia e: “Eiaha e tiaturi i te hui arii, e te taata atoa, aita hoi o ˈna e ora.” O vai ïa ta tatou e tiaturi? Te na ô râ te irava e: “E ao to ˈna tei te Atua o Iakoba te tauturu ia ˈna; e tei to ˈna Atua, tei ia Iehova to ˈna tiaturiraa! O tei hamani i te mau raˈi e te fenua, te tai, e te mau mea atoa i roto ra.”—Salamo 146:3-6.
No te aha tatou e nehenehe ai e tiaturi e, na Iehova e hopoi mai i te ino ore no to tatou nei fenua? E nehenehe anei e fanaˈo i te hoê oraraa oaoa e te ino ore i teie nei? Nafea te Atua e tatara ˈi i te mau fifi e taotia nei i te oraraa ino ore o te taata?