“Ta Iehova ohipa”

Teie te upoo parau o te hoê tumu parau i roto i te vea ra El Norte no te oire o Monterrey, i Mexique. No nia ïa taua tumu parau ra i te hoê Fare tairururaa apî a te mau Ite no Iehova.

E oire o Monterrey e te hoê huiraatira e 2 300 000 taata (tae noa ˈtu te mau vahi e ati ra ia ˈna) i te tuhaa apatoerau o Mexique, e e 19 200 taata poro i reira. Fatata hoê matahiti e te afa te maoro, ua tahoê te mau Ite i ta ratou mau tutavaraa no te patu i te hoê Fare tairururaa nehenehe e te ohie e e 3 000 parahiraa au maitai e te matini faatoetoe mataˈi. Ua oaoa te mau Ite o taua vahi ra i to te hoê melo no te Tino Aratai a te mau Ite no Iehova horoaraa i te oreroraa parau avariraa. Ua faataahia i roto i te porotarama te hoê aamu poto no nia i te ohipa i Monterrey, e ua uiuihia te feia o tei apiti atu i roto i te paturaa. I muri iho, ua fanaˈo na 4 500 taata o tei tae mai i te putuputuraa i te oreroraa parau avariraa.

Teie te toru o te mau Fare tairururaa apî o tei patuhia i Mexique e o tei faataahia na ei tereraa ohipa no “Te mau Piha no te Basileia e te mau Fare tairururaa rarahi aˈe, aano aˈe, e te maitatai aˈe.”

E hau atu i te 443 000 feia poro i Mexique, e na 1 492 500 taata o tei tae mai i te oroa Haamanaˈoraa i te matahiti 1995, papu maitai e turu te mau Fare tairururaa apî, mai teie fare i Monterrey, i te opuaraa a te Atua.