“Te titau nei outou i te faaoromai”

‘TE TITAU nei tatou i te faaoromai,’ no te fanaˈo i “te tupuraa o te parau tǎpǔ.” (Hebera 10:36, MN) Te tatara ra te hoê taata tuatapapa bibilia e te faataa ra te taˈo heleni no te parau ra “faaoromai,” o ta te aposetolo Paulo i faaohipa i roto i teie irava i te tahi mau taime, i “te ravea o te hoê tiare iti ia ora i raro aˈe i te mau huru tupuraa fifi e te au ore.”

I nia i te mau mouˈa no Europa, te tupu ra teie huru tiare. Te mea maere, te piihia nei oia ora mure ore (live-forever na roto i te reo beretane). Papu maitai, aita taua tiare ra no te mau Alpes e ora ra e a muri noa ˈtu, te faaoromai nei râ oia i tera matahiti i muri aˈe i te tahi, ma te faauaa i te mau tiare haviti mau i te mau tau veavea atoa. Te faataa ra te hoê buka parau paari (La Nouvelle Encyclopédie britannique) e ua horoahia te iˈoa ora mure ore i taua tiare ra no to ˈna “paari e to ˈna vai maoro.” (Teie atoa te auraa o te iˈoa aivanaa o taua mau tiare o te fetii Sempervivum ra, oia hoi “ora mure ore.”)

Te vahi faahiahia o teie tiare vai maoro oia hoi te tupu nei oia i te mau vahi fifi roa. E nehenehe e itehia oia i nia roa i te mau vahi pahee o te mouˈa, i reira e nehenehe te anuvera e topa roa i te faito 35 teteri Celsius i roto noa e 24 hora. E nehenehe oia e aa i roto i te hoê apoo ofaifai e maa vahi iti repo. Eaha vetahi mau taviri o to ˈna faaoromai i roto i taua mau huru tupuraa fifi mau ra?

Mea meumeu te mau rauere o te tiare ora mure ore, o te haaputu maitai i te pape. E nehenehe ïa oia e tapea mai i te haumi atoa no roto mai i te ûa aore ra te hiona o te tahe mai. Hau atu, e mau pupa te tupu mai o te tahoê i to ratou puai ia mau papu ratou i nia i te ofai. Na roto i te aaraa i roto i te mau apoo, e paruruhia oia i te mau huru o te mahana, noa ˈtu e maa vahi iti repo noa. Na roto i te tahi atu mau parau, te tupu maitai ra oia ma te faaohipa i te mau huru tupuraa iino no to ˈna iho maitai.

I te pae varua, te faaruru nei paha tatou i te mau huru tupuraa o te tamata i to tatou faaoromai. Na te aha e tauturu ia tatou ia faaoromai i raro aˈe i te tamataraa? Mai te tiare ora mure ore ra te huru, e nehenehe tatou e haaputu i te pape faaora o te Parau a te Atua e e taati maite atu i te mau kerisetiano mau no te imi i te tauturu e te paruru. Inaha, mai te tiare no te mau Alpes, e tia ia tatou ia ati maite atu i to tatou “mato,” o Iehova, e i ta ˈna atoa Parau e ta ˈna faanahonahoraa.—Samuela 2, 22:3.

Oia mau, e faahaamanaˈoraa anaanatae mau te tiare ora mure ore e, i roto atoa i te hoê tupuraa fifi mau, e nehenehe tatou e faaoromai ia haafaufaa tatou i te mau faanahoraa e vai ra. Te haapapu ra Iehova ia tatou e e aratai taua faaoromai ra i to tatou ‘noaaraa tei parauhia maira,’ oia hoi to ˈna auraa mau ra, te ora mure ore ïa.—Hebera 6:12; Mataio 25:46.