Ta Irina buka himene au roa ˈˈe

AITA i maoro aˈenei, ua bapetizohia o Irina, te hoê tamahine e iva matahiti to ˈna no Sofia mai, i Bulgarie, ei Ite no Iehova. Mea au na ˈna e himene i te mau himene iho â râ i roto i te buka E haamaitai ia Iehova na roto i te himene (farani). Ua haamau ïa o Irina i te tapao e tamau aau i te tahi mau himene i te mau avaˈe atoa.

Te hoê o te mau haapiiraa au-roa ˈˈe-hia e Irina i te fare haapiiraa o te upaupa ïa. No reira ua maere roa ta ˈna orometua haapii upaupa i to Irina patoiraa i te himene atu i roto i te hoê pǔpǔ himene o te fare haapiiraa. No te aha o Irina i patoi ai? Ua taa ia ˈna e e faahanahana te rahiraa o te upaupa o te titauhia ia ˈna ia himene i te mau aito here aiˈa e te mau oroa etene. Te turu atoa ra vetahi mau himene i te orureraa hau e te haavîraa uˈana no te faaitoito i te mau manaˈo here aiˈa. Aita te orometua haapii i taa i te tiaraa o Irina no nia i taua ohipa ra. Ua papai aˈera o Irina i te hoê rata na ta ˈna orometua haapii o tei faataa i ta ˈna mau tiaturiraa papu i te pae faaroo—aita râ i manuïa.

Ua noaa i te metua tane o Irina i te hoê manaˈo. Ua horoa oia i te orometua haapii i te buka ra E haamaitai ia Iehova na roto i te himene, tei roto te mau himene o ta Irina e au roa ˈˈe i te himene. Te tahi tau mahana i muri iho, ua pii te orometua haapii ia Irina i roto i te piha upaupa. Ua ani o ˈna ia Irina ia himene i te tahi mau himene o ta ˈna e au roa ˈˈe i roto i te buka—i mua i to ˈna mau hoa haapiiraa—a apiti ai te orometua haapii ia ˈna e te piana. Ua hau atu i te hoê hora te maoro o te hautiraa! Ua faˈi te orometua haapii e te vai ra vetahi mau himene nehenehe mau i roto i te buka himene o ta Irina e au roa ˈˈe.