Ua ora mai anei outou?

HOÊ ahuru matahiti to Johnny i to te hoê taata tapearaa ia ˈna i te hoê faaiteiteraa ohipa e ua ani atu e: “E taurearea e, te farii ra anei oe ia Iesu Mesia mai to oe Fatu e to oe Faaora?” E uiraa maere mau teie no Johnny, i te mea e ua tiaturi noa na o ˈna ia Iesu. Ua pahono ïa o ˈna e, “Papu maitai e e.” “A arue i te Fatu!” ta te taata i tuô i te taatoaraa ia faaroo ratou. “Teie te tahi atu nephe o tei faaorahia no te Mesia!”

Mea ohie mau anei te faaoraraa? Ua “faaorahia” anei o Johnny i te taime a faahiti ai o ˈna i taua mau parau ra, noa ˈtu eaha te ohipa o ta ˈna e rave i te toea o to ˈna oraraa? E pahono te rahiraa o te mau taata aau rotahi e e. Te parau nei vetahi mau api parau iti faaroo ia oe ia papai i raro i te taio mahana i “faaorahia” mai ai oe ia nehenehe oe e haamanaˈo i te reira.

Ua papai te hoê ekalesiatiko e i “te taime e farii ai te hoê taata i te Mesia . . . ua faataa-aˈena-hia to ˈna oraraa ma te tamau.” Ua parau oia e te na ô ra te Bibilia e tei te hoê noa “ohipa faaroo [i te hoê taime], eiaha râ tei te faaroo-tamau-noa-raa” te ora. Ua papai te tahi atu taata faaroo e: “E ohipa faaotihia te reira. Ua faaoti-aˈena-hia to oe faaoraraa . . . ‘Ua hope [ta oe] aroraa.’ ‘Ua faaorehia [ta oe] hara.’” Te ite atoa nei râ te mau taata o te tiaturi papu ra e mea mau te reira i te hoê fifi. Mea papu e aita te rahiraa taata o tei parauhia ˈtu e ua “faaorahia” ratou e ora ra ia au i ta te Bibilia e faaue ra ia ratou ia rave. Te hoê faataaraa matauhia oia hoi peneiaˈe aita ratou i “farii” mau i te Mesia.

No reira, eaha te auraa mau o te “fariiraa” ia Iesu? E ohipa faaroo anei o te tupu i te hoê noa taime, aore ra e huru oraraa anei o te tamau noa? E tia anei ia navai maitai te puai o to tatou tiaturiraa no te turai ia tatou ia ohipa? E nehenehe mau anei tatou e farii i te mau haamaitairaa o te tusia a Iesu ma te ore e amo i te hopoia no te apee ia ˈna?

Te hinaaro nei te rahiraa o te mau taata i te mau haamaitairaa, eiaha râ i te hopoia e pee e e auraro ia Iesu. Inaha, te faahuru ê pinepine ra te taˈo ra “auraro” ia ratou. Ua parau râ o Iesu e: “A haere mai ai a pee mai ai ia ˈu.” (Luka 18:18-23) E te faataa ra te Bibilia e: “Tei ore i faaroo i te evanelia o to tatou Fatu o Iesu Mesia ra: o te [faa]utuahia mai ïa i te pohe mure ore.”—Tesalonia 2, 1:8, 9; Mataio 10:38; 16:24.

Te faahiti ra te Bibilia e rave rahi mau ohipa o te faatupu i te mau uiraa faufaa mau no nia i te mea e haapiihia ra no nia i te faaoraraa. Mai te peu e te hinaaro ra oe e tuatapapa e eaha ta te Bibilia e faahiti mau ra no nia i taua tumu parau ra, e anaanatae oe i te mau api i muri nei. A iriti i ta oe Bibilia, e a taio i te mau irava i faahitihia no te ite e eaha ta Iesu e ta ta ˈna mau aposetolo i haapii no nia i taua tumu parau faufaa mau ra.