Aita ta ratou mori i pohe
I TE mau tau bibilia, ua faaruru vetahi mau Ite no Iehova haapao maitai i te mau haafifiraa e te mau peapea. Ua faaruru ratou i te patoiraa e te tahi mau manuïa-ore-raa. Aita râ ratou i faarue e i paruparu. Oia mau, aita ta ratou mori i pohe.
Ei hiˈoraa, ua horoahia i te peropheta Ieremia i te hoê hopoia ia riro ei peropheta a te Atua no te nunaa apotata o Iuda. Ua faaite oia i te faaararaa no nia i te taeraa mai te haamouraa o Ierusalema. (Ieremia 1:11-19) Ei faahopearaa, ua faaruru o Ieremia e rave rahi mau aroraa e te mau taata o to ˈna fenua, o tei hiˈo ia ˈna mai te hoê taata tuô i te ati.
I te hoê taime ua tairi te tahuˈa ra o Pasura, te tavana rahi o te fare o te Atua, ia Ieremia no te parau o ta ˈna i tohu e ua tuu oia ia ˈna i roto i te fare tapearaa. I mua i teie huru haafifiraa, ua parau o Ieremia e: “Ua riro vau ei ataraa i te mau mahana atoa nei; e ua tâhitohitohia vau e ratou atoa e ati noa ˈˈe. E ia parau anaˈe au ra, ia pii noa vau i te rave uˈana, e ia parau i te haru ra, ua ruri-ê-hia te parau a Iehova ia ˈu ei faainoraa, e ei tâhitohitoraa, eita e faaea.” Ua paruparu te peropheta e ua tae roa oia i te parau e: “E ore au e parau i te reira [Iehova], e ore au e parau faahou i to ˈna ra iˈoa.”—Ieremia 20:1, 2, 7-9.
Teie râ, aita o Ieremia i haaparuparu roa. Ma te faahiti i “te parau a Iehova,” ua na ô oia e: “Riro atura taua parau ra mai te auahi ama i roto i tau aau ra, ua opanihia i roto i to ˈu ra mau ivi; rohirohi aˈera vau i te faaoromai-noa-raa, e aita ˈtura e tia ia mamû.” (Ieremia 20:8, 9) Ma te turai-puai-hia ia faaite i te mau parau a te Atua, ua tauturuhia o Ieremia e te varua moˈa e ua faatupu oia i ta ˈna hopoia.
E rave rahi atoa mau tumu ta te aposetolo Paulo i faaruru e ia paruparu o ˈna, ahiri e ua hema oia i te reira. Ua faaruru oia i te mau ati natura, te tomoraa te pahi, te hamani-ino-raa, e te mau taparahiraa. Hau atu, ‘o te peapea râ i roohia noa mai ai ia ˈna i te mau mahana atoa nei, i te faaitoito i te mau ekalesia atoa ra.’ (Korinetia 2, 11:23-28) Oia, ua tia ia Paulo ia faaruru i te mau mahana atoa i te mau fifi, ma te haapeapea no nia i te mau amuiraa apî o ta ˈna i tauturu no te haamau i te reira. Hau atu, e taata hara oia e e tia ia ˈna ia aro i “te hoê tara i roto i [to ˈna] tino,” peneiaˈe ua mohimohi te mata. (Korinetia 2, 12:7; Roma 7:15; Galatia 4:15) Ua paraparau atoa vetahi i muri mai i te tua o Paulo, e ua tae roa te reira i roto i to ˈna tariˈa.—Korinetia 2, 10:10.
Aita râ o Paulo i vaiiho i te paruparu ia upootia mai i nia ia ˈna. Aita, e ere o ˈna i te hoê aito. (Korinetia 2, 11:29, 30) Na te aha i faaama noa i te ‘auahi ama i roto ia ˈna’? A tahi, e hoa to ˈna tei turu ia ˈna, ua apiti atoa vetahi ia ˈna i Roma i reira oia i te tapearaahia. (Ohipa 28:14-16) A piti, ua hiˈo te aposetolo i to ˈna huru tupuraa ma te aifaito. Ua hape te feia i hamani ino e i patoi ia ˈna, eiaha râ o Paulo. I te pae hopea o to ˈna oraraa i nia i te fenua nei, ua faaau oia i ta ˈna taviniraa ma te maitai e ua parau oia e: “E teie nei, te vaiihohia ra te korona o te parau-tia no ˈu, ta te Fatu, ta te hiˈo parau-tia ra, e horoa mai no ˈu.”—Timoteo 2, 4:8.
Hau atu â, ua haafatata tamau o Paulo i te Atua ra o Iehova na roto i te pure, e ‘ua turu maira te Fatu ia ˈna.’ (Timoteo 2, 4:17) “E tia ia ˈu te mau mea atoa nei ia ˈna, tei tauturu mai ia ˈu ra,” ta Paulo i parau. (Philipi 4:13) Ua tauturu te taairaa e te Atua e te mau hoa kerisetiano, ma te faaau maitai i ta ˈna taviniraa, ia Paulo ia tamau noa i roto i te taviniraa a Iehova.
Ua faaurua te Atua ia Paulo no te papai e: “Eiaha tatou e rohirohi i te parau maitai, ei te tau mau ra hoi tatou e ooti ai ia ore tatou ia toaruaru.” (Galatia 6:7-9) E ooti i te aha? I te ora mure ore. No reira, e pee anaˈe ia Ieremia, Paulo, e e rave rahi atu â mau ite no Iehova haapao maitai tei faahitihia i roto i te mau Papai. E, e pee anaˈe ia ratou, e eiaha tatou ia paruparu. Eiaha e vaiiho e ia pohe ta tatou mori.—A faaau e te Mataio 5:14-16.
[Hohoˈa i te api 25]
Aita o Paulo e o Ieremia i vaiiho e ia pohe ta raua mori