Ua horoa te afata maa i te hoê faaiteraa

I TE mau mahana i muri aˈe i te aueueraa fenua i Kobe, i Tapone, i te avaˈe tenuare ra, ua fifihia te mau taata o taua vahi ra i te pae no te maa. Aita faahou te mau Ite no Iehova i erehia i te maa, maoti te tauturu here o to ratou mau hoa. I na mahana matamua e piti aore ra e toru i muri aˈe i te aueueraa, ua horoa te mau amuiraa i tapiri mai i te maa raiti. Aita i maoro, ua pûpûhia na te mau hoa tei hiaai i te mau afata maa. I nia i te afata maa, ua tapiri e rave rahi i te tahi mau nota no te faaite i to ratou haapeapearaa no te feia tei fifihia. Ua parau te feia o tei fanaˈo i te maa e ua “tamitihia” te mau maa atoa no te mea aita ratou i nehenehe e tapea i to ratou mau roimata i to ratou taioraa i te mau nota.

Ua horoa te mau Ite no Iehova i ta ratou maa na vetahi ê o tei hiaai. Te amu noa ra te hoê Ite i ta ˈna maa a tere noa ˈi na nia i te hoê pereoo e te hoê hoa e ere i te hoê Ite o te ohipa ra i roto i te hoê â fare tapihaa. Ua horoa oia i te hoê afata maa ta ˈna i fanaˈo na ˈna.

“Ihea roa oe i te hooraa mai i teie afata maa?” ta to ˈna hoa i ani atu. Ua faataa te taeae i te ohipa tamǎrû mau a te mau Ite. “Aitâ vau i amu atura i te mau maa tupu. E faaherehere au i te tahi e e afai i te fare na to ˈu utuafare,” ta te taata i parau ma te mauruuru.

I to ˈna fanaˈoraa i te reira i te toruraa o te taime, ua horoa te hoa e 3 000 yen (tau 35 dala marite) i te Ite ra e ua parau oia e: “Ua ite maitai au i ta outou mau ohipa, a farii na e ia pûpû vau i te hoê ô no ta outou ohipa. Te mauruuru nei au i to oe horoaraa i te maa na ˈu. Ua riro mau â to oe mau hoa ei mau taata maitai mau.”