Te pâmuraa toto hiˈopoa-faahou-hia

I ROTO i teie nei tau haafifihia e te SIDA, tei roto te haamǎtaˈuraa rahi roa ˈˈe no te oraora-maitai-raa o te hoê taata maˈi o tei tapeahia i te piha tâpûraa. “Aita e ravea ta matou no te tupohe roa i te mau manumanu i roto i te toto i haaputuhia,” ta te Taote Richard Spence ïa e parau ra, ua hau atu i te ahuru matahiti to ˈna faatereraa i te Pu no te Tâpûraa ma te ore e faaohipa i te toto i te Pu Rapaauraa Fare maˈi-Haapiiraa tuatoru i Camden, New Jersey, i Marite.

Ma te maere ore, te rapaau nei te pu e rave rahi mau Ite no Iehova, ua matau-maitai-hia ta ratou patoiraa niuhia i nia i te Bibilia i te pâmuraa toto. (Levitiko 17:11; Ohipa 15:28, 29) Teie nei râ, te haere atoa nei e rave rahi feia maˈi e ere i te Ite no Iehova i taua pu ra, o tei ite i te atâtaraa o te pâmuraa toto, o te nehenehe e haaparare i te maˈi o te upaa, te SIDA, e vetahi atu â mau maˈi. “Ua faaite te faraa mai o te SIDA i te faufaaraa o te ravea titiaraa i te toto,” ta te Courier-Post Weekly Report on Science and Medicine ïa e tapao ra. “Eita râ vetahi mau tupuraa e araihia maoti te ravea titiaraa no te mea e nehenehe te hoê taata e roohia i te tirotiro hou oia a itehia ˈi te reira i te hoê hiˈopoaraa.”

No te atâta o te reira, te rave nei te Pu no te Tâpûraa ma te ore e faaohipa i te toto i te mau ravea monoraa i te pâmuraa toto, tae noa ˈtu i te faahaere-faahou-raa i te toto iho o te hoê taata maˈi i roto ia ˈna—te hoê ravea faahapa-ore-hia e vetahi mau Ite i roto i te tahi mau huru tupuraa.a Te tahi atu ravea rapaauraa o te faaohiparaa ïa i te mau raau taero o te faahaere i te tereraa toto o te taata maˈi. Hau atu, e faaohipahia te hoê ravea monoraa toto hamanihia i te tahi taime no te tauturu e ia faahaerehia te mataˈi ora ma te ore e faaohipa i te pâmuraa toto. “Te hinaaro nei te mau Ite no Iehova i te rapaauraa maitai roa ˈˈe,” ta te Taote Spence ïa e parau ra, “te hinaaro nei râ ratou i te mau ravea monoraa i te pâmuraa toto.”

Te haamauruuru nei te mau Ite no Iehova i te turu-maite-raa e te tauturu a te mau taote o te faatura nei i ta ratou mau tiaturiraa faaroo. Ei faahopearaa, ua fanaˈo mau ratou i “te rapaauraa maitai roa ˈˈe” e ua tapea ratou i te hoê haava manaˈo mâ i mua i te Atua ra o Iehova.—Timoteo 2, 1:3.

[Nota i raro i te api]