Te faatia ra te feia poro i te Basileia

Te pororaa i te hoê tau fifi mau

UA TOHU te aposetolo Paulo e “e tupu te ati rahi i taua anotau hopea nei.” (Timoteo 2, 3:1) Ua haapapuhia e e mea tano iho â teie mau parau! Ua faaruru te mau taata no El Salvador i Marite Ropu i teie tupuraa fifi mau â. Hau atu i te ahuru matahiti, ua faaô teie fenua i roto i te tamaˈi tivila o tei haaveve e o tei haapohe e rave rahi tausani taata. Ua faaea te tamaˈi i teie nei, te vai noa nei râ te ati. Ua maraa uˈana te taparahiraa taata i muri aˈe i te tamaˈi. Ua faataa te hoê taata paraparau na roto i te afata teata no taua vahi ra aita i maoro aˈenei e: “Ua riro te haavîraa uˈana e te ohipa eiâ i teie nei ei faraoa na tatou i te mau mahana atoa.”

Ua faaruru atoa te mau Ite no Iehova i teie taparahiraa taata uˈana. Ua tomo te feia eiâ i roto e rave rahi mau Piha no te Basileia e ua eiâ ratou i te mau matini haapurororaa. E rave rahi mau taime ua tomo taue te mau taurearea e pupuhi ta ratou i roto i te mau Piha no te Basileia a tupu ai te mau putuputuraa kerisetiano, ma te eiâ i te moni, te mau uati, e vetahi atu mau taoˈa a te feia i tae mai. I to ratou raveraa i ta ratou mau ohipa o te mau mahana atoa, ua taparahi-pohe-hia atoa vetahi mau Ite na te feia eiâ.

Noa ˈtu teie mau haafifiraa, te tamau noa ra te mau Ite no Iehova no El Salvador i te ohipa ma te puai i roto i te pororaa i te parau apî maitai. Te na reira ra ratou ei auraroraa i te faaueraa a te mau Papai e: “E mata na râ te evanelia i te faaite-haere-hia i te mau fenua atoa nei.” (Mareko 13:10) E rave rahi â feia i roto i teie fenua o te hiaai ra i te tiaturiraa o te Basileia ta te Bibilia e pûpû ra, e te tutava nei te mau Ite i te haere atu e farerei ia ratou tataitahi. Ua riro te faaiteraa faanaho-ore-hia e te amuiraa ei ravea aravihi no te pororaa.

A rapaauhia ˈi oia i te hoê fare maˈi, ua rave te hoê Ite i te mau taime atoa e nehenehe ai no te tauaparau e vetahi atu mau taata maˈi no nia i te mau parau tǎpǔ a te Atua no a muri aˈe, mai tei papaihia i roto i te Bibilia. Ua autâ te hoê taata e maˈi rahi to ˈna ma te oto e: “Fatata roa vau i te pohe!” Aita râ te hohoˈa mata peapea mau o te taata maˈi i haaparuparu i te Ite ia tufa ˈtu i te parau apî maitai o te Basileia o te Atua. Maoti râ, ua taio haapuai oia i te taata ra te buka E nehenehe oe e ora e a muri noa ˈtu i roto i te paradaiso i nia i te fenua nei, neneihia e te mau Ite no Iehova. Tau mahana i muri iho, matara aˈera te Ite mai te fare maˈi, manaˈonaˈo noa ˈi ma te oto e tei nia iho taua taata ra i to ˈna roi poheraa.

E maha matahiti i muri iho ua rapaauhia te Ite i te hoê fare maˈi ê atu. I reira, piri mai aˈera te hoê taata maˈi ia ˈna e parau atura oia e: “Te haamanaˈo ra anei oe ia ˈu?” O te taata hoi ta ˈna i farerei e maha matahiti na mua ˈtu, te taata i parauhia e e pohe oia! Auê ïa parau hitimahuta e te oaoa i to te taata tauahiraa ia ˈna e te parauraa e: “I teie nei e Ite no Iehova atoa vau!” Ua farii teie taata i te tiaturiraa o te Bibilia no a muri aˈe, ua haapii oia i te Bibilia e te mau Ite no Iehova, e ua pûpû oia i to ˈna oraraa no Iehova. E ere noa ïa e Ite, te rohi atoa nei râ oia i roto i te taviniraa ma te taime taatoa ei pionie tamau a piti matahiti i teie nei.

I roto i teie tupuraa, ua aa te mau huero o te parau mau o tei ueuehia na roto i te hoê pororaa faanaho-ore-hia i roto i te hoê mafatu putapû haere. Te turai ra teie haamaitairaa taa ê e tauturu i te mau taata ia naeahia ia ratou te hoê ite no nia i te parau mau i te mau kerisetiano mau ia tamau noa i te rave i te ohipa pororaa noa ˈtu teie “ati rahi i taua anotau hopea nei.”