Nafea outou ia haamaitai atu â i ta outou mau pure?
E OHIPA otahi mau te pure i roto i te mau faanahoraa here mau a te Atua ra o Iehova. E haru te feia patoi i ta outou Bibilia aore ra e opani oia ia outou ia haere i te mau putuputuraa e te mau hoa i roto i te faaroo, aita hoê aˈe e nehenehe e tapea ia outou ia pure. Eita e nehenehe e tâuˈa ore i te pure. Auê hoi te reira i te mea faufaa e, ia here ïa tatou tataitahi e ia faaohipa rahi tatou i taua haamaitairaa ra. Na te aha e tauturu ia outou ia haamaitai atu â i ta outou mau pure?
E ere te Bibilia i te hoê buka pure. E faataahia mai te hoê buka haapiiraa rahi roa ˈˈe a te huitaata no nia i te pure. I roto noa i te mau Papai Hebera te vai ra fatata e 150 pure. Mea poto vetahi; mea roa vetahi. Ua faahitihia vetahi i mua i te huiraatira aore ra na te taata tataitahi noa, na te mau arii aore ra na te feia i afai-tîtî-hia, i mua i te upootiaraa aore ra i mua i te ati rahi. Mai ia Davida i himene i roto i te Salamo 65:2, e fariu “te mau taata o te mau nunaa atoa” i nia ia Iehova, o “Tei faaroo i te pure.” No te aha te Atua i faaurua ˈi i te feia papai i te Bibilia ia tapao i taua mau anairaa pure maramarama maitai ra?
No te pahono i taua uiraa ra, e hiˈopoa na i te Timoteo 2, 3:16. Te parauhia ra e: “Te mau parau moˈa atoa i papaihia ra e mea faaurua mai ïa e te Atua, e mea maitai ei haapiiraa.” No reira, ua papaihia te mau pure i roto i te Bibilia no te aratai ia tatou, mai te mau parau tohu i roto i te mau Papai, te mau faaueraa tumu, e te aamu. Nafea tatou e faufaahia ˈi i taua mau pure ra?
Na roto i te tuatapapa-hohonu-raa i te mau pure i roto i te mau Papai, e nehenehe tatou e taa i tei faahitihia i roto i te hoê â huru tupuraa e to tatou. E nehenehe tatou e haapii e nafea te hoê pure ia taa ê ia au i te tapao e te huru tupuraa. Hau atu, e ite tatou i te mau faahitiraa parau apî no te arue e no te haamauruuru e e ite tatou i te mau parau mǎrû no ta tatou mau tiaororaa e ta tatou mau taparuraa. Ma te haapoto noa, e nehenehe te mau pure i papaihia i roto i te Bibilia e tauturu ia tatou ia haamaitai atu â i ta tatou iho mau pure.
Ua huti atoa o Maria, te metua vahine o Iesu, i te mau faahitiraa parau i faaohipahia i roto i te mau pure i papaihia i roto i te Bibilia. Ua farerei oia i to ˈna fetii ra o Elisabeta i muri aˈe i to raua hapuraa i te hoê tamaiti e te tauturu a te Atua. Ua pûpû o Maria i te mau arueraa e te mau haamauruururaa i te Atua, e hoê â huru ta ˈna iho mau parau e te mau pure i papaihia i roto i te mau Papai Hebera. Mai te huru ra e ua matau maitai o Maria i te mau pure i faahitihia e Hana, te metua vahine o te peropheta ra o Samuela. Ua noaa atoa ia Hana i te hoê tamaiti na roto i te tauturu a te Atua, hau atu i te 1 000 matahiti na mua ˈˈe. No te reira anei o Maria i feruri hohonu ai i nia i taua mau pure ra no te mea o te reira iho to ˈna mau manaˈo hohonu?—Samuela 2, 2:1-10; Luka 1:46-55.
Eaha ïa no outou? E nehenehe anei outou e haamanaˈo i te mau pure i roto i te Bibilia tei faahitihia i raro aˈe i te tahi mau huru tupuraa tei tuea e ta outou iho e faaruru ra? E tauturu te iteraa, te taioraa, e te feruri-hohonu-raa i nia i taua mau pure ra ia outou ia haamaitai atu â i to outou iho mau taairaa e te Atua. I roto i te tumu parau i muri iho, te titau nei matou ia outou ia hiˈopoa e toru pure no roto mai i te mau Papai Moˈa. Ua pûpûhia na pure tataitahi i roto i te mau huru tupuraa taa ê, peneiaˈe hoê â e ta outou e faaruru ra.