Te faatupuraa i te hoê ohipa e ǒ horoa maitai no ǒ mai i te Atua ra
TE OAOA nei o Iehova i te mau ohipa ta ˈna i poiete. (Salamo 104:31) Ua haapapuhia to ˈna mauruuru hohonu i te ohipa poieteraa i roto i te Genese 1:31: “Hiˈo aˈera te Atua i te mau mea atoa ta ˈna i hamani, e inaha, e mea maitai roa.”
Aita o Iehova i taotia i taua oaoa ra i nia ia ˈna anaˈe. Ua horoa o ˈna i roto ia Iesu i te haamaitairaa no te riro ei rave ohipa na ˈna, aore ra ei mauhaa na ˈna, i roto i te tahi atu mau mea atoa i poietehia. (Ioane 1:3; Kolosa 1:16, 17) Mai te hoê “[rave ohipa aravihi],” ua “oaoa [atoa o Iesu i mua ia Iehova] i te mau mahana atoa ra.”—Maseli 8:30, 31.
Tera râ, e ere to nia anaˈe i te raˈi te parau no te aravihi i te faatupuraa i te hoê ohipa. “Tei roto atoa i te mau taata nei,” ta Eugene Raudsepp ïa i papai i roto i ta ˈna buka How Creative Are You? E ere teie i te parau feruri-noa-hia, inaha ua hamanihia hoi te taata ia au i te hohoˈa o te Atua ra. (Genese 1:26) No reira, ua tuu o Iehova i roto i te huitaata nei i te mau huru aravihi e au i te pae no te faatupuraa i te hoê ohipa.—Iakobo 1:17.
Eita ˈtura ïa e maerehia ia faahiti te Bibilia ma te maitai mau hoi i te parau no te himene, no te ori, no te raraa, te tunu i te maa, no te imi i te ohipa rii nehenehe ra, e te tahi atu mau haaraa i te pae no te faatupuraa i te hoê ohipa. (Exodo 35:25, 26; Samuela 1, 8:13; 18:6, 7; Paraleipomeno 2, 2:13, 14) Ua faaohipa o Bezalela, te hoê taata ohipa aravihi, i to ˈna ite no te “imi i te ohipa rii nehenehe ra” i te pae no te paturaa i te sekene. (Exodo 31:3, 4) O te tiai mamoe ra o Iabala te tumu no te mau fare ie, te hoê hoi teie ohipa e tano maitai no te oraraa aita e mauraa te vahi. (Genese 4:20) E ere noa o Davida i te hoê taata faaoto upaupa e rohipehe, ua faatupu atoa râ oia i te tahi mau upaupa apî. (Paraleipomeno 2, 7:6; Salamo 7:17; Amosa 6:5) Ua faanaho o Miriama i te parau no te oriraa iubili tei faatupu i te oroa o te faaora-semeio-raahia mai te mau ati Iseraela mai roto mai i te Miti Uteute.—Exodo 15:20.
E pinepine te parau no te faatupuraa i te hoê ohipa i te riro ei ohipa maitai roa no te faaite i te haamoriraa mau. Ua faaohipa maite o Iesu i te mau faahohoˈaraa e te mau haapiiraa papu maitai no te faaite i ta ˈna poroi. Ua faaitoitohia ta ˈna mau pǐpǐ ia “ia hau atu râ i tei ohipa i te aˈo e te haapii ra.” (Timoteo 1, 5:17) Oia mau, e ere ta ratou ohipa pororaa i te hoê noa ohipa e ravehia ma te haumani. Ua riro râ ei ohipa aravihi e titau i te mau ravea haapiiraa faanavaihia i te mau ohipa apî. (Kolosa 4:6) Mea faufaa taa ê te reira i roto i te haapiiraa te hoê taata i ta ˈna mau tamarii.—Deuteronomi 6:6, 7; Ephesia 6:4.
No reira, te opere mai nei o Iehova i roto ia vetahi ê i te oaoa ta te faatupuraa i te hoê ohipa e horoa mai no ˈna. Auê ïa ǒ horoa maitai e!