Te mauiui o te taata nei—Aita anei e hopearaa?
MAU tupuraa riaria mau i muri aˈe to te hoê paura paainaraa i roto i te hoê matete no Sarajevo ua î te taata; mau taparahiraa taata e hamani-ino-raa i Rwanda; mau tamarii pohe poia o te ani hua ra i te maa i Somalie; mau utuafare o tei hitimaue rahi i te iteraa ehia rahiraa taoˈa ta ratou i pau i muri aˈe te hoê aueueraa fenua i Los Angeles; feia roohia i te pape pue aita ta ratou e ravea faahou i Bangladesh. Te faaitehia ra teie mau tupuraa mauiui mau o te taata nei i te mau mahana atoa i roto i te afata teata aore ra i roto i te mau vea.
Na te faahopearaa ino mau o te mauiui o te taata nei i turai ia vetahi ia ore e faatupu faahou i te faaroo i te Atua. “Ua faatupu noa te vairaa mai o te ino i te otoheraa rahi roa ˈˈe o te faaroo,” ia au i te hoê tabula neneihia e te hoê pǔpǔ ati Iuda no te mau Hau Amui no Marite. Te faahiti ra te mau taata papai i te feia i pohe i roto i te mau aua tapearaa Nazi mai ia Auschwitz e i te mau paura mai tei paaina i nia ia Hiroshima. “Te faahoruhoru ra te uiraa e nafea te hoê Atua parau-tia e te puai e nehenehe ai e vaiiho noa i te haamouraa o te mau ora hapa ore e rave rahi i te haava manaˈo o te hoê taata faaroo e e mea ahoaho roa,” ta te mau taata papai buka ïa i parau.
Ma te peapea, e nehenehe te mau tabula e ite-pinepine-hia nei no nia i te mau ati ino e faaetaeta i te mau manaˈo hohonu o te taata nei. Mai te peu e e ere te mau hoa e te mau fetii o te roohia ra i te reira, aita te rahiraa e putapû nei i te mauiui o vetahi ê.
Teie râ, e tia i te tupuraa e e nehenehe ta tatou e faatupu i te aroha, no tei herehia ïa e tatou, ia haapii ia tatou i te tahi mea no nia i to tatou Poiete. Te parau ra te Bibilia e ua poietehia te taata “ma te hohoˈa o te Atua” e “ma [to ˈna] iho huru.” (Genese 1:26, 27) E ere ïa te auraa e e au te hohoˈa o te mau taata i to te Atua. Aita, no te mea ua faataa o Iesu Mesia e “e [V]arua te Atua,” e “aita o te varua e iˈo e te ivi.” (Ioane 4:24; Luka 24:39) Te faaite ra te poieteraahia ma te huru o te Atua i to tatou neheneheraa e faatupu i te mau huru maitatai o te Atua. No reira, i te mea e te faatupu nei te mau taata i te aroha no tei mauiui ra, e tia ia tatou ia faaoti e mea hamani maitai te Poiete o te taata nei, te Atua ra o Iehova, e te aroha nei oia i te mau taata ta ˈna i poiete o te mauiui ra.—A faaau e te Luka 11:13.
Ua faaite te Atua i te hoê huru aroha na roto i te horoaraa no te huitaata nei te hoê faataaraa papaihia no nia i te tumu o te mauiui. Ua horoa oia i te reira i roto i ta ˈna Parau, te Bibilia. Te faaite maitai ra te Bibilia e ua poiete te Atua i te taata no te haafaufaa i te ora, eiaha râ no te mauiui. (Genese 2:7-9) Te faaite atoa ra te reira e ua haamauiui te mau taata matamua ia ratou iho na roto i te patoiraa i te faatereraa parau-tia a te Atua.—Deuteronomi 32:4, 5; Roma 5:12.
Noa ˈtu râ te reira, te aroha nei â te Atua i te mauiui o te huitaata nei. Ua faaite-maitai-hia te reira i roto i ta ˈna parau tǎpǔ e afai mai i te hoê hopearaa i te mauiui o te huitaata nei. “Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:3, 4; a hiˈo atoa Isaia 25:8; 65:17-25; Roma 8:19-21.
Te haapapu ra teie mau parau tǎpǔ faahiahia mau e te ara maite ra te Atua i te mauiui o te taata nei e ua ineine oia i te afai mai i te hoê hopearaa i te reira. Eaha mau râ te tumu matamua o te mauiui o te taata nei, e no te aha te Atua i faatia ˈi ia ohipa noa te reira e tae roa mai i to tatou nei mahana?
[Faaiteraa i te fatu o te hohoˈa i te api 2]
Api matamua e api 32: Alexandra Boulat/Sipa Press
[Faaiteraa i te fatu o te hohoˈa i te api 3]
Kevin Frayer/Sipa Press