‘Eiaha outou e oto mai ta te tahi pae e na reira ra’
UA TAPAO aˈe anei ra outou i te huru ia opa te hoê tiare i muri aˈe i te hoê vero? Ia au i te tahi hiˈoraa ua riro te reira ei tupuraa putapû. Tera râ, ua turai te ûa puai i te mau animala e te mau taata e rave rahi—mau poieteraa etaeta aˈe i te mau tiare—no te imi i te vahi tapuniraa. Area râ te tiare e faaea noa oia i reira, e aˈahia oia, ma te faaruru i te mataˈi puai. Teie nei, te vai noa ra ïa, ua opa aita râ i fati, ua faaite oia i te hoê puai tei taa ê rahi e to ˈna unauna. E uiui paha outou e, a faahiahia noa ˈi outou i te reira, e e ite faahou anei ra te tiare i to ˈna ito e e tia faahou anei ra i nia.
Hoê â huru no te mau taata. I roto i teie tau arepurepu, te faaruru nei tatou i te mau vero e rave rau. Te mau fifi i te pae faanavairaa faufaa, te hepohepo, te maˈimaˈi, te pohe o te hoê taata tei herehia—e haamauiui taua mau tupuraa fifi ia tatou paatoa i te hoê taime aore ra te tahi atu, e i te tahi taime e ore roa tatou e nehenehe faahou e ape atu ia ratou mai te tiare tei ore atoa e nehenehe e tatara ia ˈna iho e a horo atu ai e imi i te vahi tapuniraa. E mea putapû ia ite anaˈe i te mau taata e mea paruparu mau ia faaite i te hoê puai maere mau e ia faaruru i taua mau haafifiraa ra. Mea nafea ïa ta ratou? E mea pinepine o te faaroo te taviri. Ua papai o Iakobo te taeae o Iesu e: “Ua ite hoi outou e, na taua tamataraa i to outou faaroo ra e faatupu i te faaoromai tamau.”—Iakobo 1:3.
Te tiaturiraa te tahi atu ïa taviri. Ia roohia te hoê taata o tei herehia i te pohe, ei hiˈoraa, e nehenehe te tiaturiraa e rave i te hoê taa-ê-raa rahi mau i nia i te feia e ora ra. Ua papai te aposetolo Paulo i te mau Kerisetiano no Tesalonia e: “E te mau taeae, aita vau i hinaaro e ia ore outou ia ite i te parau i te feia i mairi te taoto nei, ia ore hoi outou ia taiâ, mai te tahi pae aore o ratou [tiaturiraa].” (Tesalonia 1, 4:13) Ma te papu maitai a oto noa ˈi te mau kerisetiano no te pohe, te vai ra te hoê taa-ê-raa. Te vai ra ia ratou te ite papu no nia i te huru o te taata pohe e no nia i te tiaturiraa o te tia-faahou-raa.—Ioane 5:28, 29; Ohipa 24:15.
Te horoa ra teie ite ia ratou i te tiaturiraa. E, i to ˈna aˈe pae, e tamǎrû taua tiaturiraa ra i to ratou oto. E tauturu oia ia ratou ia faaoromai, e hau atu â. I te hoê taime, mai te tiare i muri aˈe i te vero, e tia mai ratou i nia e e ite ratou i te oaoa e te fanaˈo-faahou-raa i te ora.