‘E mau aa o te ore roa e aueue’
I ROTOPU i te mau mea ora rahi roa ˈˈe e te paari roa ˈˈe e vai ra i roto i te ao nei, o te mau tumu raau sequoia ïa no Kalifonia. E 90 metera te teitei to teie mau pare faahiahia e te roroa ia tae i to ratou paari-roa-raa e e nehenehe ratou e ora hau atu i te 3 000 matahiti.
Noa ˈtu e mea riaria ia hiˈo anaˈe i te hoê sequoia, auê i te faahiahia te tereraa itea-ore-hia e te mata o to ˈna mau aa. Mea parahurahu te mau aa o te sequoia o te nehenehe e poˈi i te hoê vahi e 1,2 aore ra 1,6 ta te rahi. Te horoa ra teie tereraa rahi mau o te mau aa i te hoê vahi haapuraa papu maitai ia tupu te mau pape pue aore ra te mau mataˈi rarahi. E nehenehe atoa ta te hoê sequoia e faaruru i te hoê aueueraa fenua puai mau!
Ua maiti te arii ra o Solomona i te tereraa puai o te mau aa o te hoê tumu raau ei faahohoˈaraa i roto i te hoê o ta ˈna mau maseli. “Aore roa e taata e haapapuhia i te parau ino;” ta ˈna ïa i parau, “e ore râ te aa o te feia parau-tia ra e hautihia.” (Maseli 12:3) E, eita te feia iino e mau maite. E mea poto noa te manuïaraa atoa ta ratou e tutava ra i te faatupu, no te mea te tǎpǔ ra o Iehova e “o tei tiaturihia râ e te paieti ore ra, e mou ïa.”—Maseli 10:28.
E faaararaa teie no te feia e parau ra e e kerisetiano ratou, no te mea ua parau o Iesu e “aore i aahia” i roto ia ratou iho e e maheaitu ratou. (Mataio 13:21) Hau atu, ua papai te aposetolo Paulo no nia i te tahi mau taata o te “taueue-noa-hia e te are ra e o te pee haere noa i te mataˈi o te mau huru haapiiraa [hape] atoa.” (Ephesia 4:14, T.a.a.) Nafea te reira e nehenehe e araihia?
Mai te mau aa o te hoê sequoia e tomo hohonu ra i roto i te repo fenua faufaa mau, e tutava tatou ia nehenehe to tatou feruriraa e to tatou mafatu e paheru ma te hohonu i roto i te Parau a te Atua e e huti mai i te mau pape ora. E tauturu teie hinaaro ia faatupu tatou i te hoê faaroo aa-maite-hia. Papu maitai, e roohia tatou i te mau faahopearaa o te mau tamataraa uˈana. E aueue atoa paha tatou, mai te hoê tumu raau, i mua i te enemi. Mai te peu râ e ua niu-maite-hia to tatou faaroo, e haapapu tatou e e ‘mau aa o te ore roa e aueue’ to tatou.—A faaau e te Hebera 6:19.