Mau papairaa e te hoê auraa taa ê

“IEHOVA SIT TIBI CUSTOS”

TE AURAA o teie mau taˈo papaihia i nia i te patu i mua mai o te hoê fare no te senekele 17 i Celerina, i te pae hitia o te râ o Helevetia, oia hoi “O Iehova to tatou nei paruru.” I taua fenua mouˈa ra, e ere i te mea matauhia ia ite i te iˈoa o te Atua i te taraihia aore ra i te penihia i nia i te mau fare tahito ehia rahiraa senekele, te mau fare pure, e te mau fare perepitero. Mea nafea te roo o te iˈoa o Iehova i te rahiraa?

Ua riro te fenua Rhétie tahito (amui-atoa-hia te mau tuhaa fenua o tei riro i teie nei te pae apatoa hitia o te râ no Helemani, Auteteria, e te pae hitia o te râ no Helevetia) ei mataeinaa Roma i te matahiti 15 hou to tatou nei tau. Ua paraparau atura te mau taata e faaea na i reira i te reo romanche, te hoê reo niuhia i nia i te reo Latino o tei faaohipahia i roto e rave rahi mau reo tei paraparau-noa-hia i roto i te tahi mau afaa no te mau Alpes i Helevetia e i te pae apatoerau no Italia.

I muri aˈe, ua hurihia te tahi mau tuhaa o te Bibilia na roto i te reo romanche. E vai na i roto i te hoê neneiraa, te Biblia Pitschna, te mau Salamo e te mau Papai Heleni Kerisetiano. I roto i teie Bibilia, piahia i te matahiti 1666, e itehia te iˈoa Iehova e rave rahi mau taime i roto i te mau Salamo. I te mea e e mauhaa taioraa matamua na te Bibilia i te fare, ua matau-roa-hia i te mau taata taio i te Biblia Pitschna i te iˈoa o te Poiete.

Teie râ, aita te mau ui no muri mai i anaanatae faahou i te mau mea bibilia. Aita e rave rahi mau taata i haapeapea noa ˈˈe i te imiraa eaha na te auraa o te parau “Iehova,” aita atoa te mau upoo faatere haapaoraa i tutava noa ˈˈe no te tatara i te reira. No reira, ua riro noa ˈtura teie mau papairaa ei mea faanehenehe no te hoê tau tahito.

I roto i na ahuru matahiti aita i maoro aˈenei, ua taui te huru tupuraa. Ua paiuma mai te mau Ite no Iehova no te mau fenua i raro, no te faafaaea i roto i teie mau afaa haviti mau e no te rave i te hoê tutavaraa taa ê no te poro i te mau taata e faaea ra i reira no nia i te Atua oia hoi te iˈoa o Iehova ïa. Ua noho atoa vetahi mau Ite i reira ia nehenehe â ratou e paraparau hau atu â i te mau taata no nia i te mau opuaraa faahiahia mau a te Poiete no te fenua e te taata nei. No reira, te ite nei teie mau taata i te hoê auraa apî o teie mau papairaa romanche tahito a haapii noa ˈi ratou no nia i te Atua ra o Iehova.

[Hohoˈa i te api 32]

IEHOVA PORTIO MEA: O oe ta ˈu nei tufaa, e Iehova.—Hiˈo Salamo 119:57.