“Ua ite ratou i to ˈna reo”

“O IEHOVA to ˈu tiai.” Teie te mau parau haamataraa o te Salamo 23. Te faaau faahou ra te mau Papai i te Atua ra o Iehova ei tiai mamoe i roto i te parau tohu a Isaia, o tei parau e: “E faaamu oia i ta ˈna nǎnǎ mai te tiai mamoe ra; e haaputu oia i te mau fanauˈa rii i roto i ta ˈna rima, e ei roto ratou i tana ouma ia hopoi; e aratai rii maite oia i te mau maiaa faaote pinia ra.”—Isaia 40:11.

Oia atoa, ua faaauhia o Iesu Mesia i te hoê tiai mamoe. Ua parau oia e: “O vau te tiai mamoe maitai. E horoa te tiai mamoe maitai i to ˈna iho ora no te mamoe.” (Ioane 10:11) Ua parau o Iesu e “e faaroo mai te mamoe i to ˈna [to te tiai mamoe] reo, e tao â oia i tana iho mamoe ma te faahiti atu i te iˈoa, e e aratai oia ia ratou i rapae au.” Te parau faahou ra oia e “e pee mai ratou ia ˈna [te tiai mamoe], ua ite hoi ratou i to ˈna reo. E ore ratou e pee i te taata ê, e horo ê ratou i reira, aore hoi ratou i ite i to te taata ê ra reo.”—Ioane 10:2-5.

Ua faaite o te Atua ra o Iehova e ta ˈna tamaiti ra o Iesu Mesia i te hohoˈa i faataahia i roto i te irava i nia nei. Te haapao nei raua i ta raua mau mamoe ma te mǎrû e ma te î i te here. Ei faahopearaa, te ite nei te mau mamoe i te here, te mǎtaˈu ore, e te paruru.

Ua faaauhia ma te tano i taua mau taairaa i rotopu i te mau mamoe mau e to ratou tiai mamoe. Ia hoˈi tatou i te matahiti 1831, ua papai o John Hartley no nia i ta ˈna mau hiˈopoaraa i roto i taua tuhaa ra. Ua tapao oia e i te fenua Heleni e ohipa matauhia e te feia tiai mamoe ia horoa i te iˈoa no ta ratou mamoe. Ia pii-anaˈe-hia na roto i to ratou iˈoa, e pahono mai te mamoe i te reo o te tiai mamoe. E 51 matahiti i muri aˈe, i te matahiti 1882, hoê â hiˈopoaraa i ravehia e J. L. Porter. Ua ite roa o ˈna iho i te mau tiai mamoe “o te faataˈi . . . i te hoê pii teitei taa ê roa” e i pahonohia e te mamoe ma te apee maite e te faaroo i te mau tiai mamoe. I taua atoa matahiti, ua papai o William M. Thomson no nia i te ohipa faahiti-noa-hia o tei haapapu e e nehenehe e haapii i te mamoe ia apee i to ˈna tiai e ia taa i to ˈna reo.

Ua itehia anei taua taairaa taa ê i rotopu i te tiai mamoe e ta ˈna mau mamoe i to tatou nei tau? Oia. I roto i te vea no setepa 1993 o te National Geographic, ua papai te taata ratere ra o Robyn Davidson no Auteralia i te mau parau i muri mai no nia i te mau taata haapao animala no te hoê noa nunaa parauhia Rabari i te pae apatoerau tooa o te râ no Inidia e: “Te vai ra ta te tiai mamoe tataitahi i te hoê pii tei taa ê rii, tauiui ia au i tei titauhia. Te vai ra te pii no te poipoi no te haere i rapae, te hoê pii no te aratai i te mau mamoe ia haere e inu i te pape, e te vai atu â. Ua ite te taata tataitahi i ta ˈna iho mamoe oia atoa te mamoe e ite ra i ta ˈna tiai, e e faarue ta ˈna nǎnǎ taa ê i te nǎnǎ rahi no te tahoê ia ratou e e apee atu ia ˈna i te poipoi.”

Ma te feaa ore, ua haapao o Iesu i tei faataahia e na feia ratere e maha i faahiti-noa-hia. Ua faaite ta ˈna iho mau hiˈopoaraa i te tupuraa mau o ta ˈna faahohoˈaraa o te mamoe o tei ite i to ˈna reo. E mamoe anei oe na Iesu? Ua ite anei oe i to ˈna reo e ua faaroo anei oe i te reira? Mai te peu e e farii outou e e ite outou e e parau mau ta ˈna haapiiraa e mai te peu e e auraro outou i ta ˈna mau faaueraa e e apee i ta ˈna aratairaa i roto i te haamoriraa ia Iehova, i reira outou e ite ai i te tiairaa mǎrû e te here o te Atua ra o Iehova e o ta ˈna Tamaiti ra o Iesu Mesia.—Ioane 15:10.