No te aha e anaanatae ai i te haapaoraa?

I ROTO i te mau nunaa atoa o te fenua nei, te anaanatae nei te taata i te haapaoraa. I te tahi aˈe pae, te vai atoa ra e rave rahi feia o te parau tahaa nei e aita ratou e anaanatae ra i te haapaoraa. Mai te reira anei râ to ratou manaˈo mai mutaa ihora mai â?

Ia au i te natura taata, eita te hoê taata e mauruuru mau e te mau taoˈa materia anaˈe. Te titau nei te taata i te mau mea pae varua. Eita te hoê oraraa o te mau mahana atoa o tei niuhia i nia i te noaaraa mai i te mau mea titauhia i te pae tino, ma te tahi tau faaanaanataeraa i te tahi mau taime, e haamâha taatoa i te mau hinaaro hohonu roa ˈˈe o te hoê taata. Taa ê atu i te mau animala, te hinaaro nei te taata e ite e, ‘Eaha te tumu o te oraraa?’ ‘Teie noa oraraa poto, i reira e itehia ˈi te mau mea nehenehe roa ˈˈe e oia atoa râ te mau mea hairiiri roa ˈˈe, e aita ˈtu anei?’ Aita anei outou i uiui aˈenei i teie mau huru uiraa?

Teie râ, e rave rahi mau mirioni taata o te ora nei i teie mahana o tei paari i roto i te mau huru vahi o tei haaparuparu i te tahi anaanatae mau no te haapaoraa. No ǒ mai paha teie mana haaparuparu i to ratou mau metua, to ratou mau orometua haapii, to ratou mau hoa, aore ra no ǒ atoa mai paha i te faatereraa.

Ua faataa o Skalabrino, te hoê taurearea no Albania, e i raro aˈe i te faatereraa communiste, ua haapiihia te huiraatira e aita e Atua. Hau atu, e mea atâta roa no ratou ia tauaparau no nia i te haapaoraa; ia na reira noa ˈtu ratou, e nehenehe ratou e tapeahia i te fare auri. Teie râ, i te matahiti 1991, tei te fenua Helevetia oia ei taata horo i to ˈna fenua, ua faaauhia maira oia e haapii i te Bibilia. Ua farii oia. No te aha?

Inaha hoi, ua faarooroo oia i Albania i te parau no te Bibilia, tera râ aita oia i ite noa ˈˈe e eaha teie buka. No reira, i te omuaraa, e ere paha na te tahi hinaaro e taa i te Bibilia o tei turai ia ˈna. Noa ˈtu e ua parauhia mai oia e e haapii oia no nia i te opuaraa a te Atua no te huitaata nei e no te fenua, ua manaˈo atoa oia e e ravea te reira no te haamaitai i ta ˈna paraparauraa i te reo o teie fenua. Aita râ i maoro, ua itea mai ia ˈna e te haamâha ra te mea o ta ˈna e haapii ra i te hoê hiaai hohonu puai to ˈna i te pae varua. Ua putapû roa to ˈna mafatu i te parau tǎpǔ a te Atua no te hoê ao apî i reira te hau e vai ai, te hoê ao i reira te taata e nehenehe ai e ora e a muri noa ˈtu e e fanaˈo i te rahiraa o te mau mea atoa e titauhia no te oraraa. Ua hau atu â to ˈna anaanatae i to ˈna iteraa e e nehenehe o ˈna e to ˈna utuafare e ô atoa ˈtu i roto i teie ao apî. I te mea e aita ta ˈna i nehenehe e tapea i teie parau apî oaoa no ˈna anaˈe, ua taniuniu atura oia i to ˈna mau fetii i Albania no te faaite atoa ˈtu ia ratou i teie parau apî.

Ua maere atoa o Aleksei, e ora ra i Rusia, i te faahopearaa ta te ite papu o te Bibilia e nehenehe e faaohipa i nia i te oraraa o te hoê taata. No te rahi o to ˈna mau fifi e aita i itea mai ia ˈna te hoê faataaraa papu no nia i te tumu o te oraraa, ua opua aˈera oia e haapohe ia ˈna iho. Na mua ˈˈe râ, ua haere atu oia i Filelane no te farerei i te hoê hoa. I to ˈna tere na nia i te pereoo auahi, ua faaite oia i to ˈna mau fifi i vetahi atu mau horopatete. Te vai ra te hoê Ite no Iehova i rotopu i teie feia, o tei faaitoito ia ˈna ia haapii i te Bibilia no te mea te horoa ra oia i te mau ravea i taua mau huru fifi ra. Aita o ˈna i tiaturi vave. I to ˈna hoˈiraa, ua farerei faahou oia i te hoê tupuraa mai teie te huru. I teie taime, na te tahi atu Ite i paraparau mai ia ˈna e i faaite mai e ua faaruru atoa oia i taua mau fifi ra tera râ na te Bibilia i tauturu ia ˈna ia faatitiaifaro atu. Ua faaitoito atoa oia ia ˈna ia haapii i te Bibilia. I to ˈna taeraa i te fare, ua taˈi maira te niuniu. O te tahi ïa hoa to ˈna, o te haapii ra e te mau Ite e ua oaoa roa oia. Ua manaˈo atura o Aleksei e peneiaˈe e nehenehe mau iho â ta te Bibilia e horoa mai i te mea o ta ˈna e titau ra, tera râ, ua ite oia e ahiri e eita oia e tauturuhia mai, eita oia e taa i te Bibilia. Ua farii atura oia i te hoê haapiiraa bibilia tamau i to ˈna fare e te mau Ite no Iehova, e ua haamata ˈtura oia i te haere i ta ratou mau putuputuraa. Aita i maoro roa, ua taa ia ˈna no te aha te feia o te faaau i to ratou oraraa i nia i te mau haapiiraa a te Bibilia e oaoa ˈi, noa ˈtu e te farerei atoa nei ratou i te mau fifi i matauhia e te mau taata atoa.

Ma te ite papu i te natura taata nei, ua faaite o Iesu Mesia e: “Eita te taata e ora i te pane anaˈe.” (Mataio 4:4, The New English Bible) Ua parau atoa oia e: “E ao to tei ite i to ratou mau hinaaro i te pae varua.” (Mataio 5:3, T.a.a.) Te oaoa nei ratou no te mea ua taa maitai ia ratou i to ratou hinaaro, te rave nei ratou i te mau taahiraa avae e tano no te haamâha ˈtu, e te fanaˈo nei ratou i te haamaitairaa a te Atua. Teie râ, eita to tatou hinaaro i te pae varua e haamâha-noa-hia na roto i te apitiraa ˈtu i roto i te hoê ekalesia aore ra te haereraa ˈtu i te tahi mau oroa pureraa. Peneiaˈe te haaputapû ra te hoê haapaoraa o tei niuhia i te mau oroa i te mau manaˈo horuhoru, teie râ te horoa maira anei oia i te mau ravea papu no te arai i te mau fifi o te oraraa? Noa ˈtu e te paruru nei te hoê haapaoraa i te tahi mau haapiiraa tumu maitatai, mai te peu e mea hape ta ˈna faataaraa no nia i te tumu mau o te oraraa, e haamâha anei oia i to outou hinaaro i te pae varua? E te mea faufaa roa ˈtu â, maoti te faaohiparaa i teie huru haapaoraa, e noaa mai anei te mau taairaa maitatai e te Atua? Mai te peu e eita e noaa mai, e erehia ïa i te mauruuru mau.

I roto i teie tuhaa, e rave rahi mau taata o te maimi ra i te tahi mea o tei ore atura i itea mai ia ratou.

[Hohoˈa i te api 3]

E mâha anei to outou mau hinaaro i te pae varua na roto i te apitiraa ˈtu i roto i te hoê ekalesia?

[Hohoˈa i te api 4]

E rave rahi tei itea mai e, ia taa anaˈe ratou i te Bibilia, e auraa apî to to ratou oraraa