Faufaa roa ˈtu â i te toˈa

Mea rahi te feia mataitai o tei putapû roa i mua i te mau hohoˈa mai teie i roto i te mau pape o te Miti Uteute.

E ohipa maere te mau rahiraa iˈa ma te mau peni huru rau o te anuanua no te feia e hopu na raro i te mau pape ateate. A hiˈo na râ e na te pihai iho i te mau iˈa peni rau e itehia ra i ǒ nei, te vai ra te hoê faaiteiteraa o te tahi atu mau taoˈa faahiahia no raro i te miti o te huti i te mata, oia atoa hoi te mau toˈa peni anapanapa.

Ua rau te huru o te mau hohoˈa e te mau peni o te mau toˈa haviti mau. Mai ta outou e ite, i te mau tau tahito atoa, e haafaufaa-rahi-hia na te mau toˈa iti unauna. E hamani na te feia rima î i te mau taoˈa faanehenehe i teie mau toˈa, e ua faahiti te feia papai bibilia i te mau toˈa apitihia e te auro, te ario, e te mau ofai piru. (Maseli 3:14, 15; Ezekiela 27:16) Te tauturu nei râ taua feia papai ra ia ite hau atu i te nehenehe e te faufaa o te mau toˈa iho.

Ua haamatara ratou e e mea faufaa roa ˈtu â vetahi mau mea e e tia ia tatou ia poihere hau atu â i te reira. Hoê o taua mau mea ra, o te hoê ïa vahine maitai e te aravihi: “O vai te taata ua itea ia ˈna te vahine maitai ra? e ore te mau [toˈa] nei e au ia ˈna.” (Maseli 31:10) E taata faaipoipohia anei outou? A hiˈo faahou na i te mau toˈa haviti i ǒ nei, e a feruri mai te peu e te haafaufaa ra anei outou i ta outou vahine mai te tia iho â.

Noa ˈtu e e tane tatou aore ra e vahine, ua faaipoipohia aore ra te faaea taa noa ra, e tia i te hiˈoraa ˈtu i te mau toˈa unauna ia tauturu ia tatou ia taa i te faufaa rahi atu â o te paari, te maramarama, e te ite a te Atua. Te na ô ra te Parau a te Atua e: “E ao to te taata i noaa ia ˈna te paari; te taata i noaa ia ˈna te ite ra! O te taoˈa hoi e hoona ˈi oia ra, e maitai rahi ïa i to te ario ra, e ia rahi hoi oia ra, e maitai rahi ïa i to te auro maitai ra. E maitai rahi to ˈna i to te [toˈa]; e te mau mea atoa i hinaarohia ra, e ore roa ïa e au ia ˈna.”—Maseli 3:13-15; 8:11.

No reira, noa ˈtu e e ite atu tatou ia hopu tatou i raro i te miti aore ra i nia i te hoê hohoˈa, e tia i te mau toˈa o te Miti Uteute ia faatupu i roto ia tatou i te manaˈo no te nehenehe e te tumu no te feruri-maite-raa ia maitai tatou.