Te faatia ra te feia poro i te Basileia

“E ore te Atua e haapao i te huru o te taata”

AHURU ma iva hanere matahiti i teie nei, ua parau te aposetolo i faauruahia ra o Petero e: “E ore te Atua e haapao i te huru o te taata. O tei mǎtaˈu ra ia ˈna, e o tei rave i te parau-tia i te mau fenua atoa ra, o te itehia mai ïa e ana.” (Ohipa 10:34, 35) I rotopu i te mau Ite no Iehova, te itehia ra te mau taata no te mau huru nunaa e haapaoraa atoa. Te hiaai nei ratou i te parau-tia, e te mǎtaˈu nei ratou i te Atua. Te farii nei Iehova ia ratou paatoa i roto i te totaiete a te ao apî, mai ta ˈna i rave no te hoê vahine no Tchad.

Aita teie vahine i mauruuru i ta ˈna haapaoraa. Tau matahiti na mua ˈtu, ua farii oia i te buka Votre jeunesse—Comment en tirer le meilleur parti, neneihia e te mau Ite no Iehova, e ua au roa o ˈna i te mau aˈoraa maitatai e vai ra i roto. Ua haamata oia i te haapii i te Bibilia, e aita o ˈna i mairi aˈe i ta ˈna haapiiraa. Teie râ, i to ˈna faaitoitoraahia e haere i te mau putuputuraa i te Piha no te Basileia, aita oia i tae mai. No te aha? Noa ˈtu e aita ta ˈna tane i patoi i ta ˈna haapiiraa, aita oia i faatia ia ˈna ia haere i te mau putuputuraa i te Piha no te Basileia.

I to te vahine hinaaroraa e haere i te tairururaa haaati, ua faaite aˈera te Ite e faatere ra i te haapiiraa i te porotarama i te tane, ma te haamatara i te mau aˈoraa maitatai e vauvauhia ˈtu. Ua farii atura oia e ia haere ta ˈna vahine “hoê noa taime.” Ua haere atura oia e ua oaoa roa oia i te porotarama. I muri aˈe i to ˈna faataaraa ˈtu i ta ˈna tane i te mea o ta ˈna i haapii, aita ˈtura oia i patoi faahou e ia haere oia i te tahi atu mau putuputuraa. Ua maere roa oia i te mea e i roto i te amuiraa, te vai ra te mau taata no te mau nunaa ěê o te haapao hohonu ra i te tahi e te tahi. I muri aˈe, ua haere atura oia i te tairururaa mataeinaa e ua putapû roa oia i te iteraa i ta ˈna mau tamarii i te parahiraa i nia i te turi o te mau Ite no te tahi atu mau fenua. Ua vahi te mau Ite i ta ratou maa e ta ˈna mau tamarii e ua rave ratou mai te mea e e fetii ratou. Tera te mea i turai ia ˈna ia taui.

Ua tupu mai râ te patoiraa. Noa ˈtu to ˈna huru mamahu, ua haamata ˈtura oia i te pahono i te mau putuputuraa e i te faaruru i te mau parau faaino a to ˈna mau fetii e to ˈna mau hoa. Noa ˈtu e e rave rahi matahiti to ˈna faaearaa e ta ˈna tane, ua faaau noa raua i to raua faaipoiporaa ia au i tei matauhia aita râ i haamanahia. Nafea râ oia ia ani e ia faaipoipo raua i mua i te ture? I muri aˈe i to ˈna pure-hohonu-raa ia Iehova, ua paraparau atura oia i ta ˈna tane, e ua parau maira oia e e tamata o ˈna i te hiˈo e nehenehe anei. Ua na reira ˈtura oia, e ua faaipoipo ihora raua i mua i te ture.

Ua faatupu te hoê taoete vahine e ora ra ia raua ra e rave rahi mau fifi, tera râ, ua turu atu te tane i ta ˈna vahine. I muri iho, ua haere mai te metua tane o te tane e hiˈo ia raua. Ua faaue atura oia i ta ˈna tamaiti ia faataa i ta ˈna vahine, no te mea ua taui o ˈna i ta ˈna haapaoraa. Ua parau te metua tane i ta ˈna tamaiti e e aufau oia i te taoˈa faaipoiporaa no te hoê “vahine maitai aˈe.” Ua pahono atura te tamaiti e: “Eita, eita vau e na reira. E vahine maitai o ˈna. Mai te peu e na ˈna e hinaaro e haere, e mea taa ê ïa, tera râ, eita vau e parau atu ia ˈna ia haere.” Mea maitai roa te vahine i nia i to ˈna metua hoovai tane, e ua haama ˈtura oia i to ˈna haerea. Teie râ, i to ˈna hoˈiraa ˈtu i to ˈna oire iti, ua papai atu oia i ta ˈna tamaiti, i teie râ taime, ma te horoa ˈtu i te hoê maitiraa. Ua parau oia e mai te peu noa ˈtu e e patoi ta ˈna tamaiti i te faahoˈi i ta ˈna vahine, e ere faahou oia ei tamaiti na ˈna. I reira faahou, ua turu atu te tamaiti i ta ˈna vahine. A feruri na i te oaoa o te vahine i to ˈna iteraa i ta ˈna tane i te raveraa i teie tiaraa papu.

I teie nei, mea au roa na ta raua e piti tamaiti nainai ia haere i te Piha no te Basileia na muri iho i to ratou metua vahine. Ua ani atoa raua i te mau taamu arapoa i to raua metua tane, no te mea ua ite raua e e taamu arapoa to te mau taeae atoa o tei horoa i te mau oreroraa parau. I teie mahana, ua riro teie vahine ei tuahine bapetizohia.

Tei roto oia i te mau 345 Ite oaoa no Tchad e faaite ra i te parau apî maitai o te Basileia o Iehova e o te mauruuru nei i te mea e, ma te parau mau roa, “e ore te Atua e haapao i te huru o te taata.”