O vai te tiaturi i te mau varua iino?
TE TIATURI ra anei outou e e nehenehe te mau varua itea-ore-hia e ohipa i nia i to outou oraraa? E rave rahi o te pahono papu mai e aita. Noa ˈtu e te farii ra ratou e te vai ra te Atua, aita ratou e tiaturi ra e te vai ra te mau varua iino hau aˈe i te taata.
Te tahi tumu o te tiaturi-ore-raa i te mau varua tei parare na te pae Tooa o te râ, o te mana ïa a te amuiraa faaroo kerisetiano, o tei haapii i roto i te mau senekele e, o te fenua te pu no te ao o te reva, e tei ropu oia i te raˈi e te po auahi. Ia au i teie haapiiraa, ua fanaˈo te mau melahi i te oaoaraa o te raˈi area te mau demoni ra, na ratou ïa i haapao i te po auahi.
Maoti te mau ohipa apî i itehia mai i te pae no te ite aivanaa o tei aratai i te taata ia patoi i te mau manaˈo hape no nia i te faanahoraa o te ao o te reva, aita ˈtura te tiaturiraa i te mau mea ora varua i tâuˈa-faahou-hia. Te faataa ra Te buka parau paari beretane apî (beretane) e: “I muri aˈe i te tauiraa rahi a Copernic i te senekele 16 ra (niuhia i nia i te mau tatararaa a te taata Polonia tuatapapa i te reva ra o Copernic), e faataa ra . . . e e ere faahou te Fenua i te pu o te reva tera râ hoi, e palaneta noa oia i roto i te faanahoraa o te mahana o tei riro ei tuhaa haihai roa o te hoê haapueraa fetia i roto i te hoê reva otia ore—aita ˈtura e faufaa faahou to te parau no te mau melahi e te mau demoni.”
Noa ˈtu e mea rahi o te ore e tiaturi nei i te mau varua iino, e mau mirioni taata o te tiaturi nei i te reira. E tuhaa faufaa roa to te mau melahi iino i roto e rave rahi mau haapaoraa, to mutaa ihora e to teie nei tau. Taa ê atu i to ratou tiaraa feia faaino i te huru pae varua, te manaˈohia nei e, o teie mau melahi iino te tumu o te mau ati, mai te tamaˈi, te oˈe, e te mau aueueraa fenua, e na ratou atoa e faatupu nei i te maˈi, te mau fifi i te pae feruriraa, e te pohe.
O Iblis te iˈoa e piihia nei e te mau Mahometa i te Diabolo ra o Satani, te varua ino matamua i roto i te haapaoraa kerisetiano e te haapaoraa ati Iuda. I roto i te haapaoraa peresia tahito o te Zoroastrisme, o Angra Mainyu to ˈna iˈoa. I roto i te haapaoraa Gnostique, o tei uˈana i te mau senekele piti e te toru o to tatou nei tau, o ˈna ïa te Demiurge, e parau teie i mairihia i te hoê atua pohehae e te haehaa aˈe, o ˈna ta te pae rahi o te huitaata nei e haamori ra ma te ite ore.
Te faahiti-rahi-atoa-hia nei te mau varua iino iti aˈe i roto i te mau haapaoraa no te pae Hitia o te râ. Te tiaturi nei te mau Hindous e te aro nei te mau asuras (demoni) i te mau devas (atua). Te mau asuras mehameha roa ˈˈe, o te mau rakshasas ïa, e mau varua hairiiri o te hahaere nei na roto i te mau menema.
Te manaˈo nei te mau Bouddhistes e, te mau demoni, e mau puai ïa e huru taata to ratou o te haafifi nei i te taata ia tapae i te Nirvana, oia hoi te haapoheraa i te mau hinaaro atoa. O Mara te faahema matamua i rotopu ia ratou, e ta ˈna e toru tamahine o Rati (Hinaaro), Raga (Navenave), e Tanha (Faahuehue).
Te faaohipa nei te feia haamori Tinito i te mau auahi, te mau tiarama, e te mau ahi tiri no te paruru ia ratou i te kuei, oia hoi te mau demoni o te natura. Te tiaturi atoa nei te mau haapaoraa Tapone i e rave rahi mau demoni, oia atoa te tengu riaria, e mau varua o te faauru nei i te taata e o te tiavaruhia e te hoê tahuˈa.
I roto i te mau haapaoraa aita ta ratou e papai, i Asia, Afirika, Oceania, e te mau fenua Marite, te tiaturihia nei e e tauturu mai aore ra e faaino mai te mau varua ia au i te mau tupuraa e to ratou huru. Te faahanahana nei te taata i teie mau varua no te ape i te ati e no te haamaitai mai ia ratou.
Ia apitihia mai i teie mau mea atoa te anaanatae rahi i te peu tahutahu e te ohipa hiˈohiˈo, e ite-papu-hia e e aamu roa e te parare to te tiaturiraa i te mau varua iino. Tera râ, e mea tano anei ia tiaturi e te vai mau ra teie mau varua? Te na ô ra te Bibilia e te vai mau nei ratou. Teie râ, mai te peu e te vai ra ratou, no te aha te Atua e faatia ˈi ia ratou ia mana mai i nia i te taata no te haamauiui ia ˈna?