Mai te mau apara auro ra

TE MAU apara—auê te au ia hiˈo e ia amu e! Te faaohipa ra te Bibilia i teie maa au mau i roto i te hoê faahohoˈaraa o te haaputapû i te feruriraa i to ˈna parauraa e: “Mai te [apara] auro i roto i te vairaa ario ra, o te parau ïa ia parauhia i te taime mau ra.” (Maseli 25:11) Eaha te auraa o teie parau?

Te faahiti ra paha ‘te apara auro i roto i te vairaa ario ra’ i te hoê taoˈa taraihia, mai te hoê farii ario nanaˈohia e maa auro to roto. I te mea e te faahiti ra te mau irava na mua ˈtu i roto i teie pene i te farereiraa e te hoê arii, te faaau ra paha teie irava i te mau taoˈa horoa i pûpûhia na te hoê arii—te mau taoˈa unauna auro mai te apara te hohoˈa i tuuhia i nia i te mau farii ario. (Maseli 25:6, 7) Auê te nehenehe e!

Hoê â nehenehe to te mau parau e tano, te tura, faahitihia i te tau mau ra, noa ˈtu e mea papaihia anei aore ra mea parauhia. E mea au mau, te faaitoito, e te maitai i roto e rave rau mau ravea. O te mau parau iho â râ i faauruahia e te Atua e vai ra i roto i te Bibilia tei riro mai te mau ‘apara auro i roto i te vairaa ario ra.’

Ia au i tei faahohoˈahia i roto i te parau paari a te Arii ra o Solomona i roto i te Maseli 25:11, ‘ua tutava oia ia itea mai te mau parau au maitai e te huru papairaa i te mau parau mau papu maitai.’ (Koheleta 12:10; Maseli 25:1) E mau senekele i muri iho, ua papai te aposetolo kerisetiano ra o Paulo e: “Te mau parau moˈa atoa i papaihia ra e mea faaurua mai ïa e te Atua, e e mea maitai.” (Timoteo 2, 3:16) Oia mau, te vai ra i roto i te Bibilia, te mau aˈoraa, te mau parau tohu, te mau parau faahohoˈaraa, e te mau parau mau maitatai î i te hanahana e te nehenehe o tei hau aˈe i te mau taoˈa a te feia hamani aravihi roa ˈˈe. Hau atu, e noaa mai i te taata atoa e imi i te paari no roto i te Parau a te Atua ra, te Bibilia, te taoˈa hau aˈe i te faufaa e e nehenehe oia e atuatu i te tiaturiraa o te ora mure ore.—Maseli 4:7-9; Ioane 17:3.