Te faatia ra te feia poro i te Basileia
Te faaturaraa i te huru moˈa o te ora
TE FAAITE ra te Bibilia e mea faufaa roa te toto i mua i te aro o te Atua e e faautua mau â oia ia ore te reira ia faaohipa-maitai-hia. (Levitiko 17:14; Ohipa 15:19, 20, 28, 29) No taua mau faaueraa a te Bibilia ra te mau Ite no Iehova e ore ai e farii i te mau pâmuraa toto.
No te tauturu i te mau taote e te mau utuutu maˈi ia taa maitai ratou i te tiaraa faaroo o te mau Ite no Iehova no nia i taua tuhaa ra e ia taa ia ratou e e farii te mau Ite i te tahi atu mau huru rapaauraa, ua faanaho te Taiete Watch Tower i te tahi mau Tomite e tuati i te mau Fare maˈi, i roto e rave rahi mau fenua. Ua haere atu te mau melo o teie mau tomite e farerei i te mau fare maˈi no te paraparau atu i te mau utuutu maˈi. Aita i maoro aˈenei, i roto 12 oire o te fenua Polonia, hau atu i te 200 mau putuputuraa i tupu, e hau atu i te 500 taote, te mau tia iho â râ o te tahi mau fare maˈi (cliniques) i ruru mai. Teie te tahi mau ohipa i tupu i roto i te hoê o taua mau tere ra:
“Ua riro te hoê putuputuraa i tupu i te Clinique e haapao i te parau no te tâpûraa i te mafatu i Zabrze, ei ohipa faahiahia roa. Inaha, mai te matahiti 1986 ra, ua tâpû te hoê pǔpǔ no taua clinique ra i to tatou mau taeae ma te ore e faaohipa i te toto. E tae roa mai i teie nei, e 40 o taua mau tâpûraa ra i ravehia. Ua ineine teie fare maˈi i te farii i te mau taata maˈi no Polonia taatoa e te mau fenua tapiri mai. I muri aˈe i te hoê tauaparauraa e 50 minuti, ua farii te hoê melo e faatere i te hoê fare maˈi i te tahi mau melo o te Tomite e tuati i te mau Fare maˈi e haapao i te hoê pǔpǔ feia maˈi e ua na ô e: ‘E mau Ite no Iehova teie mau taata. Te tahoê mai nei ratou i ta tatou fare maˈi, e te tauturu mai nei ratou ia tatou. Eiaha noa to ratou mau taeae, o te tahi atoa râ mau taata maˈi te nehenehe e fanaˈo i ta ratou tauturu. Maoti te mau Ite no Iehova i papu ai ia matou e e nehenehe te parau no te tâpûraa i te mafatu e faatupuhia ma te ore e faaohipa i te toto.
“‘Ei hiˈoraa, ua tâpû matou i teie vahine [ua tohu atu o ˈna i te hoê o ta ˈna mau taata maˈi] ma te ore e faaohipa i te toto e i te monire, ua hoˈi o ˈna i te fare. Te hinaaro nei au e haapapu e e varavara roa matou i te faaohipa i te toto, eiaha mai mutaa ihora inaha, mea atâata roa. E nehenehe hoi te HIV e te hépatite e roaa e eita atoa te maˈi e ora oioi.
“‘E katolika vau, i roto râ i to matou utuafare, mea farii roa na matou i te mau manaˈo o vetahi ê. I te hoê mahana, te oriori noa ra vau na te Tahua taaroraa no Slaskie e ta ˈu mau tamarii. Aita roa ˈtu teie tahua taaroraa e haapao-maitai-hia ra, i teie nei râ ua tapao maitai matou i te tahi tauiraa. Ua ani atura vau i te hoê o te mau rave ohipa, mea nafea teie tauiraa i te tupuraa. Ua pahono maira o ˈna e aita te feia haapao i teie tahua taaroraa e tiaturi faahou ra e rave maitai i teie tahua, ua tarahuhia i te mau Ite no Iehova e te faaapî ra ratou.
“‘Inaha, e nehenehe tatou e haapii rahi mai i teie mau taata. Te manaˈo nei au e i roto i teie nei fare maˈi, ia farii atoa tatou i te manaˈo o vetahi ê e tia ˈi.’ I muri aˈe, ma te tohu i te hoê Ite o te tâpû tau mahana i muri iho, te na ô ra oia e: ‘E Ite no Iehova teie vahine, e e tâpûhia o ˈna ma te ore e faaohipa i te toto.’”
A ore noa ˈi te mau Ite no Iehova e tamata i te faahepo i to ratou mau tiaturiraa i te tahi pae, te pee nei ratou iho i te hiˈoraa o te mau aposetolo oia hoi o te “Atua ta [ratou] e faaroo e tia ˈi eiaha te taata.” (Ohipa 5:29) Te auraa ra e tia ïa te toto ia faaturahia. Mea faahiahia roa na ratou ia faatura mai vetahi pae i to ratou mau tiaturiraa faaroo e vai ra i roto i teie nei vea.