Ua haafaufaa-rahi-roa-hia anei te mau pâmuraa toto?

E ohipa matauhia te mau pâmuraa toto i roto i te toroa rapaauraa i teie nei tau, teie râ, ua riro mau anei ratou ei ravea maitai mai tei manaˈohia ra? Eaha to outou manaˈo?

I roto i te vea The American Journal of Medicine (febuare 1993), ua ani te taote ra o Craig S. Kitchens e: “Ua haafaufaa-rahi-roa-hia anei te mau pâmuraa toto?” Ua tapao mai oia e mea pinepine te mau taote i te faito mai te peu e ua hau atu anei te maitai o te hoê ravea rapaauraa i to ˈna atâta. Eaha ïa no te mau pâmuraa toto?

Ua hiˈopoa faahou o Kitchens i te mau haapapuraa apî o te mau atâtaraa e rave rahi i taaihia e te mau pâmuraa toto, mai te maˈi upaa hépatite, te faainoraa o te ravea parururaa, te haperaa o te tereraa o te mau melo o te tino, e te patoiraa te tino i te tahi poˈiraa. “Ua faaoti” te hoê maimiraa e haapoto ra “i te mau muriadi haafifiraa” no roto mai i te mau pâmuraa toto e “te vai ra te taatoaraa e 20 % manuïaraa e ia tupu te tahi patoiraa o te tino i muri aˈe i te pâmuraa tataitahi, e mea haihai vetahi, e mea ino râ vetahi,” e e nehenehe roa te taata e pohe.

Teie râ, e mea hoona mau anei ia faaruru i teie mau atâtaraa no te fanaˈo i te mau maitai e parau-noa-hia ra?

Ua hiˈopoa faahou te taote Kitchens e 16 maimiraa i rotopu e 1 404 tâpûraa i nia i te mau Ite no Iehova, o te patoi nei i te mau pâmuraa toto no te auraro i te faaueraa a te Bibilia ‘e haapae i te toto.’—Ohipa 5:28, 29.

Te faahopearaa? “Na roto i te faaotiraa a te mau taata maˈi Ite no Iehova e patoi i te pâmuraa i roto i te mau tâpûraa rahi, e au ra e 0,5 % tae atu i te 1,5 % faito poheraa hau atu i nia i te taatoaraa o te atâtaraa o te tâpûraa. Mea papu ore aˈe te faito maˈi e te poheraa o te apehia na roto i teie raveraa, mea papu râ e e hau atu teie mau faito i te atâtaraa ia ore ia pâmuhia.” (Na matou e papai faaopa nei.) To ˈna manaˈo? Mea iti aˈe te atâtaraa ia patoi i te toto i te atâtaraa e noaa mai na roto i te fariiraa i te mau pâmuraa toto.

Teie ïa te uiraa tano roa a Kitchens: “Mai te peu e e aita i rahi roa ˈtu te mau maˈi e te poheraa ia ore anaˈe te mau Ite no Iehova e pâmuhia i te toto e e ape atoa te reira i te mau haamâuˈaraa e te mau haafifiraa rahi, e tia anei ia faaitihia mai te mau pâmuraa toto i nia i te feia maˈi?”

E ohipa atoa te feia e patoi nei i te mau pâmuraa toto ia au i teie huru haapapuraa, ma te pee i te mau faaueraa a to tatou nei Poiete.