Ua faaura ê na anei outou i te hoê ururaau i te auahi?

AITA, o ta outou paha e pahono mai. Heru na râ! Oia paha. A faaroo na i te mau parau a te pǐpǐ ra o Iakobo: “Oia atoa te arero nei, e melo iti haihai ïa, e faaahaaha rahi râ ta ˈna. A hiˈo na i te rahi o te vahie e amâ i te auahi iti haihai ra!”—Iakobo 3:5.

E melo faufaa roa te arero no te paraparau, mea pinepine râ oia i te faaohipa-hape-hia! Te faaohipa nei te taata i te arero no te haavare e no te faaino. Te faahapa etaeta nei ratou ia vetahi ê, te vavahi nei i to ratou roo, e te taviri nei ia ratou. Te faaohipa nei te feia faahuehue i te arero no te faatupu i te mau orureraa hau. Ua faaohipa o Adolf Hitler i to ˈna arero no te haaputuputu i te nunaa no te tamaˈi—e ‘auahi ururaau’ mau â!

E nehenehe atoa te feia e mau hinaaro maitatai to ratou e faatupu i te tahi mau ‘auahi ururaau’ iti. Aita anei outou i faahiti aˈenei i te tahi parau o ta outou i tatarahapa oioi noa? Mai te peu e e, ua taa ïa ia outou i te auraa o te mau parau a Iakobo i to ˈna faaiteraa e: “Area te arero nei, aore ïa e taata e vi ai te reira.”—Iakobo 3:8.

Noa ˈtu râ, e nehenehe tatou e tutava i te faaohipa maitai i to tatou reo. Mai te papai salamo, e nehenehe e parau ma te papu e: “E haapao â vau i to ˈu ra mau haerea, ia ore tau arero ia hara.” (Salamo 39:1) Maoti i te paraparau ino no nia ia vetahi ê, e nehenehe tatou e tutava i te faaitoito ia ratou. Maoti i te faaino i te taata, e nehenehe tatou e faahiti i te parau maitai no nia ia ratou. Maoti i te haavare e i te taviri, e nehenehe tatou e faaite i te parau mau e e haapii atu. Ia turaihia e te hoê mafatu maitai, e nehenehe te arero e faahiti i te mau parau faahiahia o te rapaau. Ua faaohipa o Iesu i to ˈna arero na roto i te hoê ravea nehenehe no te haapii i te taata no nia i te faaoraraa.

Oia mau, “tei te arero te pohe e te ora i te vairaa.” (Maseli 18:21) E arero pohe aore ra e arero ora anei to outou? Te faaama ra aore ra te tupohe ra anei oia i te mau ‘auahi ururaau’? Ua pure te papai salamo i te Atua e: “E parau hua tau arero i ta oe ra parau: e mea tia hoi te mau parau atoa na oe ra.” (Salamo 119:172) Mai te peu e e faatupu tatou i te haerea o te papai salamo, e faaohipa maitai atoa tatou i to tatou arero.

[Faaiteraa i te fatu o te hohoˈa i te api 32]

U.S. Forest Service photo