Te pape ora

“O TEI faaroo ra, a parau atoa oia e, E haere mai. E o tei poihâ ra, a haere mai. E tei hinaaro ra, a rave noa mai oia i te pape ora.” (Apokalupo 22:17) “Te pape ora”—oia hoi te mau faanahoraa atoa i ravehia e te Atua ia ora tatou tei niuhia i nia i te tusia o te hoo a Iesu Mesia. Te vai nei teie mau faanahoraa, e mea tamoni ore. Auê ïa huru horoa maitai no ǒ mai i to tatou Atua ra! No te aha râ e faataipehia ˈi i te pape?

Maoti te pape mau e nehenehe ai te mau raau e tupu i roto i te repo, e mea na reira atoa te taata e nehenehe ai e ora. Aita anaˈe e pape, eita atoa ïa te mau raau e ora, e eita atoa te taata e ora. Hau atu, te vai nei e 65 i nia i te hanere rahiraa pape i roto i to tatou tino. Te parau nei te tahi mau taata aravihi i te pae no te oraora maitai e e nehenehe e tapea i taua faito ra na roto i te inuraa tau 2,4 litera pape i te mahana. Te titau nei te mau tereraa ora atoa i roto i to tatou nei tino—mai te tereraa o te maa e tae atu i te faarueraa i te mau taoˈa iino—i te pape. Ia ore outou e inu hoê hebedoma taatoa, e pohe outou.

Oia atoa, maoti “te pape ora” e nehenehe ai e atuatu i to tatou ora pae varua. Mai te peu e e patoi tatou i te pape ora, aita ïa to tatou ora no a muri aˈe. (Ioane 3:36) Mai te peu e e farii tatou, e nehenehe ïa e noaa mai ia tatou te ora mure ore. Eita ïa e maerehia i te mea e ua farii oioi te vahine Samaria i to Iesu parauraa ˈtu ia ˈna e: “Area te inu i te pape e horoahia ˈtu e au nei, e ore roa ïa oia e poihâ faahou, e riro râ taua pae e horoahia ˈtu e au na ˈna ra, ei pape pihaa i roto ia ˈna iho, e tia i te pihaaraa e tae noa ˈtu i te ora mure ore ra”! (Ioane 4:14) Ia titau ru atoa tatou no te rave mai i te pape ora, e tia ˈi.

[Faaiteraa i te fatu o te hohoˈa i te api 32]

Garo Nalbandian