“Te hoê tapao no nia i te raˈi”

TE NA ô ra te hoê parau tahito e: “Ia ura te raˈi i te ahiahi, e oaoa te ihitai,/Ia ura te raˈi i te aahiata, auê te atâta.” I teie mahana, te faaohipahia nei te mau taoˈa peeutari, te mau tabula anuvera numerahia e te mau matini roro uira aravihi, te mau radio hiˈohiˈo Doppler, e te tahi atu mau ravea aivanaa no te faaite atea i te huru o te mahana. Mea pinepine te mau faaiteraa no teie nei tau i te tuea e te parau tahito i faahitihia ˈtu nei.

Ua ani mai te mau enemi faaroo o Iesu Mesia ia ˈna i “te hoê tapao no nia i te raˈi,” oia hoi te hoê tapao huru ê no te haapapu e o ˈna te Mesia. Ua na ô atura oia e: “Ia tae i te ahiahi ra, te parau na outou e, E riro i te raumai, e raˈi uraura. E ia poipoi ra, e verohia auanei; te uraura nei hoi te raˈi e te rumaruma. E te mau haavare e, te ite na outou i te hiˈo i te huru o te raˈi, aita râ outou e ite i te mau tapao o teie nei anotau? E titau râ te ui taata iino e te faaturi i te tapao; aita râ e tapao e horoahia ˈtu, maori râ te tapao i te peropheta ra ia Iona.”—Mataio 16:1-4.

E nehenehe te mau enemi o Iesu e tohu i te huru o te mahana, aita râ i naeahia ia ratou ia ite i te auraa o te mau ohipa pae varua. Ei hiˈoraa, eaha ‘te tapao a Iona’? I muri aˈe i to ˈna faaearaa e toru mahana i roto i te opu o te hoê iˈa rahi, ua poro te peropheta a te Atua ra o Iona i Nineve e ua riro maira oia ei tapao no taua oire pu ra no Asura. Ua noaa i te ui o Iesu i ‘te tapao a Iona’ i to te Mesia faaearaa e toru mahana i roto i te hoê menema e ua faatiahia mai oia. Ua faaite haere ta ˈna mau pǐpǐ i te parau haapapuraa o teie ohipa, e ua riro ïa o Iesu ei tapao no taua ui ra.—Mataio 12:39-41.

I te tahi atu taime, ua ani atu te mau pǐpǐ a Iesu ia ˈna i “te tapao” o to ˈna ‘vairaa mai’ e tupu a muri aˈe i roto i te mana o te Basileia. Ei pahonoraa, ua horoa ˈtu oia i te hoê tapao e rave rau mau tuhaa, mai te mau tamaˈi rahi, te mau aueueraa fenua, te mau oˈe, e te pororaa e ati noa ˈˈe te fenua nei no nia i te Basileia o te Atua i haamauhia i nia i te raˈi.—Mataio 24:3-14.

Te taa ra anei ia outou te tapao o te vairaa mai o te Mesia ei Arii itea-ore-hia i nia i te raˈi? Te tupu nei to ˈna mau tuhaa i nia i teie ui. (Mataio 24:34) Eaha ïa no te tau i mua nei? Aita noa te Bibilia e faaite ra e ua fatata roa mai te hopea o teie faanahoraa o te mau mea, te tohu atoa nei râ oia i te mahana apî i tǎpǔhia e te Atua o te fatata roa i te hiti mai ma te maramarama e te hanahana i nia i te huitaata nei.—Petero 2, 3:13.