Te hoê nehenehe o te ore roa e morohi

“E MURE â te nehenehe; e mou hoi te nehenehe,” ta te rohipehe ra o Walter De la Mare ïa e parau ra. Papu maitai e tano teie parau no te mau tiare rapahoe nehenehe mau e faataahia ra i ǒ nei. E morohi oioi noa hoi to ratou hanahana.

Teie ta te pǐpǐ kerisetiano ra o Iakobo i papai: “E te taeae taoˈa rahi ra i te mea oia i faahaehaahia: e mou hoi oia mai te tiare aihere ra. Ua teitei anaˈe hoi te mahana ma te veavea ra, ua maehe te aihere, mairi ihora te tiare, ore atura taua huru nehenehe no ˈna ra; mai te reira atoa to te taata taoˈa ra mou i to ˈna ra haerea.”—Iakobo 1:10, 11.

I roto i teie nei ao papu ore, e nehenehe atoa te taoˈa rahi e ore roa. Hau atu, te taata taoˈa ra—mai te mau taata atoa—te ‘tupu nei oia mai te tiare.’ (Ioba 14:1, 2) Ua faahiti o Iesu i te parabole no nia i te hoê taata tei haapue i ta ˈna mau taoˈa e inaha, ua nehenehe atura hoi oia e faafaaea noa i muri iho. Ia ite râ oia e ua noaa ia ˈna i te mau mea atoa e fanaˈo ai oia i te oraraa, pohe aˈera hoi oia. Ua faaara maira o Iesu e: “O te huru ïa o te taata i haaputu i te taoˈa na ˈna iho, e aita i rahi ta ˈna taoˈa i te Atua ra.”—Luka 12:16-21.

“Taoˈa i te Atua ra.” Eaha ta Iesu e hinaaro ra e parau? Te hoê taata taoˈa rahi mai teie te huru e “taoˈa ta ˈna i nia i te raˈi”—e iˈoa maitai i mua i te aro o te Atua. E eita roa ˈtu hoi te mau taoˈa mai te reira te huru e morohi. (Mataio 6:20; Hebera 6:10) Maoti hoi i te riro mai te hoê tiare e morohi noa, e faaauhia teie huru taata i roto i te Bibilia, i te hoê tumu raau, e ore roa te mau rau e maheahea. E, ua papu maitai ia matou e, “o ta ˈna atoa e rave ra, te maitai ra ïa.”—Salamo 1:1-3, 6.