Te faatia ra te feia poro i te Basileia

Ua itea ia ˈna i te hoê tumu i roto i to ˈna oraraa

TE NA ô ra o Iesu e, ua ite o ˈna o vai ta ˈna mau mamoe. (Ioane 10:14) Mai te peu e e mafatu maitai to te hoê taata e mea here na ˈna i te parau-tia, e ô atu ïa teie taata i roto i te mau pǐpǐ a Iesu. E itea i taua huru taata nei i te hoê tumu i roto i te oraraa, mai tei itea e te hoê vahine no Belelgika. Teie to ˈna aamu:

“I to te mau Ite no Iehova patotoraa mai i to ˈu opani, e hepohepo iti rahi to ˈu, e ua manaˈo hoi au e haapohe ia ˈu. Ua au roa vau i te parau a te mau Ite no nia i te ravea no te arai i te mau fifi o teie nei ao maˈimaˈi, aita râ vau i au ia ratou i parau mai e e tuhaa atoa ta te Atua i reira. Ua faaea vau i te haere i te pure e vaˈu matahiti te maoro na mua ˈtu, inaha mea riri roa na ˈu i te huru haavarevare ta ˈu i ite na i reira. I pihai iho râ i te mau Ite no Iehova ra to ˈu faarooraa i te taˈi o te parau mau i roto i ta ratou mau parau e ua haamata aˈera hoi au i te ite e, mea fifi mau â ia ora aita e Atua.

“I muri aˈe i te tahi tau tere to ratou, aita vau i farerei faahou i te mau Ite. Aita e apî to ˈu oraraa. E pupuhi na vau e piti puohu avaava i te mahana e ua haamata atoa ˈtura vau i te rave i te raau taero. No to ˈu hinaaro e paraparau i to ˈu papa ruau i pohe, ua topa ˈtura vau i roto i te ohipa tahutahu. Auê hoi au i te riaria, ia vai noa mai o vau anaˈe i te po, e ia hauti mai te demoni ia ˈu! Tau avaˈe to ˈu farereiraa i te reira. I te mau po atoa, mea riaria roa na ˈu ia manaˈo e o vau anaˈe iho.

“E i te hoê mahana, i roto i te hoê tere ori haere to ˈu, ua rave vau i te hoê eˈa taa ê roa i tei matauhia e au, e ua tapae atura vau i mua i te hoê vahi paturaa rahi mau. I to ˈu maere, ua ite atura vau i te hoê nahoa rahi taata i reira. Ia ˈu i haafatata ˈtu, ua ite aˈera au i te mau Ite no Iehova e patu ra i te hoê Piha o te Basileia. Ua haamanaˈo ihora vau i te mau tere o te mau Ite i to ˈu fare, e ua manaˈo aˈera ïa vau e auê hoi te ao i te faahiahia e ahiri te ao taatoa nei e ora na mai teie mau taata.

“Ua hinaaro mau vau e ia hoˈi faahou mai te mau Ite i to ˈu fare, e no reira, ua parau atura i vetahi o ratou e patu ra i te piha. Ua pure aˈera au i te Atua, e inaha, hoê mahana i muri iho, o te taata tei farerei matamua ia ˈu tei to ˈu uputa. Ua faaau maira oia e ia tamau â mâua i te haapii i te Bibilia, e ua farii popou atura vau i te reira. E i muri iho, ua titau mai oia ia ˈu e haere i te mau putuputuraa i te Piha o te Basileia. Ua farii vau. Aitâ vau i ite aˈenei i te ohipa mai teie te huru! Mea maoro to ˈu maimiraa i te mau taata mea here te tahi e te tahi e mea oaoa atoa ratou. E teie nei teie ratou!

“I muri iho, ua haere atu vau i te mau putuputuraa. E fatata e toru hebedoma i muri, ua faaore aˈera vau i te peu ino roa, e puhipuhi i te avaava. Ua faarue hoi au i ta ˈu mau buka hiˈohiˈo e ta ˈu mau pehe demoni, e ua ite aˈera au e aita to te mau demoni e mana faahou i nia ia ˈu. Ua faanaho vau i to ˈu oraraa ia au i te mau faaueraa a Iehova e vai ra i roto i te Bibilia, e i muri aˈe i te toru avaˈe, ua haamata aˈera vau i te poro i te parau apî maitai. I muri aˈe i te ono avaˈe, ua bapetizohia vau. E e piti mahana i muri aˈe i to ˈu bapetizoraa, ua haamata vau i te rave i te taviniraa pionie tauturu.

“Te haamauruuru nei au ia Iehova no te mau mea maitatai atoa ta ˈna i rave no ˈu. E tumu to to ˈu oraraa i teie nei. Oia mau, ua riro mau â te iˈoa o Iehova ei pare etaeta i reira to ˈu itearaa i te haapûraa e te tauturu. (Maseli 18:10) Ua ite mau â vau i ta te papai salamo i ite, ia ˈna i papai i te Salamo 84:10: ‘E maitai rahi to te mahana hoê i roto i te mau hezere no oe ra, i te mahana atoa e tausani noa ˈtu i te tahi vahi ê. E hinaaro rahi to ˈu i te tiai i te uputa i te fare o tau Atua, i te parahi i te mau tiahapa o te paieti ore ra.’”

Ua itea i teie vahine aau haehaa i te hoê tumu i roto i te oraraa. No reira, ia nehenehe na te mau taata e imi ia Iehova ma te hoê mafatu maitai e tia ˈi.