Ehia ta outou e aufau?

UA ITE anei outou i te hoê taoˈa faufaa rahi e e tae roa outou i te haapae i ta outou mau faufaa atoa ia noaa mai teie taoˈa? Ua ite o Iesu, e ua faaite atu oia i ta ˈna mau pǐpǐ.

Ua parau atu oia e: “E au te basileia o te ao ra i te hoê taata hohoo tei imi i te poe maitatai: e itea ihora ia ˈna te hoê poe maitai roa ra; haere atura hoo atura i te mau taoˈa na ˈna ra, e ua hoo atura i taua poe ra.”—Mataio 13:45, 46.

Ua ineine taua taata hohoo ra i te haapae i te mau mea atoa ia noaa mai “te poe,” oia hoi te Basileia o te Atua ia ˈna. No te aha? No te mea aita ˈtu taoˈa i roto i teie nei ao e nehenehe e faaauhia ia ˈna. E faatitiaifaro te Basileia o te Atua i te mau fifi atoa ta te taata i ore i manuïa i te arai, mai te tamaˈi, te oˈe, te taparahi taata, e te haavîraa. (Salamo 72:4-8, 13, 14) I raro aˈe i te Basileia, e faaorehia atoa te hara, te maˈi, e te pohe. (Apokalupo 21:4, 5) Eita ïa e maerehia i te mea e te piti o te aniraa i roto i te Pure a te Fatu (“To matou Metua ra”) oia ïa, ‘Ia tae mai to oe ra basileia’!—Mataio 6:9, 10.

Eaha ta outou e horoa no te fanaˈo atoa i te mau haamaitairaa o te Basileia? Inaha, mea tamoni ore teie mau haamaitairaa. Teie râ, no te fanaˈo i te reira, e tia ia outou ia ite e eaha te Basileia, e tiaturi e e parau mau te reira, e ia faataa i te parahiraa matamua no ˈna i roto i to outou oraraa. E nehenehe anei outou e na reira? Te vai ra te mau haamaramaramaraa i roto i te Bibilia o te tauturu ia outou. No te aha outou e ore ai e farii i te tauturu a te mau Ite no Iehova ia haapii outou no nia i te Basileia o te Atua e e ite i teie nei e nafea outou e faufaahia ˈi i teie nei iho â.