“Te ite haavare ore i nia i te raˈi”
MEA maoro hou te taata matamua a taahi ai i nia i te fenua, ua anapa te avaˈe i roto i te reva i te po. I te hoê tau, e rave rahi o tei haamori ia ˈna mai te hoê ruahine. Ua parau te taata papai heleni ra o Plutarch e tei reira te vahi tapaeraa hopea o te mau varua viivii ore i muri aˈe i te pohe. I roto i te mau aai no Baltic, e taata te avaˈe, te tane o te mahana. Ua peapea raua, e ua horo atura te avaˈe i te atea ê o ta ˈna vahine, e mea varavara roa raua toopiti atoa ra i te fa mai i roto i te raˈi!
I teie mahana, e nǎnǎ te feia here apî—e te mea paari aˈe—i to ratou mata i nia i te avaˈe ma te faatupu i te mau manaˈo herehere. I roto i te mau matahiti 1960, ua haamâua te mau aivanaa i te mau tino moni rahi ia haere te taata i nia i te avaˈe e ia faahoˈi mai oia i te tahi ofai ia ravehia te mau maimiraa. Hoê mea papu no nia i te avaˈe. I te mau mahana atoa, i te hora tia, e hiti mai oia e e topa oia. No te tanoraa o to ˈna ohuraa e nehenehe tatou e numera i to ˈna mau huru e to ˈna mau haapoiriraa tei tupu e mau tausani matahiti na mua ˈtu.
Ia mataitai anaˈe te mau ati Iseraela i te avaˈe, e haamanaˈo na ratou i te tahi mea nehenehe roa. Ua tǎpǔ te Atua e e ore te fetii o te Arii ra o Davida e mou. Ua parau Oia e: “E tia [te huaai o Davida] i te vai-maite-raa, mai te marama ra; e mai te ite haavare ore i nia i te raˈi ra!” (Salamo 89:35-37) Ua tupu taua parau tohu ra na roto ia Iesu, te “Tamaiti a Davida.” (Luka 18:38) I muri aˈe i to ˈna poheraa, ua faatiahia mai o Iesu ei varua pohe ore e ua haere atu oia i nia i te raˈi. (Ohipa 2:34-36) I muri aˈe, ua faatoroahia ˈtura oia ei Arii o te Basileia a te Atua i nia i te raˈi. (Apokalupo 12:10) Te faatere nei teie Basileia i nia i te raˈi e “e vai [oia] e a muri noa ˈtu.” (Daniela 2:44) Mea na roto ïa i teie ravea o Iesu, te tia pohe ore o te fetii huiarii o Davida, e vai ai mai te marama ra, te “ite haavare ore i nia i te raˈi ra.”
No reira, i te mau taime atoa e ite ai outou i te avaˈe i te anaparaa i roto i te raˈi i te po, a haamanaˈo i te parau tǎpǔ a te Atua ia Davida e a mauruuru i te mea e e faatere te Basileia o te Atua e a muri noa ˈtu, ei faahanahanaraa i te Atua e ei haamaitairaa mure ore no te mau taata haapao maitai.—Apokalupo 11:15.
[Faaiteraa i te fatu o te hohoˈa i te api 32]
Frank Zullo