Ua noaa ia ˈna te re
“MAURUURU roa ia outou,” o ta Kioye ïa, te hoê tamahine haere haapiiraa tuarua, i papai atu i te amaa a te Taiete Watch Tower no Tapone. Mauruuru no te aha? Aita i maoro aˈenei, ua noaa ia Kioye te re matamua o te hoê tataˈuraa papairaa aamu no te fenua, tei faatupuhia e te Taatiraa no te parururaa purumu no Tapone. I roto i taua re ra, te vai ra te hoê tere i Tuete.
Ua papai o Kioye no te faaite i to ˈna mauruuru no te mau buka maitatai roa tei neneihia e te Watch Tower Bible and Tract Society, te manaˈo nei hoi oia e na te reira i tauturu ia ˈna ia manuïa. Taa ê atu i teie tataˈuraa, ua tia ˈtu oia no ta ˈna fare haapiiraa i roto e rave rahi mau tataˈuraa oreroraa parau e papairaa aamu. “I roto i te rahiraa o teie mau tataˈuraa,” o ta ˈna ïa e parau ra, “e horoahia te hoê tumu parau, e e tia i te mau taurearea haapii ia rave i te mau maimiraa no ta ratou papairaa aamu i roto i te hoê vahi vairaa buka. Aita râ vau e haapeapea nei. Te vai ra te mau buka faahiahia roa i nia i te paepae buka i to ˈu iho fare!” Te na ô faahou ra oia e: “Noa ˈtu eaha te tumu parau, no nia anei i te fifi o te ruhiruhia, te vahi nohoraa, te mau taairaa i rotopu i te mau fenua, aore ra te haamaitairaa ia ˈna iho, te vai ra iho â te hoê tuatapaparaa hohonu i roto i te mau vea Te Pare Tiairaa e A ara mai na!”
Noa ˈtu râ, e ere noa na te mau buka i tauturu ia Kioye. Te na ô ra oia e ua tauturu te haapiiraa o ta ˈna i fanaˈo na roto i te mau porotarama haapiiraa a te mau Ite no Iehova ia ˈna ia haamaitai i ta ˈna taioraa e ta ˈna papairaa, e mea na reira to ˈna neheneheraa e manuïa i roto i te mau tataˈuraa. “I te omuaraa, ua hinaaro mau â vau e haere i te haapiiraa tuatoru,” o ta ˈna ïa e farii nei. “Ihea roa râ e noaa mai ai teie huru haapiiraa?” I teie nei te opua nei oia e faaô i roto i te taviniraa taime taatoa no te tauturu ia vetahi ê ia fanaˈo atoa i te haapiiraa tei noaa mai ia ˈna. Noa ˈtu e ua oaoa oia i te noaaraa mai i te re no te papairaa aamu, te titau papu nei te mafatu o Kioye ia noaa mai te re o te ora.—A faaau e te Philipi 3:14.