Ua ite ratou i te iˈoa o te Atua

TE PAPAI matamua i itehia mai e i neneihia i te mau fenua aihuaraau no Beretane i Marite, o te Buka Salamo no te Ooa ïa. Ua neneihia to ˈna piaraa matamua e Stephen Daye i te Fenua aihuaraau no te Ooa no Massachusetts i te matahiti 1640. Te vai ra i roto i taua buka tahito ra te buka bibilia a te mau Salamo, tei hurihia na roto mai i te reo Hebera i roto i te reo Beretane i paraparauhia e i papaihia i taua tau ra.

Te hoê tuhaa faufaa roa o teie Buka Salamo no te Ooa, oia hoi te faaohiparaa i te iˈoa o te Atua i roto i te tahi mau irava. Inaha, te taata e taio noa ˈtu i taua buka ra tau 350 matahiti i teie nei, e nehenehe ïa ta ˈna e ite i te iˈoa o to tatou Poiete. Ei hiˈoraa, i roto i taua neneiraa ra, te na ô ra te Salamo 83:17, 18 e: “Ia huru ê ratou e a muri noa ˈtu, e ia ahoaho roa; oia, ia haama ratou, e ia mou roa. Ia ite te taata; o IEHOVAH to oe iˈoa, e o oe anaˈe, i nia i te fenua maramarama atoa nei te teitei aˈe.”

Parau mau, e titau te Atua teitei aˈe hau atu i to tatou fariiraa e o Iehova (Iehovah) to ˈna iˈoa. I roto i te Buka Salamo no te Ooa, te na ô ra te Salamo 1:1, 2 e eita te hoê “taata haamaitaihia” e haere ia au i te aˈoraa a te feia ino, “tera râ, i roto i te ture a Iehova, e vai ai te oaoa o to ˈna hiaai.” Te na ô ra te mau Salamo a te tatararaa hiˈopoahia Beretane Apî o te matahiti 1648 e: “Tera râ, i roto i te ture a Iehova to ˈna oaoa taatoa e vai ai.”

I ǒ nei te na ô ra te Tatararaa a te Ao Apî a te mau Papai Moˈa (farani) no te senekele 20 e: “E oaoa te taata o tei ore i haere na nia i te aˈoraa a te feia iino, e aore oia i tia i te eˈa o te feia rave hara, e aore oia i parahi i nia ia parahiraa o te feia faaooo! Area to ˈna au rahi ra, tei roto ïa i te ture a Iehova, e i roto i ta ˈna ra ture e taio oia ma te reo mǎrû i te ao e te po.”

Ia noaa te oaoa mau, e tia i te hoê taata ia haapae i te aˈoraa a te feia iino. Eiaha oia ia pee i te hiˈoraa o te feia rave hara e eiaha atoa oia e amui atu i te feia faaooo paieti ore. I rotopu i te tahi atu mau mea, e tia ia ˈna ia ape i te amuimuiraa i te feia e nehenehe e faahema ia ˈna na roto i ta ratou mau parau e to ratou haerea ia rave i te peu viivii i te pae taatiraa, te raau taero, e te tahi atu mau ohipa opanihia e te ture a te Atua. Oia mau, ua taaihia te oaoa mau i nia i te haapiiraa e o vai te Atua mau, o Iehova to ˈna iˈoa, e i te faaohiparaa i ta ˈna ture i faaitehia i roto i te Bibilia.