Eita e mau i te Arii epikopo!

I TE matahiti i mairi aˈenei, ua faanahohia te hoê apooraa karadino no te tauaparau no nia i te tahi mau tumu parau e tapitapi-rahi-hia ra e te Ekalesia Katolika. I rotopu i teie mau tumu parau, ia au i te vea ra Il Sabato, te vai ra “te uˈanaraa o te mau pǔpǔ faaroo.” Teie râ, te na ô ra teie vea e: “Eita te mau mau karadino e haafifihia no te tahoê i nia i teie tumu parau. Ua tuea paatoa to ratou manaˈo e mea titauhia ia tuatapapa hohonu atu â i te tupuraa o te mau pǔpǔ faaroo apî e mea titau-atoa-hia ia tapea, mai te peu e e nehenehe, i to ratou parareraa.”

Mea papu maitai e e ere “te uˈanaraa o te mau pǔpǔ faaroo” i te hoê fifi i Italia anaˈe. Te faataa ra te vea Il Sabato e: “I to ˈna haereraa ˈtu i te Vaticana aita i maoro aˈenei, ua ani atu te Arii epikopo ra o Kirill no Smolensk [hoê o te mau oire tahito roa ˈˈe no Rusia] . . . i te pâpa ia tahoê te mau faaroo no te tauturu ia faaruru atu i te parareraa rahi a te mau Ite no Iehova e teie mau huru pǔpǔ i te Fenua Rusia.”

I te senekele matamua, ua amuamu atoa te mau raatira o te haapaoraa rahi i te taime a haapararehia ˈi te kerisetianoraa ma te uˈana e to ˈna mau melo. I te hoê taime, ua amuamu atu te mau ati Iuda mauruuru ore i te feia faatere o te oire e: “O te mau taata orure hau teie i te mau fenua atoa nei, a teie mai nei â hoi”! (Ohipa 17:6) I taua tau ra, ua imi te mau raatira haapaoraa i te mau ravea atoa no te tapea i te parareraa o te kerisetianoraa, aita râ ratou i manuïa. I teie atoa mahana, eita te mau tutavaraa atoa no te tapea i te parareraa o te haapiiraa kerisetiano mau e manuïa. Na te Atua iho i tǎpǔ mai e: “Te mauhaa ra na oe i hamanihia ˈi ra, e ore ïa e tupu; e te mau vaha atoa e patoi ia oe i te haavaraa ra, e hapa ïa ia oe. O te tufaa teie o te mau tavini o Iehova; e tei ia ˈu te faatia ia ratou.”—Isaia 54:17.