Mau uiraa a te feia taio
Ia au i te Ioba 1:8, e tano anei ia manaˈo e i te tau a ora ˈi o Ioba, o ˈna anaˈe te taata o tei tapea i to ˈna taiva ore ia Iehova?
Eita. Aita te Ioba 1:8 e turu ra i teie manaˈo, te na ô ra hoi teie irava e:
“Ua parau atura Iehova ia Satani, Ua hiˈo anei oe i tau tavini ia Ioba? aita hoi o ˈna e faito i nia i te fenua nei, e taata parau-tia e te paieti, e te mǎtaˈuraa i te Atua, e te faarueraa i te ino?” Ua faahiti faahou â te Atua i teie parau i roto i te Ioba 2:3, ia ˈna i ani atu ia Satani e: “Ua hiˈo anei oe i tau tavini ia Ioba, aita hoi o ˈna e faito i te ao atoa nei, e taata parau-tia e te paieti, i te mǎtaˈuraa i te Atua, e te faarueraa i te ino?”
Te faaite ra te buka iho a Ioba e e ere o Ioba anaˈe te taata e ora ra ta te Atua i farii ei taata haapao maitai. Mai te omuaraa o te pene 32, te taio nei tatou i te parau no Elihu. Noa ˈtu e e taata apî oia, ua faatitiaifaro o Elihu i te hiˈoraa tano ore a Ioba e ua arue oia i te Atua mau.—Ioba 32:6–33:6, 31-33; 35:1–36:2.
No reira, te auraa o te faahitiraa a te Atua e ‘aita ˈtu taata mai ia Ioba ra i nia i te fenua nei’ oia hoi e tiaraa faahiahia roa to Ioba ei taata parau-tia. E au ra e ua ora o Ioba i te area tau i rotopu i te poheraa o Iosepha i Aiphiti e te haamataraa o te taviniraa a Mose ei peropheta na te Atua. I roto i taua tau ra e rave rahi mau ati Iseraela e ora ra i Aiphiti. Eita hoi e tia ia manaˈohia e ua taiva paatoa ratou e aita hoê i fariihia e te Atua; eita e ore e e rave rahi feia o tei tiaturi na ia Iehova. (Exodo 2:1-10; Hebera 11:23) Teie râ, aita hoê i rave mai i te hoê tiaraa faufaa, mai ia Iosepha ra, e aita atoa teie feia haamori i rave i te hoê tiaraa faahiahia i mua i te haamoriraa mau, mai ta Mose e rave i muri iho na roto i te aratairaa i te nunaa o Iseraela i rapae ia Aiphiti.
I te tahi atu vahi, te vai ra te hoê taata taiva ore faahiahia. “Tei te fenua ra o Uza te hoê taata, o Ioba te iˈoa; e taata parau-tia e te paieti, i te mǎtaˈuraa i te Atua, e te faarueraa i te ino.”—Ioba 1:1.
E nehenehe ïa ta Iehova e faahiti ia Ioba ei hiˈoraa papu e te tia ia tapaohia i te pae no te faaroo e te paieti. Oia atoa, ua faahiti taa ê na feia papai bibilia ra o Ezekiela raua o Iakobo ia Ioba ei hiˈoraa no te parau-tia e te faaoromai.—Ezekiela 14:14; Iakobo 5:11.