Na te mau manu meli e haapii mai ia ratou

“I te mau matahiti i mairi aˈenei, ua itea mai i te feia aravihi e te feia papai hohoˈa no te tahi mau tauihaa i te tahi mea o tei ite-ê-na-hia: ia patuhia te hoê taoˈa noa ˈtu to ˈna haihai ia au i te hohoˈa e ono pae o te hoê ofaaraa manu meli, e hau atu to ˈna paari i te tahi atu huru paturaa.”—The New York Times, 6 no atopa 1991.

EITA e maerehia i te mea e e riro te taata i te faufaahia na roto i te tuatapapa-maite-raa i te mau manumanu. Ua faahiti na hoi te hoê taata faaroo no tahito ra, o Ioba, e: “A ui na râ i te mau puaa, e na te reira e haapii mai, e te mau manu o te reva nei, e na te reira e faaite mai ia oe; . . . o vai te ore i ite i taua mau mea ra e na te rima o [Iehova] teie i rave?” (Ioba 12:7-9) Oia mau, e ite-papu-hia te paari o te Poiete ia hiˈohia te mau taoˈa matauhia mai te hohoˈa e ono pae o te mau piha iti i roto i te hoê ofaaraa manu meli.

Noa ˈtu e ua naea-noa-hia te meumeuraa o te mau iri o teie mau piha iti i te toruraa o te milimetera, mea paari maitai teie mau iri. Inaha, e nehenehe ratou e amo i te hoê faito e 30 taime hau aˈe i to ratou iho teiaha.

E nehenehe teie puai e faaohipahia no te tahi mau ohipa, mai te parururaa i te mau tauihaa i te mau ûraa puai. E nehenehe atoa e paruru i te mau tauihaa a te nuu o te taorahia mai mai nia mai i te manureva i nia i te fenua nei. Te na ô ra te vea The New York Times no nia i teie ohipa e: “Te taamuhia nei te mau taoˈa teiaha mai te mau pereoo ra te huru i nia i te mau paepae tei tamauhia i raro aˈe te mau anairaa hamanihia e te taoˈa hohoˈa ofaaraa manu meli no te paruru ia tau anaˈe i nia i te fenua.”

E nehenehe e faaohipa e rave rau huru taoˈa no te patu i te mau tauihaa hamanihia e te taata e taua hohoˈa nei. Te taoˈa faaohipa-pinepine-hia, o te papie ïa. Te faaohipahia nei te papie hamanihia e te nylon e te tapau no te hamani i te taoˈa e au i te ofaaraa manu meli o te anoihia i roto i te tino o te tahi mau manureva rarahi. E naeahia te hoê puai rahi ma te faito mama roa. No te aha? I rotopu i te mau paepae, e mataˈi anaˈe ïa, no reira, mea mama roa atoa. E taoˈa paruru maitai atoa te mataˈi.

Aita te manu meli i “ite” i teie mau ohipa atoa ra, no te mea aita i naeahia ia ˈna i te maramarama i te pae no te hamaniraa aravihi. Teie râ, i te mau mahana atoa, e rave oia i ta ˈna ohipa ia au maite i te paari i noaa mai ia ˈna no ǒ mai i te Poiete ra o Iehova.