Te faatia ra te feia poro i te Basileia

Ua fanaˈo te mau tamarii faaroo i te fare haapiiraa i Nigeria

UA PAPAI te aposetolo Paulo e: “Peneiaˈe o te tia ra, e parahi hau noa outou i roto i te taata atoa nei.” (Roma 12:18) Ua faaohipa te mau tamarii haere haapiiraa a te mau Ite no Iehova i Nigeria i teie aˈoraa, noa ˈtu e ua hamani-ino-hia ratou. Ei faahopearaa, ua haamaitai mai Iehova ia ratou.

◻ Mea riri roa na te hoê haapii tamarii i te mau Ite no Iehova. I te hoê putuputuraa poipoi, ua titau aˈera oia i te mau Ite atoa ia haere mai i mua e ua faaue ihora ia ratou ia himene i te himene aiˈa. Aita ratou i farii, ma te haapapu e o te Atua anaˈe ta ratou e haamori atu. Ua afai atura te haapii tamarii ia ratou paatoa i rapae e ua parau atura ia ratou ia tâpû i te aihere. I taua taime ra, te rave ra ïa te tahi atu mau tamarii i ta ratou tuhaa haapiiraa.

Ua afai atura te hoê taata paari Ite no Iehova i te vea Te Fare haapiiraa e te mau Ite no Iehova (farani) i teie haapii tamarii, ma te faataa ˈtu i te tiaraa amui ore o te mau Ite no Iehova. Aita râ te haapii tamarii i farii i te tauaparau no nia i teie ohipa e aita atoa oia i rave i te vea. Ua haapaari faahou atu râ oia i te utua i nia i te mau tamarii.

Ua tamau noa te mau tamarii Ite i te faaoromai i teie faautuaraa e ua tâpû noa ˈtura ratou i te aihere noa ˈtu e aita te haapii tamarii i reira. I te hoê mahana, ua tapuni aˈera te haapii tamarii e ua tamoemoe ihora ia ratou a tamau noa ˈi ratou i te rave i te ohipa e i te himene i te mau himene o te Basileia. No to ˈna maere rahi, ua faahoˈi ihora oia ia ratou i roto i te piha haapiiraa, ma te faaite i to ˈna putapû rahi i mua i to ratou haerea. Eaha ˈtura te faahopearaa? Te haapii ra teie haapii tamarii e te mau Ite no Iehova i teie nei!

Mea papu maitai e ua haamaitaihia teie mau tamarii haere haapiiraa no to ratou haapao maitai ia Iehova e i ta ˈna mau faaueraa tumu.—Maseli 10:22.

◻ Ua haamaitai-atoa-hia o Ruth e to ˈna mau hoa no to ratou haapao maitai i te titauraa a Iehova ‘ia faaatea ê mai i teie nei ao.’ (Ioane 17:16) Ua haamata o Ruth, e 18 matahiti to ˈna, i te taviniraa pionie i te 12raa o to ˈna matahiti. Ua faaruru aˈera oia e te tahi atu mau Ite i te mau patoiraa no ǒ mai i te mau melo faatere haapiiraa no te mea aita ratou i farii i te himene i te himene aiˈa. Ua titau ihora te orometua haapii ia farerei i te mau metua o teie mau tamahine. I muri aˈe i to raua haamaramaramaraa ˈtu ia ˈna, ma te faaohipa i te vea Fare haapiiraa, ua mauruuru atura te orometua haapii e aita o ˈna i haapeapea faahou i teie mau taurearea.

I te hoê râ mahana, ua faaino aˈera e ua faautua atoa te hoê orometua haapii no Inidia i te hoê o te mau tamahine i mua i te taatoaraa o te mau tamarii no te mea aita oia i himene i te himene aiˈa. Ua tia maira teie tamahine ma te mǎtaˈu ore no te paruru i to ˈna faaroo e ua afai atura te orometua haapii ia ˈna i mua i te faatere o te fare haapiiraa. I to raua taeraa ˈtu i reira, ua ite atura teie tamahine Ite e tei reira atoa te vahine mono i te faatere. I to ˈna maere rahi, ua ata ihora te faatere e te mono faatere. Ma te fariu atu i nia i te orometua haapii, ua na ô atura te faatere e: “Eiaha oe e haapeapea no teie mau tamahine. Noa ˈtu e e taparahi pohe oe ia ratou, mea au aˈe na ratou ia pohe maoti i te himene i te himene aiˈa. Aita anei oe i faaroo aˈenei i to ratou parau?” Ua faaite aˈera oia e to ˈna mono no nia i te faaroo e te itoito o te mau Ite no Iehova. Ma te paraparau atu i te tamahine, ua faaite atura te faatere i to ˈna tatarahapa no te haapeapearaa o tei faatupuhia i nia ia ˈna. E ua na ô atura oia: “A tamau noa i te rave i ta oe mau ohipa faaroo. Mea faahiahia roa na ˈu ta oe haapaoraa e to oe tiaraa mǎtaˈu ore i rapae e i roto i te fare haapiiraa.” I muri aˈe, ua tatarahapa ˈtura te orometua haapii o tei patoi na mua ˈˈenei i mua i te Ite, ma te parau e te taa ra ia ˈna i teie nei i te tiaraa amui ore o te mau Ite no Iehova.

Ua pee teie mau tamarii i te hiˈoraa o na ati Hebera tootoru o tei ore i taiva i te Atua na roto i te tipaparaa ˈtu i mua i te hoê idolo, e to Daniela atoa, o tei ore i faaea i te pure ia Iehova. Ua haamaitai Iehova i teie mau taata no te mea ua tapea ratou i to ratou haapao maitai i te mau ture parau-tia a te Atua.—Daniela, pene 3 e te 6.