“Te mau Ite no Iehova?”

UA PAPAIHIA te uiraa i nia nei ei upoo parau i roto i te vea reo filelane ra Vea a te Fare haapiiraa tuatoru no Helsinki. I raro aˈe i te upoo parau, te vai ra te hoê rata papaihia e te orometua haapii ra o Jorma Palo, e te na ô ra te tahi tuhaa e: “Ua hiˈopoa maite au i te tapao a ta outou fare haapiiraa tuatoru neneihia i nia i te api rapaeau o te Vea. I ropu o te afaraa no nia, ua ite au i te hoê papai hebera o ta ˈu i ani atu i te auraa i te hoê ati Iuda e hoa hoi no ˈu. Ia au i teie taata aravihi, o tei ite i te reo hebera, o ‘Iehova’ ïa teie parau na roto i te reo filelane.”

Ua hitimahuta vetahi i te iteraa i te iˈoa iho o te Atua i nia i te tapao o teie Fare haapiiraa tuatoru filelane. Inaha, e 350 matahiti to teie fare haapiiraa tuatoru, e i te taime a avarihia ˈi oia, ua matau-maitai-hia te iˈoa Iehova e e faaohipahia na i Europa taatoa. Ua papaihia teie iˈoa i nia e rave rahi mau fare huiraatira, mau moni, e mau tapao no taua tau ra.—A hiˈo i te vea iti ra Te iˈoa o te Atua e vai noa e a muri noa ˈtu.

I teie nei senekele, aita te amuiraa faaroo kerisetiano e faaohipa faahou ra i te iˈoa o te Atua, e ua moe-roa-hia te anaanatae i tahito ra no teie nei iˈoa. Hoê anaˈe pǔpǔ o te faaohipa ra i te iˈoa o te Atua i roto i ta ˈna haamoriraa e o te haaparare nei ia ˈna na te ara, ia au i te aniraa matamua i roto i te Pure a te Fatu: “E to matou Metua i te raˈi ra, ia raa to oe iˈoa.” (Mataio 6:9) Tera ïa te tumu te mau taata i haamanaˈo ai i te mau Ite no Iehova i te iteraahia te iˈoa i nia i te tapao o te fare haapiiraa tuatoru.

[Faaiteraa i te fatu o te hohoˈa i te api 32]

Yliopisto