Ua tae i te taime no te imi ia Iehova
“O Iehova i nia i te raˈi tei hiˈo mai i raro nei i nia i te tamarii a te taata nei, i te itearaa te tahi taata ite ra i te imiraa i te Atua.”—SALAMO 14:2.
1, 2. (a) Mea nafea te feia e rave rahi i te hiˈoraa i te Atua mau, o Iehova? (b) Nafea tatou e ite ai e te ite ra Iehova i te tâuˈa ore o te taata?
I TEIE mahana, te patoihia nei te Atua mau ra o Iehova e te feia atua ore, te feia e na ô ra e eita e nehenehe e itea mai i te Atua, te feia haamori i te mau atua haavare e te mau mirioni taata e parau nei e te tiaturi nei ratou i te Atua tera râ o te faahapa nei ia ˈna na roto i ta ratou mau ohipa. (Tito 1:16) E rave rahi teie e tiaturi nei mai te philosopho helemani no te senekele 19 ra o Nietzsche e “ua pohe te Atua.” Aita anei Iehova e ite ra i teie haapao ore maamaa ra? Oia, inaha ua faaurua oia ia Davida ia papai e: “Te parau ra te maamaa i roto i to ˈna ra aau, Aore e Atua! ua ino ïa ratou, e te faufau hoi i ta ratou ohipa: aore roa e taata i rave i te parau maitai ra.”—Salamo 14:1.
2 Te na ô faahou ra Davida e: “O Iehova i nia i te raˈi tei hiˈo mai i raro nei i nia i te tamarii a te taata nei, i te itearaa te tahi taata ite ra i te imiraa i te Atua.” Oia, te haapao maira te Fatu Teitei ra i te feia e imi ra i te ravea no te ite e no te tavini ia ˈna. No reira, mea faufaa roa ia imi maite tatou ia ˈna i teie nei iho â ia ora tatou. Oia hoi, na te reira e faaoti e e noaa anei te ora mure ore aore ra te haamouraa mure ore.—Salamo 14:2; Mataio 25:41, 46; Hebera 11:6.
3. Eaha te faito e nehenehe e opuahia no te tau i mua nei?
3 No reira, te taa ra ia tatou e no te aha e mea faufaa roa ia tauturu atu tatou ia vetahi ê ia imi ia Iehova i teie nei iho â. Te toe nei â te mau mirioni taata o tei ore aˈenei i farerei i te hoê Ite no Iehova aore ra o tei ore i faaroo aˈenei i te “evanelia o te basileia nei.” Ehia rahiraa e naeahia i “te feia rahi roa” hou te “ati rahi,” aita ïa tatou i ite. Teie râ, eita e ore e te toe nei â te tahi feia e imi ra e o te itea ˈtu i te Atua ra o Iehova i roto i te tau i mua nei hou e maoro roa ˈi. Teie ïa te uiraa i teie nei, Eaha ta tatou e nehenehe e rave no te tauturu i te mau rahiraa taata ê atu ia ite i te Atua?—Mataio 24:14; Apokalupo 7:9, 14.
4, 5. I to ratou maimiraa i te hoê atua, mea au aˈe na te feia e rave rahi i te aha?
4 E rave rahi taata i roto i te ao nei i teie mahana o te maimi nei, e maimi nei râ i te aha? Mea iti roa teie e imi mau nei i te Atua mau hoê ra, o Iehova. Mea au aˈe na te mau taata e rave rahi te hoê atua o te tano maitai i to ratou mau hinaaro e to ratou mau manaˈo oti noa. Mai ta te taata uiui manaˈo marite o George Gallup, Jr., i parau: “Aita e taa-ê-raa rahi i rotopu i te feia haere pure e te feia o te ore e haere i te pure no nia i te haavare, te eiâraa i te pae no te tute e te eiâ, no te mea iho â râ e mea rahi roa te haapaoraa totiale.” Te na ô faahou ra oia e “e rave rahi o te faatupu nei i te haapaoraa e tano maitai no ratou iho e o te faanavenave ia ratou . . . Ua parau te hoê taata i teie huru haapaoraa, te haapaoraa o ta oe e hinaaro.”
5 E parau mai vetahi e, “Mea maitai roa ta ˈu haapaoraa no ˈu nei.” Inaha, teie hoi te uiraa mau, “Mea maitai anei ta ˈu haapaoraa i mua i te aro o te Atua?” Oia mau, te oaoa nei te rahiraa o te feia no te amuiraa faaroo kerisetiano e te faaroo hindou i te haamoriraa i ta ratou mau tii e ta ratou mau idolo. Te manaˈo nei te rahiraa o te feia e faahua parau nei ia ratou e kerisetiano e e navai noa ratou i te hoê atua Toru Tahi aita e iˈoa. E hau atu i te 900 mirioni mahometa teie e tiaturi nei ia Allah. I te tahi atu pae, e rave rahi mirioni feia atua ore teie e parau nei e aita e Atua.
Te feia e tia ia tauturuhia
6. Eaha ta te feia taio i Te Pare Tiairaa e rave rahi i ite?
6 Eaha ïa no te feia i rotopu ia tatou e taio tamau nei i teie vea? Ua maimi tatou i te Atua mau e ua ite tatou ia ˈna. Ua papu ia tatou e e parau mau teie mau parau a Iakobo 4:8: “E haafatata ˈtu i te Atua, e na ˈna e haafatata mai ia outou na.” I to tatou apitiraa ˈtu ma te itoito i te amuiraa kerisetiano, ua haafatata ˈtu tatou i te Atua, e ua ite mau â tatou iho e ua haafatata mai Iehova ia tatou.—Ioane 6:44, 65.
7. Nafea tatou e ite ai e e rave rahi feia e hinaaro nei â e faaitoito i roto i te parau mau?
7 Teie râ, ua ite tatou e te vai noa nei â te feia mea oaoa roa na ratou ia apiti mai i te tahi taime e te nunaa o Iehova, teie râ, aitâ ratou i rave atura i te tutavaraa papu no te haafatata ˈtu ia Iehova na roto i te pûpûraa ia ratou no ˈna e te bapetizoraa. Nafea tatou e ite ai i te reira? I te matahiti 1990, fatata hoê ahuru mirioni taata o tei haere mai i te oroa Haamanaˈoraa i te poheraa o Iesu. Ehia râ teie e poro maite nei i te parau apî maitai o te Basileia? E maha mirioni tiahapa anaˈe. Oia hoi te auraa e te vai nei fatata e ono mirioni e farii maitai ra i te parau mau e o te oaoa nei i te apiti mai ia tatou, teie râ, aitâ ratou i opua ˈtura e turu i te reo viivii ore o te parau mau na roto i te pororaa i te parau apî maitai o te Basileia. Ma te feaa ore, e rave rahi mau taata teie e paraparau nei no nia ia Iehova e to ˈna Basileia i te tahi mau taime. Teie râ, aitâ ratou i faaite papu atura e e mau Ite no Iehova ratou. Te hinaaro atoa ra tatou e tauturu i teie mau huru taata.—Zephania 3:9; Mareko 13:10.
8, 9. (a) Eaha ta Iehova e faaitoito maira ia tatou ia rave? (b) No te aha e mea maamaa ia faarue i te aˈoraa a Iehova?
8 Te hinaaro nei tatou e faaitoito ia ratou ia riro ei mau Ite no Iehova oaoa e te itoito i roto i te tuhaa hopea o te ohipa rahi e ravehia nei na te ao atoa nei. A tapao na i te titauraa here mau a Iehova i roto i te Maseli 1:23: “E fariu mai outou i ta ˈu e aˈo atu nei; inaha! e ninii hua ˈtu vau i tau varua ia outou; e parau hua ˈtu vau ia outou i ta ˈu nei parau.” (A faaau e te Ioane 4:14.) E itoitohia tatou ia ite tatou e te farii maira Iehova i ta tatou mau tutavaraa e rave nei no te amo i to ˈna iˈoa e no te farii i ta ˈna haamoriraa! Oia mau, aita tatou e hinaaro ra ia taiohia tatou i roto i te feia e faataahia ra i roto i te Maseli 1:24, 25: “Ua tiaoro atu vau, e aore i tia ia outou; ua faatoro atu vau i o ˈu pue rima, e aore roa e taata i haapao mai: ua faarue râ outou i ta ˈu i aˈo atu, e aore i haapao mai i ta ˈu i faahapa ˈtu.”
9 Te feia aore e tâuˈa i te aˈoraa a Iehova e maimi ia ˈna i te taime e nehenehe â oia e itea mai e o te faanuu noa i ta ratou faaotiraa e tae roa ˈtu i te taime e ite ai ratou i te ati rahi i te haamataraa, e ite ïa ratou e ua maoro roa to ratou tiairaa. E faaite hoi teie huru haerea i te ereraa i te faaroo e te paari e e haavahavaha i te hamani maitai rahi o Iehova.—Korinetia 2, 6:1, 2.
10. No te aha mea atâata roa te faatau e te tâuˈa ore?
10 No te faahohoˈa i te titauraa e rave oioi noa i te ohipa, e tiai anei outou ia roo-roa-hia outou i te maˈi o te mahaha, i reira ïa outou e faaroo ai i te parau a te taote? Aore ra, ia ite outou e te haamata ra te maˈi? No te aha ïa e tiai maoro atu â no te faataa ê mai ia outou i te ao maˈimaˈi a Satani e no te tia ˈtu i te pae o Iehova e to ˈna mau Ite? Te faataa-papu-hia ra te mau faahopearaa o te faatau, te haapao ore e te tâuˈa ore i roto i te Maseli 1:26-29: “E ata atoa vau ia roohia outou e te ati ra; e tâhito atu vau ia roohia outou e ta outou e mǎtaˈu ra . . . Ei reira ratou e tiaoro mai ai ia ˈu, e ore râ vau e parau atu; ei reira ratou e imi vave mai ai ia ˈu, e ore râ ratou e ite mai ia ˈu: o ratou aore i hinaaro i te ite, e aore i hinaaro i te mǎtaˈu ia Iehova.” Eiaha na tatou ia haamata i te ‘imi ia Iehova’ ia maoro roa anaˈe!
11. Eaha te tauturu e vai ra no te feia e imi ra i te tavini i te Atua?
11 Te maimi noa râ paha vetahi o te taio nei i teie vea i te Atua mau. Te oaoa nei matou i te mea e te tamau noa nei outou i ta outou maimiraa. Te pure nei matou ia turai to outou ite no nia i te Bibilia ia outou ia rave i te hoê tutavaraa hau atu â no te tia ma te papu maitai no te turu i te parau mau. A tiaturi e te vai ineine noa nei te mau amuiraa atoa a te mau Ite no Iehova no te tauturu ia outou i roto i ta outou maimiraa.—Philipi 2:1-4.
Te taime no te faaitoito e no te rohi
12, 13. Eaha te titauhia ra no te rave i te ohipa no te haamoriraa mau?
12 No te aha e titauhia ˈi ia tatou paatoa ia ohipa no te rave i te tiaraa no te Atua ra o Iehova e ta ˈna haamoriraa mau? No te mea te fatata ˈtura te mau ohipa o te ao nei i to ratou tatararaa hopea. Te hurihia nei te mau api o te aamu i te vitivitiraa te ore e naeahia i te taata ia taio. E ere ïa te taime no te parahi noa aore ra no te vai pumahana noa. Mea papu maitai te parau a Iesu: “E ere oia i to ǒ nei ia ˈu nei, no ǒ mai ïa: e o tei ore i haaputu atoa mai, ua haapurara ïa.” Ua parau atoa oia e: “O te taata hoi e haama ia ˈu e ta ˈu nei parau, e haama atoa te Tamaiti a te taata nei ia ˈna, ia haere mai oia ma to ˈna iho hanahana, e ma te hanahana atoa o te Metua, e no te mau melahi moˈa ra.”—Mataio 12:30; Luka 9:26.
13 Teie te taime no te faaitoito e no te rohi! Ua ite tatou e te haere tia ˈtura te mau ohipa o te ao nei ihea, e te fa maira o Aramagedo. No reira, te piihia maira e imi ia Iehova i teie nei hou te ‘mahana o to ˈna riri’ e tupu ai, i te taime e nehenehe â e itea mai ia ˈna. I te ati rahi, ua maoro roa ïa.—Zephania 2:2, 3; Roma 13:11, 12; Apokalupo 16:14, 16.
14. Eaha te mau tumu e vai ra ia tatou ia imi i te Atua?
14 Oia mau, e tia i te huitaata atoa nei ia imi i te farii maitai o te Atua i teie nei iho â. Ua faaite te aposetolo Paulo i te reira ma te tano mau i roto i te Ohipa 17:26-28: “E na [te Atua] i hamani i te taata i te mau fenua atoa nei i te toto o te taata hoê ra, ei parahi i te mau fenua atoa nei, e ua haapao i te tau i haapaohia i mutaa ihora, e te otia o to ratou ra parahiraa; ia imi ratou i te Fatu, peneiaˈe o te perehahu atu ratou ia ˈna e itea ˈtu, aita râ oia i atea ê atu ia tatou atoa nei: no ˈna hoi to tatou ora, e i hahaere ai, e i parahi ai hoi.” Te horoa maira teie parau hopea, “no ˈna hoi to tatou ora, e i hahaere ai, e i parahi ai,” i te hoê tumu papu maitai no te imi i te Atua. Auaa te hamani maitai rahi o Iehova, e parahi ai tatou i nia i teie vahi oraraa apǐapǐ faufaa roa râ no to tatou ora, oia hoi te fenua. Eita anei e tia ia mauruuru roa tatou i te Fatu Teitei ra o te ao taatoa nei? E eita anei e tia ia faaite tatou i to tatou mauruuru ia ˈna na roto i te mau ravea papu maitai?—Ohipa 4:24.
15. (a) Eaha te manaˈo o te taata tuatapapa aamu o Arnold Toynbee no nia i te tapao matamua o te haapaoraa teitei roa ˈˈe? (b) Eaha te tia ia tatou ia rave ia nehenehe tatou e faahanahana i te Atua?
15 Teie ta te taata tuatapapa aamu ra o Arnold Toynbee i papai: “Te tapao mau o te haapaoraa teitei roa ˈˈe, o te niniiraa ïa i te mau aˈoraa e te mau parau mau i te pae varua o tei riro ei iho tumu no ˈna, i roto i te mau taata atoa o ta ˈna e nehenehe e haaputapû, ia nehenehe ratou tataitahi e faatupu i te tapao hopea mau i faataahia no te Taata. Te tapao hopea mau o te Taata, o te faahanahanaraa ïa i te Atua e te oaoaraa ia ˈna e a muri noa ˈtu.” (An Historian’s Approach to Religion, api 268-9) No te faahanahana i te Atua, e tia na mua ia tatou ia imi ia ˈna e ia noaa i te ite papu no ˈna e no ta ˈna mau opuaraa. No reira, ua tano maitai te piiraa a Isaia: “E imi outou ia Iehova, oi itea ˈi oia, e tiaoro outou ia ˈna, oi fatata mai oia: e faarue te paieti ore i to ˈna haerea, e te taata parau-tia ore i to ˈna manaˈo: a hoˈi ai oia ia Iehova, e na ˈna oia e aroha mai; e hoˈi i to tatou Atua, te rahi ra hoi ia ˈna te faaore i te hara.”—Isaia 55:6, 7.
Eaha te tauturu tano mau ta tatou e nehenehe e pûpû?
16. (a) Eaha te tamataraa te tia i te amuiraa kerisetiano ia faaruru? (b) E nehenehe tatou e tauturu ia vetahi ê ia tavini ia Iehova na roto i teihea ravea tano mau?
16 Ua riro te mau mirioni taata anaanatae e ere â i te feia poro itoito mau, ei tamataraa no tatou paatoa. Eaha te tuhaa mau ta tatou e rave ra ei mau matahiapo, mau tavini tauturu, mau pionie e ei feia poro no te tauturu i te mau taata e farii maitai nei i te parau mau ia riro ratou ei feia turu itoito i te haamoriraa mau mai ia tatou atoa nei? Hoê ravea no te pûpû i te tauturu au mau, mai te peu e e titauhia, o te haereraa ˈtu ïa i to ratou fare e te afairaa mai ia ratou i te mau putuputuraa i te Piha o te Basileia ia nehenehe ratou e fanaˈo tamau i te mau haamaitairaa o te varua o Iehova. Te aˈoraa a Paulo i to Hebera, i te pene 10, te mau irava 24 e te 25, mea rû mau â i teie mahana mai i taua tau ra: “E haapao maite â tatou te tahi i te tahi, a faaaraara ˈtu ai ia rahi te aroha, o te rave i te mau ohipa maitatai ra: eiaha hoi e faarue i ta tatou haaputuputuraa, mai ta te tahi pae ra peu, e faaitoito râ; e ia rahi atu â te faaitoito, no te mea te hiˈo na outou i taua mahana ra i te fatataraa mai.” Te faaitoito atu nei matou i te feia atoa e hinaaro ra e tamata i te maitai o Iehova, ia apiti tamau atu i te mau Ite no Iehova i ta ratou Piha o te Basileia no to ratou vahi.
17. Mai te peu e e tia ia tatou ia tauturu i te feia haapii Bibilia ia haere i mua i roto i ta ratou maimiraa ia Iehova, eaha te mau uiraa te tia ia pahonohia?
17 Mai te peu e te haapii ra tatou i te Bibilia e te hoê taata e haere tamau mai nei i te mau putuputuraa, e nehenehe anei ta tatou e tauturu ia ˈna ia noaa i te aravihi no te riro ei taata poro o te parau apî maitai? (Hiˈo Faanahohia no te rave faahope roa i ta tatou taviniraa [farani], api 98-100.) E ia riro mai oia ei taata poro bapetizo-ore-hia, e nehenehe anei e ani atu ia ˈna ia haere tamau mai na muri ia tatou i roto i te pororaa e i roto i te tahi o ta tatou mau haapiiraa aore ra mau hoˈi-faahou-raa e farerei? (Hiˈo Te Pare Tiairaa no te 1 no titema 1989, api 31, [vea farani].) Oia hoi, ia aravihi anaˈe te feia faaroo apî, te faaitoito ra anei tatou ia ratou na roto i te vaiihoraa ia ratou ia ite roa ˈtu i te tahi mau faahopearaa maitai o ta tatou ohipa pororaa?—Mataio 28:19, 20.
Mea tia mau â ia imi ia Iehova
18. Mea nafea to Iehova faaiteraa i to ˈna aroha i te huitaata nei?
18 Auaa te tusia taraehara o Iesu Mesia, e farii Iehova i te faaore i ta tatou mau hara i rave i mutaa ihora e ta tatou mau hapa mai te peu e e tatarahapa tatou e e faatupu tatou i te faaroo. A tapao na i te mau parau a Davida: “Aita aˈenei oia i tahoo mai ia tatou e ia faito i ta tatou mau hara, aore hoi i faautua mai ia tatou e ia faito i to tatou mau ino. Mai te teiteiraa o te mau raˈi i nia i te fenua nei, mai te reira te rahi o to ˈna aroha i te feia i mǎtaˈu ia ˈna ra: mai te hitia o te râ e taa ê i te tooa o te râ ra, o ta ˈna ia faataa-ê-raa i ta tatou mau hara ia tatou nei. Mai te aroha o te metua i ta ˈna ra mau tamarii, o to Iehova ïa aroha i te feia mǎtaˈu ia ˈna ra. Ua ite hoi oia i to tatou huru; te manaˈo ra oia e, e repo tatou nei.”—Salamo 103:10-14; Hebera 10:10, 12-14.
19. Eaha te faaitoitoraa no te feia o tei atea ê i te parau mau?
19 O Iehova mau â te Atua hamani maitai e te aroha. Ia haere atu tatou ia ˈna ra ma te haehaa e te tatarahapa, e faaore oia e e haamoe atoa oia i te hapa. Eita o ˈna e inoino noa i te taata hara na roto i te haamauiuiraa ia ˈna i roto i te poauahi e a muri noa ˈtu. Aita, mai ta Iehova râ i faaite: “O vau, O vau nei â; o tei parai i ta oe ra mau parau ino no ˈu iho, e ore hoi au e manaˈo faahou i ta oe ra mau hara.” Auê ïa faaitoitoraa no te feia o tei atea ê i te parau mau e o tei ore i haapao i to ratou taairaa e o Iehova! Te faaitoito-atoa-hia ra ratou ia imi ia Iehova i teie nei iho â e ia hoˈi faahou mai no te apiti ma te itoito i te nunaa i mairihia i to ˈna iˈoa.—Isaia 43:25.
20, 21. (a) Eaha te hiˈoraa itoito mau tei itehia i Iuda tahito ra? (b) Eaha te tia i te feia no Iuda ia rave ia noaa ia ratou i te haamaitairaa a Iehova?
20 I roto i teie tuhaa, ua riro te arii o Asa no Iuda i tahito ra ei hiˈoraa faaitoito mau. Ua faaore roa oia i te haamoriraa hape i roto i to ˈna basileia, teie râ, ua toe mai â te mau toetoea o te haamoriraa etene. Te faataa maira te aamu o te Paraleipomeno 2, 15:2-4, i te mau parau a te peropheta Azaria ia Asa ei haamanaˈoraa: “Tei pihaiiho Iehova ia outou, outou i ati mai ia ˈna ra; ia imi outou ia ˈna, e itea ïa oia e outou: ia faarue râ outou ia ˈna, e faarue atoa oia ia outou. E rave rahi hoi te mahana, aita o Iseraela Atua mau . . . To ratou ra ahoahoraa ra, ua fariu ratou i te Atua o Iseraela ia Iehova, e ua imi ratou ia ˈna, itea ihora oia e ratou.”
21 Aita o Iehova i tapuni i te arii Asa teie râ ‘ua itea ihora oia e ana.’ Eaha te huru o te arii i mua i teie poroi? I roto i teie â pene, te pahono ra te mau irava 8 e te 12 e: “E ite aˈera Asa i teie nei parau . . . , ua faaitoito ihora oia, e ua hopoi ê atura i te mau idolo faufau no te fenua atoa ra . . . Ua patu faahou ihora i te fata a Iehova i mua i te poretiko o te fare o Iehova. Ua faaau ihora [Iuda] i te parau e imi i te Atua o to ratou mau metua ia Iehova, ma to ratou aau atoa e to ratou varua atoa.” Oia, ua imi mau â ratou ia Iehova “ma to ratou aau atoa e to ratou varua atoa.” Eaha tei roohia i te nunaa? Te na ô ra te irava 15 e: “Oaoa aˈera Iuda i taua tǎpǔ ra; ua tǎpǔ hoi ratou ma te aau atoa, e ua imi ratou ia ˈna ma te hinaaro atoa; e ua itea hoi oia e ratou; e ua horoa mai Iehova i te hau ia ratou e ati noa ˈˈe.”
22. Eaha te mea e faaitoito ia tatou ia rohi i teie nei iho â i roto i te taviniraa a Iehova?
22 Inaha, e ere anei ïa i te hoê faaitoitoraa no tatou paatoa ia tutava no te turu i te haamoriraa viivii ore a Iehova? Ua ite tatou e te toe nei â te mau mirioni taata o te nehenehe e haamori ia Iehova. Ma te feaa ore, e rave rahi o ratou teie e taui nei i to ratou oraraa no te auraro i te mau titauraa a te mau Papai no te taviniraa ia Iehova. Te haere nei vetahi i mua i te pae no te maramarama e te faaroo, te imi nei ia Iehova e e fatata roa ratou i te turaihia ia paraparau i te reo viivii ore e te tahi atu taata na roto i te afairaa ˈtu i te ite hohonu o te parau mau no nia ia Iehova e to ˈna Basileia. E no te aha e mea faufaa ia imi tatou paatoa ia Iehova i teie nei i te taime e nehenehe â oia e itea mai? No te mea te fatata maira ta ˈna ao apî i tǎpǔhia maira!—Isaia 65:17-25; Luka 21:29-33; Roma 10:13-15.
Te haamanaˈo ra anei outou?
◻ O vai te faaite ra i te tâuˈa ore i nia i te Atua mau, o Iehova?
◻ Mea pinepine te haapaoraa i te ohipa i nia i te haerea i roto i teihea faito?
◻ Eaha te maraaraa e nehenehe e itehia ˈtu i rotopu i te mau Ite itoito?
◻ No te aha e tia ˈi ia faaitoito e ia rave i te ohipa i teie nei iho â?
◻ No te aha e mea tia mau â ia imi ia Iehova?
[Hohoˈa i te api 5]
E riro mai paha e rave rahi mau hoa o te mau Ite no Iehova tei tae mai i te oroa Haamanaˈoraa, ei mau tavini a te Atua
Rahiraa taata i te oroa Haamanaˈoraa 1990: 9 950 058
Numera rahi roa ˈˈe o te feia poro no 1990: 4 017 213
[Hohoˈa i te api 7]
I te tau o te arii Asa ra, ua fariu te nunaa i nia ia Iehova