Eaha to outou ite no nia i te Bibilia?
‘Te buka a Toma? Mea papu, tei roto i te Bibilia. Aita râ te buka a Iona i roto. Te vahi fanauraa o Iesu? O Ierusalema — aore ra o Nazareta? Aita vau i papu e tei roto anei te buka a Isaia i te tuhaa matamua aore ra te piti o te tuhaa o te Bibilia. E hia rahiraa aposetolo? Aita roa ˈtu vau i ite.’
“AITA teie mau pahonoraa e faatupu i te maere mai te peu e ua faaroohia te reira i rotopu i te feia e ere i te kerisetiano, ta te vea ra Christianity Today e parau ra. Te mea maere râ — e te huru ê — o te faito ïa o te ite-ore-raa i te mau Papai i rotopu i te mau kerisetiano fanau-faahou-hia.”
Ei hiˈoraa, ua manaˈo 22 % o te feia e faahua parau ra e kerisetiano ratou o tei uiuihia, e te vai mau ra te hoê buka a Toma i roto i te Bibilia, area 13 % aita ïa ratou i nehenehe e haapapu mai. No te buka a Iona, ua parau 27 % e aita to roto i te Bibilia, e ua parau 12 % e aita ratou i ite. Aita e ono i nia i te hanere i ite noa ˈˈe i te vahi fanauraa o te Mesia, area ua parau 16 % e tei Ierusalema e 8 % tei Nazareta. Aita i iti aˈe i te 13 % tei ore i ite i tei te hea vahi te buka a Isaia i roto i te Bibilia, area ua manaˈo 11 % e tei roto i te mau Papai heleni kerisetiano (“Faufaa Apî”). E i te mea e ua ite te rahiraa e te vai ra 12 aposetolo, ua horoa ïa 12 % o te feia i uiuihia i te tahi atu numera, mai te 2 e hau atu i te 20, e aita 10 % i nehenehe e pahono.
Te uiraa fifi roa ˈˈe, o te iteraa ïa e te vai ra anei te parau tuiroo ra “A tauturu ia oe iho, e na te raˈi e tauturu ia oe” i roto i te Bibilia aore ra eita. E 38 % o te mau “kerisetiano” i uiuihia o tei ite e aita teie parau i roto i te Bibilia, e e rave rahi hoi (42 %) o ratou tei manaˈo e e faahitiraa bibilia te reira. Aita te toea i ite i te pahonoraa.
“No te aha ïa ua iti te ite no nia i te Bibilia? ta te Christianity Today e ani ra. Mea papu maitai e no te mea e aita e taio-rahi-hia i te reira. Aita te afaraa o te feia Marite e taio ra i te Bibilia. E taio te rahiraa o te mau kerisetiano fanau-faahou-hia hoê aore ra e piti taime i te hebedoma, aore ra aita roa ˈtu. E ere atura ïa i te mea maere te itiraa o te ite o e rave rahi o te mau kerisetiano no nia i te mau Papai!”