O vai te Atua tei tia ia haamori?
I TE taime matamua, eaha te Atua otahi roa tei tia ia haamorihia? Te pahono ra te Bibilia ma te maramarama maitai i taua uiraa ra. Teie ta tatou e taio ra i roto i te buka o te Apokalupo: “E au te hanahana ia oe, e [Iehova], e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ˈi ratou.” (Apokalupo 4:11). Oia mau, o Iehova anaˈe te Poiete, te Atua otahi roa tei tia ia tatou ia haamori. No te aha? E tuatapapa faahou tatou i teie uiraa i mua ˈtu. Na mua roa râ, e paraparau anaˈe na no nia i te tahi atu mau atua ta te huitaata e haamori ra.
Te mea e tapuni nei i muri i te mau atua haavare atoa ra
Noa ˈtu e te haamori nei te mau taata e rave rahi mau atua, te haamoriraa tei horoahia i te mau atua atoa o te mau nunaa — taa ê atu i te haamoriraa e pûpûhia na Iehova, te Poiete — te tavini ra ïa te reira i te opuaraa a te hoê noa iho atua. Nafea ïa te reira? E hiˈo anaˈe na e eaha ta te aposetolo Paulo i papai i te mau kerisetiano no Korinetia. I roto i taua oire ra, te haamorihia ra e rave rahi mau atua, mai te ruahine ra ohipa hairiiri o Aphrodite e tae roa ˈtu ia Esculape, te atua no te faaoraraa. Teie nei râ, ua faaite o Paulo e te vai ra te hoê anaˈe puai otahi roa o te afai mai i te pohe teie e tapuni nei i muri i taua mau atua ra. Ua papai aˈera oia e: “Ta te Etene i faatusia ra, i faatusia ïa na te mau demoni, e ere na te Atua.” (Korinetia 1, 10:20). O te mau demoni ïa ta te feia no Korinetia i haamori na ma te ora i roto i te mau peu etene.
Ua fa mai te mau demoni i muri aˈe i te hoê orureraa hau. Te demoni matamua e te rahi aˈe i rotopu ia ratou, o te melahi ïa o tei turai ia Eva ia ofati i te ture a te Atua i roto i te ô i Edene ra (Genese 3:1-6; Ioane 8:44). Ma te na reiraraa, ua patoi ihora taua poieteraa ra i te mana arii o te Poiete. I muri iho, ua piihia ˈtura oia Satani, oia hoi te auraa “Patoi”. I roto i te roaraa o te tau, ua amui atoa te tahi atu mau poieteraa ia ˈna i roto i ta ˈna orureraa hau. E ua riro atoa mai ratou ei mau demoni, e ua piihia o Satani te ‘raatira o te mau demoni’. (Mataio 12:24, 26.) I roto i te buka o te Apokalupo, ua piihia taua mau demoni ra te mau “melahi” a Satani (Apokalupo 12:7). No reira, ia haamori-anaˈe-hia te mau demoni, o Satani ïa te haamorihia ra.
E mana rahi mau to Satani. Ua parau te aposetolo Ioane e te vai noa nei to “te ao atoa” i raro aˈe i to ˈna mana, e ua pii o Paulo ia ˈna “te atua o teie nei ao”. (Ioane 1, 5:19; Korinetia 2, 4:4.) No reira, te haamoriraa i pûpûhia ˈtu na te hoê atua taa ê atu ia Iehova, i te tupuraa mau, te pûpûhia ra ïa na Satani. I roto i te mau tupuraa atoa, te tavini nei taua peu ra i te opuaraa a Satani, o te hinaaro nei e turai i te mau tamarii a Adamu e a Eva ia patoi atu ia Iehova. I te mea e ‘te haavare nei [o Satani] i to te ao atoa nei’, mea maramarama atura ïa e ua upootia oia i roto i te rahiraa o te mau tupuraa (Apokalupo 12:9). Aita râ i roto i te taatoaraa. Te tutava nei te tahi tau mirioni taata i te haamori ia Iehova. No te aha?
Te mau hotu o te haamoriraa hape
I te hoê pae, ua ite ratou e rave rahi ta ratou e haamâuˈa ia haamori anaˈe ratou i te tahi atu mau atua maoti ia Iehova, e aita ratou i ineine i te aufau atu i te reira. Ua itehia na roto i te mau maimiraa i te pae no te ihipǎpǎ i ravehia i Carthage, i te fenua Afirika Apatoerau, i te hoê hunaraa maˈi tamarii. Ua itehia te mau ivi tamarii i faatusiahia no te atua etene ra o Baala. Ua riro te mau tusia tamarii ei faahopearaa teimaha mau ta te feia no Carthage i aufau i te haamoriraa ia Baala. Mea teimaha atoa te mau haamauiuiraa rahi ta te katolikaraa i faatupu i nia i te huitaata i roto i ta ˈna mau aroraa o tei haamanii i te toto aore ra na roto i te Tiribuna rahi taehae a te katolika. Area te haamoriraa i te mau atua inca faaohipahia i te fenua Marite na mua ˈˈe i te haereraa mai o Christophe Colomb, ua titau ïa te reira i te peu faatusiaraa o te mau tausani taata.
Aita i maoro aˈenei, ua aratai e rave rahi mau huru haamoriraa i te tahi mau taparahiraa taata rahi i te fenua Inidia e ua rave te reira e ia ino roa te mau fifi i te pae politita i Moyen-Orient e i te fenua Irerane Apatoerau. Tei roto atoa te ite ore, te peu tiaturiraa tumu ore e te mǎtaˈu, i te hoo ta te taata e aufau nei no te haamoriraa i ta ˈna mau atua e rave rahi.
No te aha e tia ˈi ia tavini ia Iehova?
Taa ê atu, te hopoi noa nei te haamoriraa ia Iehova i te mau haamaitairaa. No te mea, i te hoê pae, o O ˈna “Te tia i te oraraa e a muri noa ˈtu, o tei hamani i te raˈi, e te mau mea atoa i roto ra, e te fenua, e te mau mea atoa i roto ra”. (Apokalupo 10:6.) No reira, e tia ia tatou ia haamori ia ˈna no te mea o o ˈna to tatou Poiete.
I te tahi atu pae, e tia ia tatou ia haamori i te Atua ra o Iehova no te mea e na to ˈna mau huru maitai e turai nei ia tatou ia na reira. Ua parau hoi te aposetolo Ioane e “e aroha hoi te Atua”. (Ioane 1, 4:8.) Ua parau hoi te taata haapao maitai ra o Ioba no “te paari o te aau e te mana o te puai [o te Atua]”. (Ioba 9:4.) Ua himene o Mose no nia ia ˈna e: “Oia te Mato, o tei tia roa ta ˈna ohipa ra; o tei au atoa to ˈna ra mau haerea; e Atua parau mau, e te ino ore ra; e parau-tia ta ˈna e te titiaifaro!” (Deuteronomi 32:4). O vai o te ore e hinaaro e tavini i te hoê Atua mai te reira te huru?
Hau atu, te taio nei tatou i roto i te Bibilia e: “Area te paieti ra, e faufaa ïa to te reira i te mau mea atoa nei, e maitai tei faaitehia mai no te reira i teie nei ao e te ao a muri atu.” (Timoteo 1, 4:8). Auê hoi te parau mau o te reira e! Te hinaaro nei o Iehova i te maitai no te huitaata nei. Ua poiete oia no te mau taata i te hoê vahi faaearaa nehenehe mau, te fenua, e ua horoa rahi mai oia i te mau mea atoa no te rave e ia oaoa te oraraa. Noa ˈtu te orureraa hau a te taata, ua tamau â o Iehova i te atuatu i te oraraa i nia i te fenua nei, ma te horoa na te huitaata i te mea e hinaarohia e ana, “te faahiti nei oia hoi i to ˈna mahana i nia i te ino e te maitai, e te haamairi mai nei oia i te ûa i nia i te parau-tia e te parau-tia ore”. — Mataio 5:45.
Teie nei râ, e auraa rahi atu â to ‘te parau tǎpǔ no teie nei oraraa’. Te horoa nei te taviniraa i te Atua i te oaoa e te taoˈa rahi. Ua faataahia hoi tatou no te rave i te reira. Hau atu, te tauturu nei te Atua i te feia e tavini nei ia ˈna ma te haapao maitai ia manuïa i roto i to ratou oraraa. Na roto i te arai o te Bibilia, te horoa nei oia i te mau aˈoraa i te feia atoa: te feia e faaea taa noa, te feia i faaipoipohia, te mau tamarii — noa ˈtu eaha to ratou huru i te pae totiale. Te horoa nei oia i te hoê paari papu e te ohie no te tauturu ia tatou, i roto i te mau huru tupuraa atoa, ia faaruru i te mau fifi ta tatou e nehenehe e ite i roto i to tatou oraraa taata tia ore, ma te ite e te ora nei tatou i roto i te ao tei arataihia e Satani. Mai te peu e e haamori tatou i te Atua na roto i te huru ta ˈna e titau ra, e nehenehe e roaa ia tatou “te hau a te Atua, o tei hau ê atu i te ite taata nei”. — Philipi 4:7.
Mea faahiahia atoa ‘te parau tǎpǔ no te oraraa no a muri aˈe’. Ua parau o Iesu i te Pharisea ra o Nikodemo e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16). Te ora mure ore! O vai atua taa ê atu ia Iehova, o te nehenehe e tǎpǔ mai i te reira e o te nehenehe e tapea i ta ˈna parau tǎpǔ? Ua faataahia te huru hopea o te feia e roaa ia ratou taua ǒ faahiahia mau, i roto i te Apokalupo, na roto i teie mau parau e: “E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.” (Apokalupo 21:4, 5). Oia mau, e tia i te mau parau tǎpǔ no te oraraa no a muri aˈe ia turai ia tatou ia hinaaro e tavini ia Iehova!
No reira ˈtura, teihea ïa Atua tei tia ia haamorihia? O Iehova ïa, te Poiete, e aita ˈtu. E tano ia ˈna anaˈe teie mau parau e: “E ohipa rahi e te faahiahia ta oe, e te Fatu ra, e te Atua Mana hope ra e; e haerea tia e te parau mau ta oe, e te Arii o te feia moˈa ra e. O vai hoi te ore e mǎtaˈu ia oe, e te Fatu e, e te faahanahana i to oe iˈoa? o oe anaˈe hoi tei maitai roa: e hope atoa te mau fenua i te tae mai i mua i to aro ra a haamori ai: ua faaitehia ta oe ra mau utua tia.” (Apokalupo 15:3, 4). Auê hoi te huru paari o te feia e pahono ra i teie aˈoraa a te papai salamo e: “E haere mai tatou, e haamori ma te piˈo i raro; e tuu i to tatou turi i te aro o tei hamani ia tatou nei, ia Iehova.” — Salamo 95:6.
[Hohoˈa i te api 6]
Te tahi o te mau atua ta Satani i turai i te huitaata ia haamori.
[Hohoˈa i te api 7]
E tia i te tiaturiraa i te ora no a muri aˈe, ia turai ia tatou ia hinaaro e tavini ia Iehova.