Te mau taurearea e tavini nei i te Atua

MEA huru ê anei na outou e ia horoa te mau taurearea hiˈoraa maitai i to ratou taime, ma te ore e aufauhia, no te haere mai i to outou fare no te paraparau no nia i te Atua? Mea maere anei, i te hoê tau e aita te taata e tiaturi faahou ra, ia apiti te mau tamarii i to ratou metua no te aparau e o vetahi ê no nia i te mau parau tǎpǔ faahiahia a te Bibilia no te oraraa oaoa no a muri aˈea?

I roto i te rahiraa o na 60 000 amuiraa a te mau Ite no Iehova i roto i te ao nei, e nehenehe e itehia e rave rahi taurearea. Aita ratou e haere i te hoê haapiiraa sabati i te mau hebedoma atoa, aore ra i te haapiiraa ui. Te fanaˈo ra râ taua mau taurearea ra i te mau putuputuraa o ta ratou amuiraa e te apiti atoa ˈtu nei ratou. Te horoa nei te mau tamarii rii i te mau pahonoraa poto noa. Te apiti nei te mau tamarii paari aˈe i te Haapiiraa o te Taviniraa Teotaratia. Te haafaufaa nei e rave rahi taurearea i te mau tau faafaaearaa haapiiraa no te tauturu i to ratou taata-tupu no te haapii i te parau no nia i te Atua e ta ˈna mau parau tǎpǔ faahiahia no a muri aˈe.

Ma te papu, e ere roa ˈtu taua ohipa ra e ravehia nei e te mau taurearea, i te mea apî. Te faahiti ra te Bibilia i te parau no te mau taurearea tane e te mau taurearea vahine haapao maitai, mai te mau taurearea e te mau tamarii rii, o te horoa i te mau hiˈoraa maitai i roto i te taviniraa i te Atua.

Ua faaite atea mai te buka bibilia a te mau Salamo no te hoê ‘pǔpǔ taurearea’, o te rahi hoi e te haumǎrû mai te mau ‘topata hupe’, i roto i te taviniraa a te Atua. Ua parau-atoa-hia no te mau “taata apî” e te mau “paretenia” e haamaitai ra i te iˈoa o te Atua (Salamo 110:3; 148:12, 13). Tei rotopu atoa paha te tahi mau taurearea i te feia i putuputu mai, a ninii ai te Atua i to ˈna varua moˈa i nia i te feia faaroo i te Penetekose o te matahiti 33 o to tatou nei tau. I taua mahana ra, ua farii fatata e 3 000 taata i te Parau e ua bapetizohia ratou. Hau atu, ua parau te aposetolo Petero e te faatupu ra taua ohipa maere mau ra i teie parau tohu a Ioela e: “Na to outou mau tamarii tamaroa ra e te mau tamahine e tohu, e e ite hoi to outou mau taata apî ra i te orama, e to outou hoi mau taata ruhiruhia ra, e taotootoahia ïa.” — Ohipa 2:4-8, 16, 17, 41.

Te vai ra i roto i te Bibilia e rave rahi hiˈoraa bibilia o te mau taata i tavini i te Atua ra o Iehova i to ratou apîraa, e nehenehe e faahiti ia Samuela, te arii parau-tia ra o Davida, te mau peropheta matau-maitai-hia ra o Ieremia e o Daniela, e tae atu i te taata haapao maitai ra o Timoteo. Te vai ra i roto i teie vea e toru tumu parau e tuatapapa ra no vetahi o taua mau hiˈoraa maitai ra. E ite outou i roto i taua mau tumu parau ra e no te aha te tahi mau taurearea, mai te mau taata paari aˈe, e haapao maitai ai i ta ratou taviniraa i te Atua e no te aha ratou e faaohipa ˈi i taua rahiraa taime ra no te tauturu i to ratou taata-tupu ia na reira atoa.

[Nota i raro i te api]