Te haamanaˈo ra anei outou?

Ua taio maitai anei outou i na numera hopea o Te Pare Tiairaa? A hiˈo mai te peu e te haamanaˈo ra outou i te tahi mau manaˈo i horoahia i muri nei.

◻ I roto i te Timoteo 1, 2:5, 6, te faaohipa ra Paulo i te parau ra “arai” no nia ia Iesu. I roto i tei hea auraa?

I roto i teie irava, te faaohipa ra Paulo i te parau heleni ra mésitês, hurihia na roto i te parau “arai”, e auraa i te pae haavaraa to ˈna. Aita oia e faaohipa ra i roto i te auraa taatoa ta e rave rahi mau reo e horoa ra. No reira, aita o Paulo e parau ra e e Arai o Iesu i rotopu i te Atua e te taatoaraa o te mau taata. Te faaau nei râ oia ia Iesu mai te Arai maitihia no te faufaa apî, o tei tuu i te niu ia nehenehe te mau pǐpǐ i faatavaihia a te Mesia ia apiti e o ˈna i roto i to ˈna Basileia i nia i te raˈi (Korinetia 2, 5:1, 5; Ephesia 1:13, 14; Hebera 8:7-13). — 15/8, api 30, 31 (na roto i te reo farani).

◻ I roto i te Mataio 25:34, eaha te auraa o taua mau parau a Iesu i te mau “mamoe”: “E parahi i te basileia i haapaohia no outou mai te hamaniraa mai o te fenua nei ra”?

Aita o Iesu e hinaaro ra e parau e e faatere taua mau “mamoe” e o ˈna i roto i te raˈi, e roaa râ ia ratou te tuhaa i nia i te fenua nei o te Basileia tei faaineinehia no ratou “mai te hamaniraa mai o te fenua nei ra” o te mau taata te nehenehe e hoohia mai. Na roto i taua ravea ra, e riro mai ratou ei mau tamarii no te fenua nei no to ratou “Metua no te ui a muri atu”, te arii ra o Iesu Mesia (Isaia 9:6, 7). — 1/9, api 10, par. 9.

◻ Mea faufaa anei e ia ora mai te mau melo o te toea i faatavaihia i nia i te fenua nei no te farii mai, i to ratou tia-faahou-raa, i te mau tavini haapao maitai tei pohe na mua ˈˈe i te matahiti 33 o to tatou nei tau?

Aita, aita e riro i te mea faufaa. E rave rahi mau melo o te nahoa rahi o te ora ˈtu i te ati rahi, te roaa nei ia ratou i teie mahana i te hoê haapiiraa o te faatia ia ratou ia amo i te tahi mau hopoia i roto i te amuiraa. No reira, e nehenehe atura ïa ia ratou e haapao i te mau taata tei faatia-faahou-hia e no te faaite atu ia ratou i te “fenua apî” arataihia e te “raˈi apî”. (Petero 2, 3:13.) — 1/9, api 10, 11.

◻ Eaha te tia ia rave no te “ora” mai (Ohipa 16:30)?

Te ravea matamua, teie ïa: “E faaroo i te Fatu ia Iesu Mesia, e e ora ïa oe e to fetii atoa.” (Ohipa 16:31). Te haapapuhia nei e e tia ia noaa i te hoê ite mau no nia i te mau opuaraa a te Atua e te ravea no te ora. I muri iho, e tia ia faaohipa i te faaroo i roto ia Iesu Mesia, te Mauhaa matamua o te ora (Ioane 3:16; Tito 2:14). Te tomo nei te kerisetiano i roto i te hoê huru taata tei faaorahia, e tia râ ia ˈna i teie nei, i te toea o to ˈna oraraa, ia tamau â i roto i te faatupuraa i te hinaaro o te Atua e ia tamau â i te faaite i te mau huru atoa e anihia e te Atua. I reira noâ e roaa mai ai ia ˈna i te ora mure ore (Mataio 24:13). — 15/9, api 7 (na roto i te reo farani).

◻ I roto i tei hea auraa te faaroo o Noa i faautua ˈi i te ao (Hebera 11:7)?

Ua faaite aˈera te faaroo e te mau ohipa parau-tia a Noa e ua nehenehe te tahi mau taata e ora mai i te diluvi, mai ia ˈna e to ˈna utuafare, mai te peu e ua hinaaro ratou e taui i to ratou huru oraraa. Ua haapapu o Noa e, noa ˈtu te mana o te tino taata hara, o te ao e haaati ia ratou e o te Diabolo, ua nehenehe te mau taata e pee i te hoê oraraa e auhia mai e te Atua. — 1/10, api 11 (na roto i te reo farani).

◻ No te aha e tia ˈi ia tatou ia faaore i te paraparauraa, noa ˈtu e mea hauti noa?

Peneiaˈe e parau tatou i te hoê faahiˈoraa e ere no te haamauiui, e e nehenehe taua paraparauraa ra e ere hoi i te mea ino e riro ei huru ino mai te peu e e faatia-noa-hia, e faanehenehe-maitai-hia aore ra e tauihia te auraa, e tae roa i te taime e e faaorehia te roo o te taata tei paraparauhia, ma te tatara atu i to ˈna iˈoa nehenehe (Maseli 20:19). — 15/10, api 13 (na roto i te reo farani).

◻ Eaha te faufaa ia faatupu anaˈe e piti na hoa faaipoipo i te hoê ‘amuiraa au maitai’?

E nehenehe na hoa e faaitoito te tahi e te tahi no nia i te haamoriraa i to raua Atua. Hau atu, e nehenehe raua e rave mai i te mau Papai no te faaafaro i to raua mau fifi. — 1/11, api 20 (na roto i te reo farani).

◻ Mea nafea te mau Ture Ahuru e nehenehe ai e tauturu ia tatou i teie nei mau mahana?

Te faaite nei te reira e mea nafea Iehova ia hiˈo i te mau mea e ua riro ei mau haamanaˈoraa faufaa roa no to tatou tiaraa ia here atu i te Atua e i to tatou taata-tupu (Mataio 22:37-39; Timoteo 2, 3:16, 17). — 15/11, api 5, 6 (na roto i te reo farani).

◻ Eaha na taime e toru to Iehova paraparauraa ia nehenehe oia e faaroohia e Iesu e te tahi atu mau taata?

Te taime matamua, i te taime ïa o Iesu i bapetizohia ˈi e Ioane Bapetizo (Mataio 3:17); te piti, a faahuru-ê-hia ˈi o Iesu a hiˈo noa ˈi o Iakobo, o Ioane, e o Petero (Mataio 17:5); e te toru, i te 10 no Nisana, e maha mahana hou Iesu i pohe ai, a faaroo ai te hoê nǎnǎ rahi taata o te tia noa ra i roto i te hiero, i te reo o te Atua (Ioane 12:28). — 1/12, api 8 (na roto i te reo farani).