‘A faahiti i te Parau a te Atua ma te mǎtaˈu ore’

E NEHENEHE ta te Atua ra o Iehova e horoa na ta ˈna mau tavini i te puai no te ‘faahiti i ta ˈna parau ma te mǎtaˈu ore’. (Ohipa 4:31.) Oia atoa te feia no ite noa ˈtura i te parau mau bibilia e aitâ ratou i aravihi maitai atura i roto i te ohipa pororaa, e tia atoa ia ratou ia faaitoito i te faaite i te parau apî ma te mǎtaˈu ore. I te fenua Côte d’Ivoire, ua haere e piti na taata poro i te parau apî maitai i tera uputa e tera uputa, e ua farerei aˈera raua i te hoê orometua no te fare haapiiraa tuatoru. No te mea e ua manaˈo oia e aita ta ˈna e nehenehe e paraparau atu i te hoê taata ite maramarama roa, ua vaiiho atura o Seriki, te Ite apî aˈe, e na to ˈna hoa e paraparau.

Ua inoino roa taua orometua ra no te au-ore-raa i te pae o te iri e itehia ra, e ua parau oia e na te Atua, i to ˈna poieteraa e rave rahi mau iri taa ê, i faatupu i te mau arepurepuraa i te pae o te mau nunaa. I muri aˈe i te hoê aparauraa e aita e faaotiraa, ua faaitoito aˈera o Seriki, e ua faaô atura ia ˈna ma te peu maitai i roto i te aparauraa (Tesalonia 1, 2:2). Ma te huti i te manaˈo o te orometua i nia i to ˈna fare tei faaunaunahia e te mau huru peni au maitai, ua ani aˈera oia e: “No te aha aita oe i tuu i te hoê â peni i nia i to oe fare atoa?”

“Te manaˈo nei oe e, e maamaa vau?” pahono aˈera te orometua. Ua parau aˈera o Seriki e: “Aita, no te aha ïa e tia ˈi i te Atua ia poiete i te mau mea atoa e te hoê â peni?” Ua tano maitai te haaferuriraa. Ua tapae roa taua faahohoˈa ra i to ˈna tapao, e ua nehenehe atura ia Seriki i te horoa ˈtu i te hoê faaiteraa maitai, o ˈna o tei mǎtaˈu i te paraparau i te omuaraa.