A tiaturi ia Iehova
“E tiaturi ia Iehova, a rave ai i te parau maitai; (...) e haapopou atu hoi oe ia Iehova, e na ˈna e horoa mai i ta to aau e hinaaro ra.” — SALAMO 37:3, 4.
1, 2. a) Eaha hoi tei roohia i te senekele 1 i nia i te feia i ore i tiaturi ia Iehova, e eaha tei roohia i nia i te feia i tiaturi ia ˈna? b) I to tatou nei tau, eaha te mau uiraa ta tatou e nehenehe e aniani no nia i te mau haapaoraa?
I TE SENEKELE matamua o to tatou nei tau, i faahua haamori na te mau upoo faatere haapaoraa ati iuda i te Atua, aita râ hoi ratou i tiaturi ia ˈna: aita ratou i haapao i ta ˈna mau faaueraa e i hamani ino na hoi ratou i to ˈna mau tia (Mataio 15:3; Ioane 15:20). No reira, ‘ua faaruehia maira to ratou utuafare’ e Iehova (Mataio 23:38). I te matahiti 70, ua haamou aˈera te mau nuu roma ia Ierusalema e ta ˈna hiero, o tei haapohe e rave rahi mau faatere haapaoraa e ta ratou mau pǐpǐ. Ua paruruhia râ te feia i tiaturi na ia Iehova, inaha, ua faaroo ratou i te faaararaa a to ˈna mau afai parau e ua haapû ratou i roto i te hoê vahi papu. — Mataio 24:15-22; Luka 21:20-24.
2 I teie mau mahana hopea o te amuiraa o te mau mea nei, te tuu ra anei te mau haapaoraa o te ao nei i to ratou tiaturiraa i nia ia Iehova, te Atua mau? Te auraro ra anei ratou i ta ˈna mau faaueraa e te faatupu ra anei ratou i to ˈna hinaaro, aore ra te pee ra anei ratou i te haerea o te mau upoo faatere haapaoraa o te senekele 1 ta te Atua i faarue? Eaha te haapaoraa, i to tatou nei tau, o te nehenehe e tiaturi e fanaˈo oia i te parururaa a te Atua no te mea te ‘tiaturi ra oia ia Iehova e a rave ai i te parau maitai’? — Salamo 37:3.
O vai teie e faaohipa nei i te here taeae?
3. No te aha te Atua i ore ai i haamaitai i te mau tutavaraa a te mau haapaoraa o te ao nei no te faatupu i te hau?
3 Aita i maoro aˈenei, ua faaite mai te pâpa Ioane-Paulo 2 e “tei roto te ora o te huitaata atoa nei i te fifi rahi roa”. Ua tuu oia i te tapao i nia i “te mau faahopearaa i noaa mai e te mau pǔpǔ faaroo taa ê ia tahoê ratou no te tamata i te faaore i taua fifi ra”. O te hinaaro hoi o te Atua, ta ˈna ïa i parau, ia “ohipa amui” te mau tia faaroo no “te hau e te autahoêraa”. Teie râ, mai te peu e te reira mau to ˈna hinaaro, no te aha ïa te Atua i ore ai e haamaitai i te mau tutavaraa i ravehia i roto i taua tuhaa ra a hia ˈtura senekele i teie nei? No te mea aita taua mau haapaoraa ra i tiaturi mau i te ravea ta te Atua i haapao no te haamau i te hau: to ˈna Basileia i te raˈi ra (Mataio 6:9, 10). Maoti te reira, te turu nei ratou i te ohipa politita e te mau tamaˈi a te mau nunaa. No reira, i roto i te roaraa o te mau tamaˈi, ua taparahi pohe roa te feia faaroo o tera nunaa i te feia faaroo o tera nunaa, e ua taparahi pohe roa atoa hoi ratou i te mau taata hoê â haapaoraa e ta ratou. No reira, ua taparahi pohe atura ïa te katolika i te katolika, te mau porotetani i te mau porotetani, e mai te reira atoa hoi te huru i roto i te tahi atu mau haapaoraa. Teie râ, e nehenehe anei te mau taeae varua mau e taparahi pohe roa te tahi e te tahi a faahua tavini noa ˈi i te Atua?
4. Ia au i ta Iesu i parau, eaha te tapao o te haapaoraa mau, e no te aha hoi i riro ai ei “parau apî”?
4 Ua haamau Iesu i te tapao o te haapaoraa mau ia ˈna i parau atu i ta ˈna mau pǐpǐ e: “E tuu atu vau i te parau apî na outou, E aroha outou ia outou iho, mai ia ˈu e aroha ˈtu ia outou na, e aroha atoa hoi outou ia outou iho. O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:34, 35). No reira, te feia e faaohipa i te haapaoraa mau, e tia ïa ia ratou ia here te tahi e te tahi. E “parau apî” teie, inaha ua na ô maira Iesu e: “Mai ia ˈu e aroha ˈtu ia outou na, e aroha atoa hoi outou ia outou iho.” Ua ineine noa Iesu i te horoa i to ˈna ora no ta ˈna mau pǐpǐ; e ia ineine atoa ïa ratou i te na reira: eiaha i te haapoheraa i to ratou mau hoa i te faaroo ra, ia faatusia râ ratou ia ratou, mai te peu e e tia. I roto i taua tuhaa ra teie parau e riro ai ei parau apî, inaha aita hoi te Ture a Mose i tapae roa i nia i taua faito ra.
5. Mea nafea, i roto i ta ˈna Parau, to te Atua faaiteraa e e tia mau â ta ˈna mau taata haamori mau ia tahoêhia e te aroha?
5 Teie te nehenehe e taiohia i roto i te Parau a te Atua: “Ia parau te hoê taata e, Te hinaaro nei au i te Atua; e aore oia i aroha i tana taeae, e haavare oia: o tei ore i aroha i tana taeae tei hiˈohia e ana ra, eaha e tia ˈi ia ˈna ia hinaaro i te Atua, tei ore i hiˈohia e ana ra? Teie hoi ta tatou parau i noaa mai ia ˈna ra, E o tei hinaaro i te Atua ra, ia aroha oia i to ˈna ra taeae.” (Ioane 1, 4:20, 21). Maoti taua aroha ra e ite ai te feia e tiaturi ia Iehova i te hoê autahoêraa mau i roto i te ao taatoa nei. Teie hoi ta Paulo e parau ra i roto i te Korinetia 1, 1:10: “E au mau taeae (...) e ei parau hoê ta outou atoa na, e eiaha ia amahamaha i roto ia outou: ia ati maite râ outou ma te aau hoê e te manaˈo hoê.” — Hiˈo Ioane 1, 3:10-12.
6. No te aha te mau Ite no Iehova e nehenehe ai e parau e ‘Aore roa [ratou] i viivii i te toto o te taata atoa nei’?
6 Ia au i te hoê buka (The World Book Encyclopedia), e 55 milioni taata tei pohe i te Piti o te Tamaˈi rahi. Taa ê atu i te mau Ite no Iehova, ua apiti mai te tahi mau melo o te mau haapaoraa rarahi atoa i roto i taua taparahiraa ra. Aita hoê noa ˈˈe o taua mau taata ra i haapohehia e te hoê ite no Iehova, no te mea ua auraro te mau ite i te faaueraa, oia hoi ia here ratou te tahi e te tahi e ua patoi ratou i te faaô atu i roto i te mau tamaˈi a te mau nunaa. E rave rahi o ratou tei hamani-ino-hia no te oreraa ratou i faaô atu i roto i taua mau tamaˈi ra, ua nehenehe râ ratou e parau e, mai ta te aposetolo Paulo i parau: ‘Aore roa o ˈu viivii i te toto o te taata atoa nei.’ — Ohipa 20:26.
7, 8. Eaha ta vetahi mau ekalesiatiko i parau, ma te farii e e utua toto ta ratou?
7 Teie ta te omonie katolika no roto i te nuu i tuu i te mau paura atomi i nia ia Tapone i te matahiti 1945 ra, i parau aita i maoro aˈenei: “17 senekele i teie nei to te Ekalesia faataaraa mai i te tamaˈi ma te tura. Te faatiaturi ra oia i te mau taata e e ohipa kerisetiano teie e te hanahana hoi. E haavare. Ua haavarehia matou. (...) Aita Iesu i haapii aˈenei i te parau no nia i te tamaˈi tia. (...) Aita roa ˈtu hoê noa ˈˈe mea i roto i te oraraa aore ra i te haapiiraa a te Mesia e faaite maira e mai te peu e eita e tia ia faaohipahia te paura atomi no te haapohe roa i te taata, mea tano roa ïa ia ravehia te reira na roto i te faaohiparaa i te napalm aore ra te mau mauhaa taora auahi.”
8 Teie te nehenehe e taiohia i roto i te hoê vea no Lonedona (Catholic Herald): “E faatura maite na te mau kerisetiano matamua i te mau parau a Iesu e e patoi na hoi ratou, noa ˈtu e e haapohehia ratou, i te faaô atu i roto i te nuu roma. E taa ê anei ïa te Aamu o te ao nei ahiri te Ekalesia i ati maite i taua faaueraa tumu ra? (...) Mai te peu e, i teie mahana, e patoi na ratou i te tamaˈi (...), e ia na reira paatoa to ratou mau melo, mai te mau kerisetiano matamua e haapao na i to ratou haava manaˈo, o te hau ïa te itehia i nia i te fenua nei. Ua ite râ hoi tatou e eita roa ˈtu te reira e tupu.”
9. No te aha tatou e nehenehe ai e parau e ua faarue o Iehova ta to te ao nei mau haapaoraa?
9 Ua faahapa rahi mau te mau haapaoraa o te ao nei i te mau ture a te Atua. Mai te mau Pharisea, aita ratou i tiaturi. “Te parau nei ratou e ua ite i te Atua, area ta ratou ohipa, te parau nei ïa aore i ite ia ˈna, e feia faufau e te faaroo ore, e te mau ohipa maitatai nei, aore roa ïa e au i reira.” (Tito 1:16). No reira, mai ta ˈna i faarue i te haapaoraa ati iuda haavare o te senekele 1, i to tatou atoa nei tau, ua faarue te Atua i taua mau haapaoraa ra. — Mataio 15:9, 14.
E ora mai te feia e tiaturi ia Iehova
10, 11. Eaha ta Hezekia ohipa i rave a faahepo mai ai o Asura e ia haapau o Ierusalema ia ˈna, e o vai ta te afai parau o Senakeriba e aa ra?
10 Eiaha e tiaturi i te mau ravea a te taata no te faatitiaifaro i te mau fifi o te ao nei. Ia tiaturi râ outou i Tei nehenehe e tapea i ta ˈna mau parau tǎpǔ (Iosua 23:14). A tapao na, ei hiˈoraa, i te mau ohipa i tupu i te senekele 8, hou to tatou nei tau, i te mau mahana o te arii ra o Hezekia no Iuda. Teie ta te Bibilia e parau ra no nia ia ˈna: “Ua rave oia i te parau-tia i te aro o Iehova.” (Te mau arii 2, 18:3). I te tau o Hezekia, ua aro mai te Puai rahi no Asura ra i faatere na i roto i te ao taatoa nei, ia Ierusalema. Ua faahepo maira te afai parau o Senakeriba, arii no Asura e ia haapau o Ierusalema ia ˈna. Teie ta ˈna i parau: “Te na ô maira te arii, Eiaha outou e vare ia Hezekia, e ore hoi outou e ora ia ˈna i to ˈna rima: eiaha hoi outou e vare ia Hezekia e e tiaturi ia Iehova.” — Te mau arii 2, 18:29, 30.
11 Ua aha ihora ïa o Hezekia? Teie ta te Bibilia e parau ra: “Ua pure ihora Hezekia i mua i te aro o Iehova, na ô atura, E te Atua o Iseraela, e Iehova e, e tia oe i ropu i na kerubi, o oe te Atua, oe anaˈe ra, no te mau fenua atoa o te ao nei; na oe hoi te raˈi e te fenua nei i hamani. E faarooroo mai to tariˈa, e Iehova, ia ite; e nânâ mai i to mata e hiˈo: e faaroo mai oe i te parau a Senakeriba i hapono mai e faaino i te Atua ora nei. (...) e to matou Atua, e Iehova, o ta ˈu ïa parau ia oe, e faaora oe ia matou i tana rima, ia ite te mau basileia atoa o te ao nei, e o oe anaˈe ra te Atua o Iehova.” — Te mau arii 2, 19:15-19.
12. Mea nafea to Iehova pahonoraa mai i te pure a Hezekia?
12 Ua faaroo mai Iehova i taua pure nei e ua tono maira i te peropheta ia Isaia, ia Hezekia ra e faaite atu ia ˈna e: “Te parau maira Iehova i te arii o Asura ra, e ore oia e tae mai i teie nei oire, e ore ta ˈna ohe e pee mai i reira, e ore oia e haere mai ma te paruru, e ore e faateitei i te repo i teie nei oire.” E tia anei ïa ia Hezekia ia haaputuputu i te hoê nuu no te aro atu ia Asura? Eita, e tia râ ia ˈna ia tiaturi ia Iehova; e ua na reira mau â oia. Eaha ihora ïa te ohipa i tupu? “Ua haere ihora te hoê melahi a Iehova (...) i rapae, ua rave ihora i to te puhapa asura ra hoê hanere e vau ahuru ma pae i te tausani.” Hau atu, ua faautuahia o Senakeriba i te mea e ua aro atu oia ia Iehova e i to ˈna mau tavini; inaha, ua taparahi-pohe-hia hoi oia na ta ˈna iho mau tamarii tamaroa. No reira, ia au i te parau a Iehova, aita te hoê noa ˈˈe ohe i taora-noa ˈˈe-hia i nia ia Ierusalema. — Te mau arii 2, 19:32-37.
13, 14. Eaha te tia i te mau taata o te mau nunaa atoa ia rave no te ora ˈtu i te hopea o te amuiraa o te mau mea nei?
13 E tupu te mau ohipa mai te reira te huru i to tatou nei tau. E te feia e tiaturi ia Iehova, e ora mai ïa ratou i te mau aroraa e te haamouraa o teie nei ao. “Te feia i ite i to oe ra iˈoa, e tiaturi ïa ia oe; o tei imi hoi ia oe ra, e Iehova, o tei ore roa ïa e faaruehia e oe ra.” (Salamo 9:10). Hou aˈe râ oia e haamou roa ˈi i teie nei ao ino, te titau nei Iehova i te taatoaraa o te mau taata aau tae ia haafatata mai ia ˈna e itea ˈtu ai ia ratou te hau. E “feia rahi roa” te feia e farii i ta ˈna titauraa “e haere mai mai roto mai i te ati rahi ra”, e no te mau nunaa atoa mai ratou. E ora mai taua mau taata ra i te hopea o te amuiraa o te mau mea nei no te mea ua tuu ratou i to ratou tiaturiraa i nia ia Iehova e te tavini ra ratou ia ˈna i te “rui e te ao”. — Apokalupo 7:9-15.
14 Te pahono nei te “feia rahi roa” i te piiraa e puai noa ˈtura i roto i te ao taatoa nei, ia au i te parau tohu i papaihia i roto i te Isaia 2:2, 3 e na ô ra e: “E riro ia tae i te mau mahana hopea ra, e faatiahia te mouˈa ra o te fare o Iehova [ta ˈna haamoriraa mau] (...). E rave rahi te taata e haere ma te parau e, E haere mai, e haere tatou i nia i te mouˈa o Iehova, (...) e na ˈna e haapii mai i ta ˈna haapaoraa, e haere tatou na te eˈa ta ˈna e faaite maira.” Teie ta te Isa 2 irava 4 e parau ra: “E tiapai ratou i ta ratou ˈoˈe ei auri arote, e ta ratou mau mahae ei tipi tope raau; e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi.”
15. O vai ma te mau taata teie e faatupu nei i te parau tohu i papaihia i roto i te Isaia 2:2-4, e eaha ta ratou ohipa e rave ra no te faatupu i te reira?
15 I to tatou nei tau, o vai ma teie e ‘tiapai nei i ta ratou ˈoˈe ei auri arote’? teie e ore e ‘haapii faahou nei i te tamaˈi’? tei tahoê i roto i te hoê here papu no to ratou mau taeae e mau tuahine i te pae varua i roto i te ao taatoa nei? e teie e tiaturi nei ia Iehova e e titau nei ia vetahi ê ia na reira atoa? Te faaite maira te aamu o to tatou nei tau e o te mau Ite no Iehova ïa, mai ia Hezekia, teie e tiaturi nei ia Iehova ma to ratou mafatu atoa e teie e faaite nei i to ratou tiaturi ia ˈna na roto i te auraroraa i ta ˈna mau faaueraa.
Te hoê tau a muri aˈe faahiahia mau
16, 17. Eaha te oraraa faahiahia mau no a muri atu ta Iehova e pûpû mai nei no te feia e tiaturi ia ˈna?
16 Te pûpû mai nei Iehova i te oraraa faahiahia roa ˈˈe i mua nei, ta tatou e ore e nehenehe e manaˈo, i te feia e tiaturi nei ia ˈna. Ia mono mai oia i te mau faanahoraa tahito a te totaiete na roto i te mau faanahoraa apî, eita te mau taata e ora ˈtu i nia te fenua nei e ite faahou i te mǎtaˈu, te tiaturi ore, te veve, te parau-tia ore, te ohipa taparahi taata. Aita e tamaˈi faahou aore ra e e haamaruaraa tamarii faahou no te faaere i te taata i te ora. Te tǎpǔ mai nei te Apokalupo iho i te Apo pene 21:4 e “e ore roa te pohe, e te oto, e te mihi, e te mauiui, e ore atoa ïa”.
17 Mai ta Iesu i tǎpǔ mai, i roto i te roaraa o te tau, e riro mai te fenua ei paradaiso (Luka 23:43). Te feia e tuu i to ratou tiaturiraa i nia ia Iehova, e nehenehe ïa ratou e ora e a muri noa ˈtu i roto i taua Paradaiso ra, inaha e ore hoi te pohe. E tupu mau â te mau parau a Mika 4:4 e na ô ra e: “E parahi râ ratou o te taata atoa i raro aˈe i ta ˈna iho vine, e i raro aˈe i ta ˈna iho suke, e aore roa e taata e haamǎtaˈu mai ia ratou.” Te manaˈo ra anei outou e ora ˈtu i roto i te hoê totaiete i reira outou e nehenehe ai e tiaturi i te mau taata? No te aha hoi e tupu ai mai te reira te huru? No te mea, mai ta te Isaia 54:13 e parau ra, “e te mau tamarii atoa na oe ra, e haapiihia ïa e Iehova, e e hau rahi to te mau tamarii na oe ra”.
18. Eaha te mau haamaitairaa e noaa mai i te feia e tiaturi ia Iehova?
18 Inaha, e mau haamaitairaa teie e itehia nei i teie mahana e te mau milioni mau Ite no Iehova e tiaturi nei i te Atua. Ei hiˈoraa, i te mea hoi e e auraro ratou i te mau ture e te mau faaueraa tumu a Iehova no nia i te avaava, e iti mai ïa te mau fifi e roohia i nia i te mau tavini a Iehova i te pae no te mariri aitaata o te mahaha e tupu mai na roto i te puhipuhiraa i te avaava. I te mea hoi e te ora nei ratou i roto i te hoê pû viivii ore i te pae morare, i te paeau rahi eita ratou e roohia i te maˈi pee i te pae no te taatiraa, e itehia nei i roto i te ao taatoa nei, mai te SIDA. No te mea hoi eita ratou e faataero ia ratou, eita ˈtura ïa ratou e roohia i te mau maˈi e farereihia nei e te rahiraa o te mau taata e faataero nei ia ratou ma te patia i te raau taero i roto ia ratou, mau maˈi o te nehenehe e faaino i to ratou upoo e e haapohe roa ˈtu ia ratou. I te mea hoi e eita ratou e farii i te pâmuraa toto, e riro ïa te mau tavini a Iehova i te paruruhia i te mau maˈi faatupuhia e te toto. I te mau matahiti atoa, i te mau Etats-Unis, te haapohe nei te hoê o taua mau maˈi nei oia hoi te hépatite virale e te reira ma te tamau, hau atu i te ahuru tausani taata i pâmûhia ˈtu te toto i roto ia ratou.
19. Nafea o Iehova ia tauturu mai i te feia e tavini ia ˈna, noa ˈtu e e pohe ratou i teie nei?
19 Noa ˈtu â ïa e te pohe nei vetahi o te feia e tiaturi nei ia Iehova, no to ratou matahiti rahi, no te maˈi aore ra i muri aˈe i te hoê ati, e tauturu mai Iehova ia ratou. E faaora faahou mai oia ia ratou na roto i te ravea o te tia-faahou-raa. No reira te aposetolo Paulo e faaitoito mai ai ia tatou ‘ia ore tatou ia tiaturi ia tatou iho, i te Atua ra i tei faatia i tei pohe ra’. — Korinetia 2, 1:9.
Te turu mai nei Iehova i ta ˈna mau tavini
20, 21. a) Ia au i te ohipa i roohia i nia ia Iesu, e nehenehe tatou e roohia i teihea huru patoiraa? b) Mai ta ˈna i na reira no Iesu, mea nafea o Iehova ia paruru mai i ta ˈna mau tavini?
20 Ia haamanaˈo na outou e “te vai noa nei to te ao atoa i raro aˈe i taua varua ino ra” i te Diabolo ra ia Satani (Ioane 1, 5:19). No reira, ia tiaturi outou i te Atua, e patoi mai o Satani e te ao ta ˈna e faatere nei, ia outou; e tamata ratou i te tairi i to outou faaroo ma te faaooo mai ia outou aore ra ma te hamani ino mai ia outou, mai ta ratou i na reira ia Iesu. I muri aˈe i to ˈna patitiraahia i nia i te pou haamauiuiraa, “e te feia i haere na reira ihora, ua tâhitohito maira ïa ma te ueue i to ratou upoo, na ô maira, (...) O ta te Atua Tamaiti oe na, a pou mai i raro faarue atu i te satauro. Ua tâhitohito atoa maira te mau tahuˈa rarahi, e te mau papai parau, e te feia paari, ia ˈna, na ô maira, Ua faaora oia ia vetahi ê; eita e tia ia faaora ia ˈna iho. (...) I tiaturi hoi oia i te Atua, e te ite maira te Atua ia ˈna, a faaora oia ia ˈna i teie nei.” — Mataio 27:39-43.
21 E toru mahana i muri aˈe i taua mau ohipa ra i tupu, ua faatia faahou maira te Atua ia Iesu mai roto mai i te feia pohe. Area te feia tâhitohito o taua tau ra, ua taparahi-pohe-hia ïa ratou aore ra ua hopoi-tîtî-hia ratou na te mau nuu roma. I te mea hoi e e peretiteni mai te Mesia, na nia i to ˈna tiaraa Arii no te Basileia o te Atua i te raˈi ra, i te tia-faahou-raa, ia faatiahia mai taua mau taata ra, e tia ïa ia ratou ia auraro mai i te taata ta ratou i faaooo na e 2 000 matahiti na mua ˈtu! E, e paruru mai Iehova i ta ˈna mau tavini e parau e: “E tiaturi au i te Atua, e ore e mǎtaˈu i ta te taata ia rave mai ia ˈu.” — Salamo 56:11.
22. Eaha ta Iehova e parau ra no nia i te feia e tiaturi ia ˈna, e eaha ta ˈna e parau ra no te feia e ore e tiaturi ia ˈna?
22 Teie ta Iehova i parau no nia i ta ˈna mau tavini: “E ao to te taata i tiaturi ia Iehova, o to ˈna ïa uruairaa mau o Iehova. E riro hoi oia mai te raau i tanuhia i pihai iho i te pape ra, o tei faatoro i to ˈna aa na te hiti o te pape, aita i ite i te veavea i te tupuraa mai; te vai ereere tamau noa ra to ˈna rau, e e ore e haapao i te matahiti ûa ore ra, eita hoi e faaea i te hotu i te maa.” Te parau faahou ra oia e: “Ia katarahia te taata e tiaturi i te taata ra, o tei faariro i te taata ei rima tauturu ia ˈna, o tei taiva to ˈna aau ia Iehova. E riro hoi oia mai te raau i te vahi pâpâmǎrô e oriorio noa ra, aore i ite i te maitai ia haere mai; e tia râ i te vahi veavea i te medebara, i te fenua miti e ore e parahihia ra.” — Ieremia 17:5-8.
23. Eaha te tia ia tatou ia rave mai te peu e hinaaro tatou i te ora mure ore?
23 No reira, i teie mau mahana hopea nei, ‘e tiaturi anaˈe ia Iehova, a rave ai i te parau maitai; e parahi anaˈe i te fenua i reira, e amu i te maa ma te hauti-ore-hia mai. E haapopou anaˈe na ia Iehova, e na ˈna e horoa mai i ta to tatou aau e hinaaro ra’. (Salamo 37:3, 4.) Ia pahonohia na ta outou mau aniraa e tia ˈi, oia hoi mai te fanaˈoraa ˈtu i te ǒ o te ora mure ore i roto i te ao apî e te parau-tia i tǎpǔhia mai e te Atua Ta tatou e nehenehe e tiaturi!
Ei haapoto-noa-raa
◻ Eaha te mau mea te tia i te feia e tiaturi ia Iehova ia haapao?
◻ Te tiaturi ra anei te mau haapaoraa o te ao nei ia Iehova?
◻ Eaha te mau haamaitairaa i noaa mai ia Hezekia no to ˈna tiaturi ia Iehova?
◻ Nafea te parau tohu a Isaia 2:2-4 ia tupu i to tatou nei tau?
◻ Eaha te oraraa no a muri atu ta te mau taata e tiaturi ia Iehova e ite atu?
[Hohoˈa i te api 29]
Ua aa maira te afai parau o te arii no Asura ia Iehova e ua faahepo maira e e ia haapau o Ierusalema ia ˈna.
[Hohoˈa i te api 30]
I roto i te ao apî, e oaoa te feia e tiaturi ia Iehova i te hau e te ino ore mau.