Eaha te faufaa ia pure?

TE MAHANA PAE 31 no me 1985, ua tairi e rave rahi puaahiˈohiˈo i te pae apatoa o te oire no Ontario, i Canada. Ma te ravea ore, ua mataitai noa te hoê ekalesiatiko o te ora ra i te oire iti no Grand Valley, i te mau mataˈi puai o tei iriti i te tapoˈi o to ˈna fare. Ia au i te faaiteraa a te mau vea, “ua ite oia i te ati e te semeio i roto i te riri-rahi-raa o te mau mea riaria”.

Oia mau, e ati riaria mau teie no te fetii e te mau hoa o na taata toopiti o tei pohe roa na roto i taua mau puaahiˈohiˈo e no te mau taata tei hau i te tausani, o tei erehia i te fare, na roto i te mau mataˈi puai. E te feia i ora mai aore ra tei pepe rii noa, te parau nei ïa ratou e ua riro to ratou oraraa mai ei semeio. Tei rotopu atoa o Ron e to ˈna hoa ohipa ia ratou. Tau minuti noa i muri aˈe ratou i faaarahia ˈtu ai, ua horo ratou i te vahi paari roa ˈˈe o te fare teitei i reira ratou e rave ai i te ohipa. Ia ˈna i faatia mai i te tupuraa faahiahia a ora mai ai raua, teie ta Ron i parau: “I tiaturi na vau i te Atua i te matamua ra, i teie nei râ, ua papu ia ˈu e te vai mau ra oia.”

Ua parau te hoê taata i te hoê mahana, e i mua i te hoê ati, ‘mea iti roa te feia e ore e tiaturi i te Atua, aore ra aita roa ˈtu’. Mai te peu e e taime to ratou, e rave rahi taata te pure ma te aau tae ia paruruhia aore ra ia ora mai ratou.

I te sabati 21 no tiurai 1985, i te oire no Sydney, i Auteralia, ua hau atu i te hanere taata, te mau tane, te mau vahine e te mau tamarii, o tei putuputu i roto i te hoê Piha no te Basileia, no te haamori i te Atua. I muri aˈe i te himene arueraa, ua faaotihia te hoê pure no te amuiraa. No haamata noa ˈtura te taata orero i te vauvau mai i ta ˈna oreroraa parau bibilia a 15 atura minuti i mairi, a tapu-taue-noa-hia ˈi taua putuputuraa hau mau ra na roto i te hoê paainaraa i te hoê paura. Ua pepe ino roa te taata na ˈna te oreroraa parau, ua pohe roa te hoê taata o tei parahi i te mau parahiraa matamua, e hau atu i te 40 taata o tei tapeahia i te fare maˈi.

[Tumu parau tarenihia/Hohoˈa i te api 3]

E taui anei te hoê ohipa ia pure anaˈe?

E uiui iho â tatou i nia i te faufaa o te pure no nia i taua e piti tupuraa — “te riri o te mau mea riaria” e te hoê ohipa taparahi taata. E faaotiraa papu anei te roaa mai? Eaha te faufaa ia pure?