Iesu, to ˈna oraraa e ta ˈna taviniraa

Hoê hiˈoraa no a muri aˈe no nia i te hanahana o Iesu i roto i to ˈna ra Basileia

I TO Iesu haere-tia-raa ˈtu i te pae fenua no Kaisarea Philipi ra, ua faafaaea ihora oia i te hoê taime e ua haapii atura i te nahoa taata e i ta ˈna mau pǐpǐ atoa. Ua faaite atura oia ia ratou i te hoê parau maere: “Oia mau teie ta ˈu e parau atu ia outou nei, O te tahi pae i teie nei feia e tia mai nei, e ore ïa e ite i te pohe, e ite ai ratou i te Tamaiti a te taata i te taeraa mai i to ˈna ra basileia.”

‘Eaha ra te auraa o teie mau parau a Iesu?’ o ta te mau pǐpǐ ïa i uiui noa. E hebedoma aˈera, ua aratai atura Iesu ia Petero, ia Iakobo e ia Ioane i nia i te hoê mouˈa teitei. Ua po paha, no te mea te hinaaro ra te mau pǐpǐ e taoto. Te pure ra Iesu, e huru ê atura oia i mua ia ratou. Anaana roa ˈtura to ˈna mata mai te mahana ra, e teatea ˈtura to ˈna ahu mai te maramarama ra.

E inaha, fa maira toopiti pue taata mai te huru ra e o “Mose raua o Elia,” paraparau maira ia Iesu no nia i te ‘revaraa no ˈna ra i Ierusalema ra.’ E mea papu e, taua revaraa ra, o te poheraa ïa o Iesu e to ˈna tia-faahou-raa. Tera râ, te haapapu maira taua aparauraa ra e eita e tia ia Iesu ia ape i to ˈna iho pohe haama mai ta Petero e manaˈo ra.

E ara roa ˈˈera te mau pǐpǐ, ma te maere rahi, ua hiˈo e ua faaroo atura ratou i te reira. Noa ˈtu â ïa e e orama te reira, e au râ e e mea mau, i amui atoa mai ai o Petero ma te parau e: “E te Fatu, e mea maitai ia parahi tatou i ǒ nei: e ia tia ia oe ra, e faatia matou i te fare autâ e toru aˈe: no oe e tahi, no Mose e tahi, no Elia hoi e tahi.”

Inaha, a paraparau noa ˈi Petero, tapoˈihia maira ratou e te hoê ata anaana, e inaha, te hoê reo no roto mai i taua ata ra, i te na ôraa mai e: “O tau Tamaiti here teie, ua mauruuru roa vau ia ˈna; a faaroo ia ˈna.” I te faarooraa te mau pǐpǐ i taua reo ra, tipapa ihora ratou i raro. Inaha, ua na ô maira Iesu ia ratou e: “A tia, eiaha e mǎtaˈu.” Tia aˈera ratou i nia, aore roa e taata faahou maori râ o Iesu anaˈe.

I te poipoi aˈe, ia pou mai ratou mai nia mai i taua mouˈa ra, ua aˈo maira Iesu ia ratou: “Eiaha roa outou e faaite i te taata i ta outou i ite nei, e ia tia faahou mai te Tamaiti a te taata mai te pohe maira.” No to Elia faraa mai i roto i taua orama ra, ui atura ta ˈna mau pǐpǐ e: “Eaha hoi i parau mai ai te mau papai parau e, O Elia na te haere mai?”

Ua pahono atura Iesu e: “Ua reva mai na Elia; e aore ratou i ite ia ˈna.” Te parau ra ïa o Iesu no Ioane Bapetizo o tei rave i te ohipa mai ia Elia atoa. Ua faaineine o Ioane i te eˈa no te Mesia, mai ia Elia atoa no Elisaia.

Auê ïa orama o tei faaitoito hua ia Iesu e i ta ˈna mau pǐpǐ atoa! Ua riro taua orama ra mai te hoê hiˈoraa no a muri aˈe no nia i te hanahana o te Mesia i roto i to ˈna ra Basileia. Oia nei, ua ite aˈera te mau pǐpǐ i “te Tamaiti a te taata i te taeraa mai i to ˈna ra basileia,” o ta Iesu mau ïa i tǎpǔ atu ia ratou hoê hebedoma na mua aˈe. I muri aˈe i te poheraa o Iesu, ua papai ihora o Petero e ua ‘ite hua râ to ratou mata i te hanahana o te Mesia, oia e o ratou atoa i nia i te mouˈa moˈa ra’.

Ua ani atura te mau Pharisea ia Iesu i te hoê tapao o tei haapapu e, o ˈna mau ta te mau Papai i faaite, oia hoi, te arii maitihia e te Atua. Aita hoi taua tapao ra i horoahia ia ratou. Tera râ, ua fariihia te mau pǐpǐ i pee tamau ia ˈna ia ite i to ˈna faahuru-ê-raahia o tei haapapu i te mau parau tohu no nia i te Basileia. No reira o Petero i papai ai i muri aˈe e: “Tei ia tatou atoa te parau a te mau peropheta tia rahi roa ˈtura i teie nei.” Mataio 16:28–17:13; Mareko 9:1-13; Luka 9:27-37; Petero 2, 1:16-19.

◆ Hou oia e pohe ai, mea nafea vetahi i te iteraa ˈtu ia Iesu i te taeraa mai i roto i to ˈna ra Basileia?

◆ I roto i te orama, eaha te tumu parau o te aparauraa i rotopu ia Mose, ia Elia e ia Iesu?

◆ No te aha teie orama i riro ai ei faaitoitoraa rahi no te mau pǐpǐ?

[Hohoˈa api taatoa i te api 9]